Dual Panel1Wali a’i-a’i to i Pue Allah Puenya pasi to napokio seja i mPue Allah damasua saruga, pobuuka kojo i Yesu. Ia semo to kita samparia mampatimonso Ia napokau i mPue Allah pasi Ia to pampue to bae anggaNya.
2Ia napilis i mPue Allah mangika palaong to etu pasi Ia masipato rasarumaka mangika palaong to nawaika i mPue Allah Ia etu. Pasi ewa see seja i Musa tempo owi. Ia masipato seja rasarumaka mampasilonga samparia tau to i Pue Allah Puenya to raporapaka ewa banua i mPue Allah.
3Pei i Yesu semo to masipato mangarata angga to bae-bae pei angga to narata i Musa. I Yesu maya raporapaka ewa bas, pasi i Musa raporapaka ewa banua to iwanguNya. Apa bas semo to bae-bae angganya pei banua to iwangunya etu. Kamonsonya i Pue Allah semo to mangika samparia anu to re’e, pei ane ewa rapa to aku manganto’o etu, i Yesu masipato mangarata angga to bae-bae pei angga to narata i Musa.
4(3:3)
5Wali i Kerisitu pasi i Musa paka masipato rasarumaka mangika palaong to nawaika i mPue Allah sira. I Musa mampasilonga samparia tau to i Pue Allah Puenya to raporapaka ewa banua i mPue Allah. Ia mangika palaong etu ewa naika nto papolaong. Pasi ia manganto’oka tau boros, “I Pue Allah roomo mampaponsanika aku mangkonong anu to Ia damanganto’o ri tempo to darata.” Ewa wetu nato’o i Musa. Pei ane i Kerisitu, Ia mampasilonga seja banua i mPue Allah, pei Ia mangika palaong etu si’a ewa naika nto papolaong. Ia mangika ewa naika ana ntau pue banua. Wali kita semo to rato’oka banua i mPue Allah etu ane kita mampakaroso rayanta see taa mekameka, pasi mampakaroso pansarumakanta to mampakandende raya ngkita, see karoso ndayanta pasi pansarumakanta etu maroso rataka ri tempo kapatenta.
6(3:5)
7Wali padongeka paposia i Nosa Mapasing to ratulis ri raya nTuntu i mPue, to’oNya, “Seo si’i ane komi mangandonge loo i mPue Allah,
8ne’e mangaba’a talinga ngkomi ewa naika bue-bue ngkomi tempo sira mangewa i Pue Allah tempo owi. Sira mangewa kojo i Pue Allah tempo sira mangansoba Ia nja’u pada bone.
9Wali Ia manganto’o, ‘Buebue ngkomi opo mpuyu nto’u kasaenya mangangkita palaong to inikangKu nja’u pada bone, pei sira tiroo mangansoba Aku. Mandudu ngkani sira mangewa Aku, sira rani mangkita bara wimba kasaenya Aku damangansabaraka palaong nsira etu.
10Wali see naka Aku maja’a rayangKu resi sira to tuwu ri tempo etu, pasi Aku manganto’o, “Pampobuuka nsira sangkani masepi yako resi Aku, pasi sira bo’onya mangalulu songkangKu.
11Wali yako ri kaja’a ndayangKu Aku mamparajanjika, manganto’o sira taa kojo maya damasua ri tampa rapandoo sindara pei Aku.”’” Etu semo gombo to ratulis.
12Wali a’i-a’i, pakatao kojo see tare komi to rayamu maja’a saba taa mangaya. Apa ane tau to ewa wetu, ia damangandolika tangonya yako resi i Allah to tuwu.
13Wali si’isi’i, tempo tiroowa re’e tempo to nawaika i mPue Allah, to tao-tao komi ponto eo masipakaroso raya ngkomi see tare komi to mawali mako’o wo’o apa natipu nu dosa.
14Apa kita samparia mangarata seja samparia to narata i ngKerisitu ane kita mampakaroso pansarumakanta to re’e resi kita tempo owo mula mangaya see tare pombalinya rataka temponya kita mate.
15Wali palaong etu singkonong pei Tuntu i mPue Allah to owo room aku mampatiendoka komi, to manganto’o, “Seo si’i ane komi mangandonge loo i mPue Allah, ne’e mangaba’a talinga ngkomi ewa naika nu bue-bue ngkomi tempo sira mangewa i Pue Allah tempo owi.” Etu semo to ratulis ri raya nTuntu i mPue Allah tempo owi.
16Wali tau to nangandonge loo i mPue Allah pei to tiroo nangangewa Ia etu, bara sema sira? Gete, tau etu semo samparia tau to nakeni i Musa yako la’u tana Mesir!
17Pasi opo mpuyu nto’u kasaenya i Pue Allah maja’a rayaNya resi sema? Ia maja’a rayaNya resi tau to mangika dosa semo, pei to mate yau nja’u pada bone.
18Pasi tau to imba to naparajanjika kojo i mPue Allah sira taa damasua ri tampa rapandoo sindara pei Ia? Etu semo tau to taa mampolaika Ia.
19Wali manasa resi kita naka pei sira taa maya masua ri tampa rapandoo etu apa saba sira taa mangaya i Pue Allah. Wali ne’e kita ewa wetu.