Alkitab Mobile SABDA
[VER] : [TAA]     [PL]  [PB] 
 <<  Kisah Para Rasul 25 >> 

1Wali i Gubernur Pestus wo’u to mula mangkuasang propinsi Yudea etu. Panewa ojo kagananya togo mbengi, ia mayoko yako ri kota Kaisarea dayau ndeku Yerusalem.

2Rata nda’a ria panewa kepalakepala nto pampue pasi tau tu’a nto Yahudi mampotango ia. Sira manganto’oka ia mangkonong palaong i mPaulus to napakasala nsira.

3Pasi sira mamporapika kojo resi i Pestus see ia bara buya rayanya damampokau tau yau damangoko i Paulus pei mangkeni ma’i ri Yerusalem. Ewa wetu pamporani ndaya nsira apa sira re’e mansongka damampopate yau i Paulus tempo ia re’e ri jaya.

4Pei i Pestus mangansono, to’onya, “I Paulus etu re’e ratarungku la’u kota Kaisarea, pasi tamo masae aku dayau muni seja lo’u ria.

5Wali ane re’e sala to naika ngkai etu to tao-tao ketua ngkomi yau seja sindara pei aku panewa rata la’u ria sira damanganto’o mangkonong sala ngkai etu.”

6Wali yako etu i Pestus bara wayu mbengi bara sampuyu mbengiwa ia nda’a Yerusalem panewa ia yau muni lo’u Kaisarea. Rata la’u ria eo rao wo’u ia matunda ri gadera to napake nto pobotus pei mampokauka tau yau damangoko i Paulus pei mangkeni mai darabotus.

7Wali ojo karata i mPaulus, to Yahudi to nama’i to yako nda’a Yerusalem, sira makore tiku ia panewa sira manganto’o boros kojo gombo to mabeu to mampakasala ia. Pei gombo to nato’o nsira etu, sira taa nakurang mampakatantu ri kamonso-monsonya.

8Wali ojo karoonya sira magombo etu, i Paulus magombo seja manganto’o notonya, ia manganto’o, “Aku tare kojo salangku. Apa aku tare mangewa porenta nto Yahudi, pasi tare mampakarikasika banua i mPue Allah pasi taa seja re’e manto’o maja’a makole nto Roma.” Etu semo gombo i mPaulus manganto’o notonya.

9Pei i Pestus rani mampakasanang raya nto Yahudi, wali see naka ia mampotanaka resi i Paulus, to’onya, “Wimba korom, bara masanang yau ndeku Yerusalem, rata nda’a ria panewa aku mampakaroo palaong si’i?”

10Pei i Paulus mangansono, “Aku si’i-si’i re’e makore ri tango ngkomi, to pobotus to naokotaka i makole nto Roma. Wali masipato komi semo mangabotus aku, apa komi mangansani kojo, Pa’a, aku tare mangika sala resi to Yahudi.

11Wali ane monso pu’u aku re’e mangika palaong to maja’a, to masipato rahuku mate, ane ewa wetu, biakamo aku rapopate yau. Pei ane gombo nto Yahudi to mampakasala aku etu manasa taa monso, tare tau to re’e kuasa mangamposora yau aku resi sira. Wali aku mamporapi darakeni wo’u resi makole nto Roma see ia semo damangabotus palaong si’i.”

12Wali ojo pangandonge i mPestus gombo i mPaulus etu, ia magombo resi bara sawei mba’a joanya to pande mangabotus mangkonong palaong etu. Roo see ia manganto’oka i Paulus, “Korom mamporapika dayau resi makole nto Roma, wali korom dayau kojo damampotango ia.”

13Wali yako etu bara sawei mbengi, ratamo makole nto Yahudi, i Makole Agripa, sira dua a’inya, i Bernike. Sira dua rata ri kota Kaisarea damanganto’oka i Pestus, “Kami masanang kojo komi re’e mawali gubernur si’i-si’i.”

14Wali sira dua malagi mbengi maroo-roo ri Kaisarea. Pasi ri rayanya sira marooroo nja’u ria etu, i Pestus mangansaritaka Makole Agripa mangkonong i Paulus. Ia manganto’o, “Re’e samba’a tau to ratarungku rire to taa nalapa i mPeliks seore.

15Pasi tempo aku nda’a nda’a Yerusalem seore, kepala-kepala nto pampue pasi tau tu’a nto Yahudi sira mangansaritaka aku mampakasala ia. Sira mamporapika resi aku see aku mangahuku ia.

16Pei aku manganto’oka sira si’a ada nto Roma ojo mansaka mangahuku tau to rapakasala. Ane ewa ada nto Roma, tau to rapakasala etu darawaika ruyu temponya mampotango tau to mampakasala ia pasi rawaika seja temponya damanganto’o notonya. Etu semo to kuto’oka to Yahudi etu.

17Wali yako etu re’e sawei mba’a tau etu mangalulu aku ma’i muni ri kota Kaisarea si’i. Ojo karata muni mami rire aku taa mampea masae. Eo rao aku matunda ri gadera damangabotus panewa aku manganto’oka tau mangkeni mai i Paulus.

18Wali tempo pangabotus etu, tau to mampakasala i Paulus sira makore pei magombo. Tempo etu aku mampondayaka sira damanganto’o mangkonong palaong to maja’a kojo to nika i mPaulus, pei si’a ewa see.

19To nato’o nsira etu ojo mampakasala ia apa pampobuuka to si ia taa sewaju pei pampobuuka to si sira ane mangkonong agama nsira. Pasi sira re’e seja masibanta pei ia mangkonong tau sanganya i Yesu. Tau etu matem pei ane ewa panto’o i mPaulus Ia tuwu munim.

20Wali aku tamo kunsani to dakuika mampakanasa mangkonong palaong etu, wali aku mampotanaka resi i Paulus bara ia mamporoe yau ndeku Yerusalem darabotus ndate ria mangkonong palaong etu.

21Pei ia bo’onya yau darabotus ndate Yerusalem. Ia mamporapika, to’onya, ‘Biakamo aku ri raya ntarungku mangampeas temponya danabotus i makole nto Roma.’ Wali see naka aku manganto’oka tau mangantarungku wo’u ia mangampeas tempo aku yoa panewa aku damampokauka tau mangkeni ia resi makole etu.”

22Wali ojo karoonya i Pestus magombo etu, i Makole Agripa manganto’oka ia, to’onya, “Aku rani seja mangandonge gombo ntau etu.” Wali i Pestus manganto’o, “Nile semo komi damangandonge gombonya.”

23Wali eo rao wo’u, ma’i muni i Agripa sira dua Bernike. Tempo sira ma’i etu sira magaya kojo pakenya pasi boros tau to mangawawa sira pei mangika palaong to mampakabae sira dua. Wali sira dua masua ri raya banua etu ri tampa to bae kojo to napake ntau mampogomboka tau boros. Tempo sira masua etu sira sindara-ndara pei kepala-kepala ntentara pasi tau to bose angganya ri kota etu. Ojo karata nsira nja’u raya ntampa etu, i Pestus mampokau tau yau damangoko i Paulus pei mangkeni mai.

24Wali sira mangkeni i Paulus panewa i Pestus magombo, to’onya, “Makole Agripa pasi pa’a-pa’a samparia to siromu rire! Komi mangangkita tau si’i, ia semo to napakasala nto Yahudi samparia to nda’a Yerusalem pasi to rire seja. To Yahudi etu tare pandoonya sakaboo manganto’o, ‘Tamo masipato ia tuwu!’

25Pei tempo aku mangabotus ia seore, aku taa mangarata sabanya to masipato darapopateka yau ia. Pei roo see ia semo to mamporapi danabotus i makole nto Roma, wali aku mansongka damampokatu ia resi makole etu.

26Wali aku damangantulis sura resi makole nto Roma. Pei aku tawa mangansani anu to masipato ratulisika makole nto Roma mangkonong ngkai si’i apa aku tawa mangarata salanya Wali see naka aku mampokau tau mangkeni mai ia mampotango komi samparia, taa manto’o i Makole Agripa. Apa aku rani komi mangandonge gombonya see tuwu-tuwuja damanasa salanya. Wali ane ewa see panewa aku maya mangantulisika makole nto Roma sura.

27Apa ane ewa pampobuuka to si aku, taa matao ane mampokatu tau danabotus i makole nto Roma ane tawa mampakanasa ruyu resi ia sala to nika ntau etu.”


  Share Facebook  |  Share Twitter

Download Audio MP3 (Kisah Para Rasul 25):
Mobile (Low Quality) - CD (High Quality)

 <<  Kisah Para Rasul 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel