Dual Panel1Wali ewa si’i batuanginya gombo to kita manganto’o etu, kita re’e kojo to pampue to bae anggaNya to ewa wetu, to room matunda ri awe nggadera i Makuasa ndate saruga ri sambali tondo ngkana.
2Pasi Ia to pampue to mapalaong nja’u raya nsongi to mapasing kojo to ndate saruga pasi ri raya ntenda i mPue Allah to nawangu i mPue Allah, si’a to nawangu nto lino. Wali tenda to nawangu i mPue Allah, etu semo tenda to uyunya kojo re’e.
3Wali ponto to pampue to bae angganya, palaong nsira semo mampampueka resi i Pue Allah sora pasi pampue. Wali see naka to pampue to bae anggaNya to si kita etu re’e seja pampueNya to Ia mangkeni ri saruga etu.
4Pei ane Ia tiroowa maroo ri lino, Ia taa maya rato’oka to pampue, apa re’emo to pampue ri lino to mampampueka sora singkonong pei porenta i Musa. Pei to pampue to bou etu, Ia mangkeni pampueNya ri saruga.
5Wali to pampue to wiyaa i Lewi, sira mapalaong nja’u raya ntenda i mPue Allah to raika ewa ta’anya pasi ewa sonto ntenda i mPue Allah to ndate saruga. Wali see naka tempo i Musa damangawangu tenda i mPue Allah tempo owi, tempo etu i Pue Allah mampatiendoka ia, to’oNya, “Ne’e kalingan! Ika samparia etu mangalulu kojo sonto to rapaporaoka korom ndate rapa ntongku.” Etu semo gombo i mPue Allah resi i Musa. Wali to pampue mangika palaong nsira ri raya ntenda etu.
6Pei palaong to nasarumakaka i mPue Allah resi i Yesu, palaong etu to baebae batuanginya pei palaong nto pampue to tempo ruyu. Apa jaya to bou to naparajanjika i mPue Allah see kita maya rapalaes, jaya etu to taotao pei jaya to masae. Apa lo’a, anu to naparajanjika i mPue Allah si’i-si’i, anu etu to tao-tao pei anu to naparajanjika tempo ruyu. Wali ewa parajanji to bou semo to tao-tao pei parajanji to ruyu, ewa see seja palaong to bou semo to tao-tao pei palaong to masae.
7Wali parajanji to ruyu etu ane nakurang mampakaroo samparia to parluu raika, tamo re’e batuanginya rabolosika parajanji to bou.
8Pei ane ri pangkita i mPue Allah parajanji to ruyu etu re’e salanya. Salanya etu resi tau semo apa sira taa nakurang mangaluluka parajanji etu. See naka i Pue Allah manganto’o, “TaungKu sala,” pasi Ia manganto’o, “Padongeka! Apa daratamo temponya Aku damangika parajanji to bou resi wiyaa i Israel pasi resi wiyaa i Yehuda.
9Parajanji to daKuika etu si’a ewa parajanji to Aku nangika resi bue-bue nsira tempo owi, tempo Aku mangangkentar sira yako la’u tana Mesir. Apa sira mandoo yau mangika palaong to singkonong pei parajanji etu, wali see naka Aku mangandolika tangongKu yako resi sira.
10Wali si’i semo parajanji to daKuika resi wiyaa i Israel ri tempo to darata, to’onya, ‘PorentangKu daKuposaka ri pampobuuka nsira pasi daKutulis ri raya nsira. Pasi Aku damawali Allah nsira pasi sira damawali taungKu.
11Pasi ri tempo etu tamo re’e batuanginya tau damangampotundeka yunu nsira pasi pua’i nsira manganto’o, “To tao-tao komi mangansani i Pue.” Tare batuanginya manganto’o ewa see apa tempo etu samparia tau paka damangansani Aku, nempo to mayunuwa, pasi to bosemo.
12Pasi ri tempo etu Aku damanoto resi sira pasi damangalapa sala nsira. Pasi Aku tamo damampobuuka dosa nsira pasi sala nsira etu.’” Etu semo parajanji i mPue Allah to bou.
13Wali tempo i Pue Allah manganto’o, “Si’i parajanji to bou,” tempo etu Ia ewa manganto’o parajanji to ruyu masipato rabolos apa masaemo pasi mosumo dapaya yau.