Dual Panel1Wali yako etu aku re’e mangkita wo’u ri raya mpangkitangku. Aku mangkita Ana nu Domba makore ndate rapa mpantana to rato’oka Sion. Ana nu Domba etu makore sindara-ndara pei tau to satu pei opo mpuyu pei opo nsowu kaborosinya. Tau etu ratulis ri kirenya sanga nu Ana Domba pasi sanga mPa’aNya.
2Pasi aku mangandonge loo to yako ri saruga. Loo etu ewa loo nu wera kawuu-wuu pasi ewa loo nu lamoa. Pasi loo etu ewa loo nu gambus to natingko ntau.
3Wali tau satu opo mpuyu pei opo nsowu etu, sira menyanyi ri tango nggadera Makole pasi ri tango nu anu to tuwu opo mba’a pasi ri tango ngketua-ketua. Sira menyanyi nyanyi to bou. Nyanyi etu taware to maya mangansani kasimbalinya yako tau satu opo mpuyu pei opo nsowu etu, to room naoli i mPue yako ri oyo nto lino.
4Tau etu tau to tare mangika palaong to mampakarikasika raya nsira apa sira tare magoyal bara masala resi to we’a apa sira nakurang manta’amaka rayanya. Sira ojo mangaluluka kojo Ana nu Domba. Imba nakanjo’u nu Ana Domba etu, sira njo’u seja. Pasi sira semo to naoli i mPue yako ri oyo nto lino. Sira mawali i Pue Allah Puenya pasi Ana nu Domba Puenya, ewa pae to uyunya rapota to rapampueka resi i Pue Allah.
5Sira taa mawuti pasi lengko nsira tare to maya rapakasala.
6Wali yako etu, aku mangkita wo’u samba’a pomakau i mPue Allah mayoko malangan kojo ndate rao. Wali pomakau etu ia mangkeni kareba matao to singkasaenya. Ia mampakarebaka kareba matao etu resi tau ri sambawo lino, etu semo njo’u ponto-ponto paporenta, pasi ponto-ponto suku, pasi ponto-ponto basa pasi ponto-ponto bansa.
7Ia maroso kojo loonya kaboo, ia manganto’o, “Palaika i Pue Allah saba manga’angga Ia pasi barong kuasaNya, apa ratamo temponya Ia mangabotus to lino. Wali pampue resi i Pue Allah, Ia to nampapowali yangi, lino, tasi, pasi mata nue.”
8Wali ojo karoonya pomakau etu magombo, re’e wo’u samba’a pomakau to mangalulu ia. Pomakau to kadua etu manganto’o, “Napukamo! Napukamo kota Babel bae etu. Kota etu semo to mangika see tau samparia bansa sangkani magoyal mangalulu lengko to si ia. Etu maya raporapaka ewa tau to mampapoinuka sa’e tule naka kayangu.”
9Wali ojo karoonya pomakau to kadua etu magombo, panewa re’e wo’u samba’a to mangalulu ia. To katogo etu maroso loonya kaboo manganto’o, “I sema tau to mampue resi binatang to maja’a pasi resi tautaunya pasi to mangantima tondong ri kirenya bara ri palenya,
10tau etu damanginu tule to tondong huku yako resi i Pue Allah. Tule etu tule to taa ragaloka ue, to napoyali i mPue Allah ri raya nsangkir to rato’oka sangkir nu huku to yako resi i Pue Allah. Wali tau to manginu tule etu, ia darasesaika apu pasi sedawa ri tango mpomakau to i Pue Allah Puenya pasi ri tango nu Ana Domba.
11Wali kumbu nu apu to yako ri apu to mangansesai tau etu kangkumbukumbu singkasaenya. Wuri eo tare pandoonya kasesa ntau to mampue resi binatang to maja’a pasi mampue resi tau-taunya pasi to mangantima tondong sanga binatang etu.
12Wali ane ewa see, matao ane tau to i Pue Allah Puenya, to mangalulu porenta i mPue Allah pasi to mangaya i Yesu, pakabae sabaranya tempo mangarata kasusa.
13Wali yako etu aku mangandonge loo to yako ndate saruga. Loo etu manganto’o, “Tulis gombo si’i, gombo to manganto’o, masanang kojo tau to mangaya i Pue to mate yau yako tempo si’i.” Panewa i Nosa Mapasing manganto’o, “Monso pu’u masanang sira, apa ojo karoonya sira mate yau sira maya mandoo yako ri palaonginya to mandasai. Sira masanang apa sira damangarata wua mpalaong to naika nsira etu.”
14Wali ojo karoonya i Nosa Mapasing magombo, aku mangkita wo’u ri raya mpangkitangku. Aku mangkita limu to buya, pasi ri limu etu re’e to matunda ri wawonya. To matunda ri wawo limu etu, Ia ewa wiyaa nto lino ta’aNya. Ndate wo’oNya re’e songko makole to weyawa pasi Ia mangkongko sabit to mataja to rapake mamota.
15Panewa yako etu aku mangkita wo’u pomakau i mPue Allah to masuwu yako ri Banua i mPue Allah. Pomakau to kaopo etu maroso loonya kaboo manganto’oka Ia to matunda ri wawo limu, ia manganto’o, “Pake sabitMu pei pota, apa ratamo temponya rapangampota, apa matasamo anu to darapota ri lino.”
16Wali Ia to matunda ri wawo limu, Ia mampake sabitNya mamota ri wawo lino. Wali napotamo anu to darapota ri wawo lino etu.
17Wali roo etu aku mangkita samba’a wo’u pomakau to masuwu yako ri raya banua i mPue Allah ndate saruga. Pomakau etu mangkongko seja sabit to mataja.
18Panewa re’e wo’u samba’a pomakau to mangkuasang apu, ia masuwu yako ri palampa. Pomakau etu maroso seja loonya kaboo manganto’oka pomakau to re’e sabit to mataja etu, ia manganto’o, “Pake sabitmu ri nawu anggur ri lino, pei poromung wuanya apa matasamo.”
19Wali pomakau etu ia mangampake sabitnya ri wawo lino pei mamporomung wua nu anggur etu. Panewa wua nu anggur etu ia mampanasoka yau lo’u raya mbayau mbatu to bae to tampa darapangalombu wua nu anggur etu. Wali wayau darapangalombu wua nu anggur etu semo tondong huku yako resi i Pue Allah.
20Wali wua nu anggur ralombu-lombu ri raya mbayau etu ri sambali ngkota, panewa yako ri raya mbayau etu re’e raa maili ewa ue kekaju. Raa to maili etu rata ri samaku njarang kayombunya pasi togo atu kilometer kalongkonya pailinya.