Dual Panel1Wali ojo karoonya Ia magombo, aku re’e wo’u pangkitangku. Aku mangkita wombo ndate saruga tiloka. Pasi aku mangandonge wo’u loo to ewa loo ntarompet karosonya to aku owo roo mangandonge ngena. Loo etu manganto’o wo’u, “Papone mai. Aku damampaporaoka korom palaong to damawali ri tempo to darata.”
2Wali ojo karoonya aku mangandonge loo etu, aku mansaka nawaika i Nosa Mapasing pangkitangku. Ri raya mpangkitangku etu aku mangangkita samba’a gadera Makole ndate saruga. Pasi re’e seja to matunda re’e ria.
3Wali Ia to matunda ri gaderaNya etu, ane pangkita ntau Ia makilo kojo ewa ta’anya mata nsinsi to masuli olinya to buya pasi mawaa, to rato’oka yaspis pasi sardis. Pasi tiku gadera Makole etu pindurai maliwuyu makilo ewa mata nsinsi to masuli olinya to rato’oka samrud.
4Pasi re’e seja dua mpuyu pei opo gadera tiku gadera Makole to rato’o etu. Pasi re’e seja dua mpuyu pei opo mba’a ketua matunda ri gadera etu. Sira mangampake pake to buya pasi ndate wo’o nsira re’e seja songko makole, songko weyawa.
5Wali yako nja’u gadera Makole to ri tongonya etu, masuwu bilak kreto. Pasi ri tango nggadera etu re’e pitu suyu to mawea. Suyu etu semo tondong pitu nosa i mPue Allah.
6Pasi re’e seja ri tango nggadera etu anu to ewa tasi to raika yako kasa. Tasi etu polasi ralo’aka ewa kasa to rato’oka kristal. Wali re’e seja anu to tuwu opo mba’a. Sira opo re’e makore ri awe gadera etu ponto sunonya. Anu to tuwu etu malagi matanya, juku ri dadanya pasi juku ri bengonya.
7Wali anu to tuwu to uyunya, ia ewa singa ta’anya. To kadua ewa sapi to pongka, to katogo, lionya ta’anya ewa lio ntau, panewa to ka’opo ewa bomboliano to tongo mpayokonya.
8Pasi anu to tuwu opo etu re’e ono paninya samba’a, pasi la’ara mpaninya etu juku seja matanya. Wali wuri eo wuri eo sira tare pandoonya mamponyanyika, manganto’o, “Mapasing, mapasing, mapasing i Pue Allah anu Makuasa, to re’emo tempo owi, pasi tempo si’i, pasi tempo to darata!”
9Wali anu to tuwu opo etu sira menyanyi manga’angga, mampakabae pasi mangabarong Ia to matunda ri gaderaNya etu, Ia to tuwu singkasaenya. Tempo sira menyanyi,
10ketua-ketua to dua mpuyu pei opo etu sira madungku yau ri wawo ntana ri tangonya Ia to matunda ri gaderaNya etu pei mampue mampakabae Ia to tuwu singkasaenya. Sira mangayali yau songko weyawa to ndate ndate wo’o nsira panewa mamposaka ri tango nggadera Makole etu. Pasi sira manganto’o,
11“Komi semo Pue mami pasi Allah mami. Masipato Komi rapakabae, ra’angga pasi nato’o ntau makuasa. Apa Komi semo to nampapowali samparia anu to re’e. Wali samparia etu re’emo pasi rapapowali apa etu semo pamporani ngKomi.”