Dual Panel1Wali tiroowa re’e parajanji i mPue Allah to darabanang. Etu semo Ia damangawaika kita kasanang ndaya to raporapaka ewa tampa rapandoo. Wali see naka anu kita mangajagai kojo danaka ne’e pasi samba’a komi to taa damangarata kasanang etu.
2Apa kita seja rapakarebaka kareba matao sewaju ewa bue-bue ngkita tempo owi. Pei kareba matao to nadonge nsira tare batuanginya resi sira, apa tempo sira mangandonge, sira taa mangaya.
3Wali kita to mangaya semo to maya mangarata kasanang resi i Pue Allah etu. Ane tau to taa mangaya, sira taa nabiaka i mPue Allah mangarata, ewa to Ia room manganto’o, to’oNya, “Aku maja’a kojo rayangKu resi sira, see naka Aku mamparajanjika, manganto’o, ‘Sira taa kojo damasua ri tampa rapandoo sindara pei Aku.’” Wali ewa wetu nato’o i mPue Allah, nempo si’a ewa wetu songkaNya to yako ri pomulanya. Apa ojo karoonya Ia mampapowali lino Ia re’e mandoo apa samparia palaongiNya room. Pasi yako ri tempo etu Ia re’e songka rani mangawaika to lino kasanang ndaya to raporapaka ewa masua ri tampa rapandoo sindara-ndara pei Ia.
4Wali i Pue Allah semo to manganto’o palaongiNya room. Apa re’e ratulis ri raya ntuntuNya mangkonong temponya Ia mandoo ri eo to kapitu. Ewa si’i Ia manganto’o, “Wali ane ratamo eo to kapitu, i Pue Allah mandoo yako samparia palaong to inikaNya.”
5Pasi see naka Ia manganto’o seja gombo to kita owo room mangabasa to manganto’o, “Sira taa kojo damasua ri tampa rapandoo sindara pei Aku.” Wali tempo Ia manganto’o “sindara pei Aku”, batuanginya Ia re’emo mandoo. Palaong to si Ia room, pasi Ia re’e songka rani to lino to mangaya mangarata seja kasanang ndaya to raporapaka ewa masua ri tampa rapandoo sindara-ndara pei Ia.
6Wali manasa ane tau to tempo owi to re’e mangandonge kareba matao mangkonong kasanang ndaya to raporapaka ewa tampa rapandoo sindara pei i Pue Allah, tau etu taa mangarata kasanang etu, apa sira taa mampalaika i Pue Allah. Pei kita tansani re’e wo’u tau to yusa to nawaika i mPue Allah mangarata kasanang etu.
7Kamonsonya re’e tau tempo owi to nakeni i Yosua rata ri tana Kana’an. Pei si’a tana Kana’an etu to tampa rapandoo to naparajanjika i mPue Allah. Apa sira roomo masua ri tana Kana’an panewa yako etu masae wo’u panewa i Pue Allah mangika parajanji resi wiyaa nsira. Ia magombo liu ri nganga i Makole Daud, manganto’o gombo to kita room mangabasa to manganto’o, “Tempo si’i ane komi mangandonge loo i mPue Allah, ne’e mangaba’a talinga ngkomi.” Ewa wetu nato’o i mPue Allah. Wali ane tampa rapandoo batuanginya tana Kana’an, i Pue Allah tamo damanganto’o wo’u gombo etu. Pei Ia re’e kojo mampakatantuka wo’u tempo to yusa to temponya mangarata kasanang ndaya to raporapaka ewa tampa rapandoo. Etu semo “tempo si’i”. Wali tampa rapandoo etu si’a batuanginya tana Kana’an to narata nto Yahudi to nakeni i Yosua tempo owi. Apa sira roomo masua ri tana Kana’an panewa i Pue Allah magombo wo’u mangkonong tempo to temponya masua ri tampa rapandoo. Wali ane tampa rapandoo batuanginya tana Kana’an etu, i Pue Allah tamo damanganto’o wo’u gombo etu.
8(4:7)
9Wali manasa, tiroowa re’e kasanang ndaya to danarata ntau to i Pue Allah Puenya. Kasanang ndaya etu raporapaka ewa eo to napandoo i mPue Allah ri eo kapitu.
10Apa i sema-sema to masua ri tampa rapandoo sindara pei i Pue Allah, tau etu mandoo yako ri palaonginya ewa naika i mPue Allah mandoo yako ri palaong to si Ia ri tempo owi.
11Wali anu kita mampakadota see mangarata kasanang ndaya etu, danaka ne’e kita to taa damangarata apa saba taa mangampalaika i Pue Allah ewa naika bue-bue ngkita tempo owi.
12Wali pakadota apa tuntu i mPue Allah, tuntu etu tuwu pasi maroso. Tuntu i mPue Allah raporapaka ewa wada to mataja dua mbalia to maya mangantuja pasi mangaga’a yau yotus pasi uta mbuku. Pei Tuntu i mPue Allah semo to tajataja pei wada etu apa tempo kita mangandonge Tuntu i mPue, TuntuNya etu ewa mangantuja pasi mangaga’a yau rayanta pasi toniinta apa mampakanasa see miyala ewa wimba pampobuuka pasi songka ndayanta.
13Pasi tare anu to napapowali i mPue Allah to maya rawuni yako ri pangkitaNya. Apa samparia lambe pasi tiloka ane ri pangkita nu mata i mPue Allah. Pasi Ia semo to kita damangansono mangkonong lengko ngkita.
14Wali anu kita mampakaroso pangaya to kita mampongakung, apa kita re’e samba’a to pampue to bae kojo anggaNya. Etu semo i Yesu, Ana i mPue Allah. Ia yau polas nto’u yangi rataka ndate saruga.
15Wali Ia mawali to pampue to bae anggaNya to mamponsaruka kita ri tango i mPue Allah. Pasi Ia si’a to pampue to taa nakurang mangepe seja kayu’u ngkita. Ia mangepe kojo apa Ia room seja mangarata samparia ngaya mpanggoda to kita mangarata, pei Ia tare mangika dosa.
16Wali ne’emo kita meka-meka rayanta mangampago i Pue Allah. Ia maporenta yako ri kanoto ndayaNya, wali ane kita mangampago Ia, Ia damampaponsanika kita pamporayangiNya. Pasi tempo kita parluu rasawang, Ia damangansawang kita yako ri kanotoNya. Wali etu semo batuanginya kasanang ndaya to raporapaka ewa masua ri tampa rapandoo sindara-ndara pei i Pue Allah.