Alkitab Mobile SABDA
[VER] : [TAA]     [PL]  [PB] 
 <<  Yohanes 4 >> 

1Wali yako etu to Yahudi to aliran Parisi, sira re’e mangandonge kareba to manganto’o nangi i Yohanes apa i Yesu semo to boro-boros tau to mawali anaguruNya pasi to Ia mangabaptis. Pei kamonsonya si’a i Yesu to mangabaptis tau etu, kami to anaguruNya semo. Wali tempo i PueYesu mangansani kareba to nadonge nto Yahudi to aliran Parisi, Ia mangansani sira damasusa resi Ia. See naka Ia mampiyaika propinsi Yudea sindara-ndara pei kami to anaguruNya, pei mawolili muni njo’u propinsi Galilea apa tawa temponya Ia danasoko ntau.

2(4:1)

3(4:1)

4Wali ri raya mpalinja mami etu, taa maya taa kami liu nja’u propinsi Samaria apa etu semo pamporani i mPue Allah resi kami.

5Wali rata kami nja’u kota Sikhar nja’u Samaria etu. Kota etu taa longko yako ri tana to tempo owi Yusup puenya. I Yusup etu nawaika mpa’anya, i Yakub, tana etu. Wali i Yakub etu, ia bue ngkita tempo owi.

6Wali nja’u tana etu re’e ue to nakeke i Yakub tempo owi etu. Wali ojo karata i Yesu nja’u ria Ia matunda ri awe nu ue etu apa Ia manganga naepe ri raya mpalinjaNya. Tempo Ia matunda etu bara ntongo eo.

7Wali kami to anaguru i Yesu kami polas njo’u raya ngkota damangoli pangkoni. Pei tempo kami nja’u nja’u ria, ma’i samba’a tau we’a to Samaria ma’i ri ue etu damanombu. Wali i Yesu manganto’oka ia, “Waika Aku sangkodi ue nutombuka etu daKuinu.”

8(4:7)

9Pei tau we’a to Samaria etu manganto’o, “Korom tau Yahudi pasi aku tau Samaria, wali maka pei Korom mamporapi ue resi aku?” Naka pei ia manganto’o ewa wetu apa ipu rayanya tempo i Yesu mampogomboka ia apa tempo etu tau Yahudi sira taa maya mampogalungka tau Samaria.

10Wali i Yesu manganto’oka ia, to’oNya, “Ane nunsani ngkorom mangkonong sora to nawai i mPue Allah, pasi ane nunsani ngkorom i sema kamonsonya Aku to mamporapi ue resi korom si’i, ane ewa see, korom damamporapi resi Aku panewa Aku damangawaika korom ue to mangawai katuwu.

11Pei tau we’a etu manganto’o, “Pa’a, mayombu kojo wayau si’i panewa la’u ue, pasi Korom tare kesaa to danusangkuka ue to la’u wayau to mayombu kojo si’i. Wali yako imbare pangarata mPa’a ue to mangawai katuwu etu?

12Bue ngkita, i Yakub, tempo owi, ia semo to mangawaika kami ue si’i. Pasi ia re’e seja manginu, pasi ewa see seja ngananya pei dombanya pasi sapinya. Wali wimba, Pa’a bara mampobuuka Pa’a semo to bae wo’u anggaMu pei i Yakub etu naka pei Korom nukoto mangawaika kami ue to tao-tao wo’u pei ue to ia nangawai?”

13Wali i Yesu mangansono, Ia manganto’o, “I sema tau to manginu ue to si’i, tau etu damawali mara muni nganganya.

14Pei i sema tau to manginu ue to Aku mangawaika ia, tau etu tamo kojo damara wo’u nganganya. Apa to Aku mangawaika ia etu damawali ewa mata nu ue to kambutu-mbutu ri rayanya pei damangawaika ia katuwu to singkasaenya.”

15Wali tau we’a etu manganto’oka Ia, “Pa’a, waika aku ue etu see aku tamo damara ngangangku pasi tamo raporani sangkani ma’i rima damanombu.”

16Wali i Yesu manganto’oka ia, “Inta pei pokio rongomu pei ma’i muni.”

17Pei tau we’a etu manganto’o, “Aku tare rongongku.” Wali i Yesu manganto’oka ia, “Monso pu’u panto’o ngkorom tare rongomu.

18Pei kamonsonya korom lima ngkanimo marongo ri tempo ruyu, pasi to langkai to maroo siwaka pei korom si’i-si’i, ia si’a rongomu.

19Wali tau we’a etu manganto’o, “Pa’a, manasa resi aku Komi to pantuntu tuntu i mPue Allah apa Komi mangansani samparia mangkonong katuwungku.

20Wali see naka aku re’e to aku rani mangampotanaka resi Komi. Apa buebue mami to Samaria tempo owi, sira mampue mampakabae i Pue Allah ri tongku si’i. Pei komi to Yahudi manganto’o kota Yerusalem semo tampa to masipato ane tau mampue mampakabae i Pue Allah. Wali to imba to monso?”

21Wali i Yesu manganto’o, “Indo, aya gombongKu si’i. Apa darata temponya si’a tongku si’i pasi si’a seja Yerusalem tampa napampue ntau mampakabae i Pue Allah, Pa’a. Apa i Pue Allah, Ia nosa semo, wali Ia si’a ojo santolo nakare’e. Wali see naka kamonsonya ratamo temponya tau to monso pu’u mampue mampakabae i Pue Allah, Pa’a, tau etu nempo imbare sira, pei sira maya mampue mampakabae Ia. Apa sira mampue mampakabae Ia ri kamonsomonsonya pasi i Nosa Mapasing semo to mangansawang sira mangika palaong to etu. Wali i Pue Allah, Pa’a, Ia mangaliwu tau to ewa wetu inikanya mampue mampakabae Ia. Wali ane komi to Samaria, komi mampue mampakabae i Pue Allah, pei komi taa mangansani ewa wimba kamonsonya Ia. Pei kami to Yahudi, kami mangansani Ia to napue mami etu. Apa Ia roomo mampaponsanika kami to Yahudi yako resi kami semo dama’i to Pansompo to damangampalaes to lino.”

22(4:21)

23(4:21)

24(4:21)

25Wali ojo pangandonge ntau we’a gombo i Yesu etu ia manganto’oka i Yesu, “Aku kunsani dama’i Makole parajanji i mPue Allah, Ia to rato’oka i Kerisitu. Wali ane Ia ratamo, panewa Ia damampakanasaka resi kita mangkonong kasamporianya.”

26Wali i Yesu manganto’oka ia, “Aku to mampogomboka korom si’i, Aku semo Makole parajanji i mPue Allah.”

27Wali tempo i Yesu manganto’o gombo etu, tempo etu semo rata muni kami to anaguruNya. Kami ipu kojo raya mami mangkita Ia mampogomboka tau we’a. Pei tare pasi samba’a kami to mampotanaka resi i Yesu, manganto’o, “Kesaa liwu ngKomi resi ia?” Pasi tare to mampotanaka, “Maka pei Komi mampogomboka ia?”

28Wali tau we’a etu mampiyaika tampa nuenya pei yau njo’u raya ngkota. Rata nja’u ria ia manganto’oka tau boros, to’onya,

29“Mai, lo’a tau to re’e mangansaritaka resi aku samparia palaong to roomo inikangku. Wimba tau etu bara i Kerisitu, Makole parajanji i mPue Allah?”

30Wali tau boros etu masuwu yako ri kota pei yau mangampago i Yesu.

31Tempo sira tawa rata, tempo etu kami to anaguru i Yesu mamporapika resi Ia, kami manganto’o, “Pa’a Guru, pangkonimo ruyu.”

32Pei i Yesu manganto’oka kami, “Aku re’e pangkoni to taa nunsani ngkomi.”

33Ojo pangandonge mami to anaguru i Yesu gomboNya etu, kami masipotanaka, kami manganto’o, ‘Wimba, bara re’e tau to nama’i mangkenika Ia pangkoni?”

34Pei batuanginya gombo i Yesu etu si’a mangkonong pangkoni to biasa, mangkonong palaongiNya semo. Ia mampakarebaka resi tau mangkonong songka i mPue Allah damampalaes sira mangampake Ia, Makole parajanji i mPue Allah. Wali tempo Ia mampakarebaka sira etu, palaong etu mawali ewa pangkoni resi Ia apa mampakaroso rayaNya. Wali Ia manganto’oka kami, “Anu to ewa pangkoni to mampakaroso rayangKu etu, etu semo mangalulu pamporani mPa’angKu to nampokau Aku, pasi mampakaroo palaong to Ia mansarumakaka resi Aku.”

35Wali roo see i Yesu mangkita to Samaria to boros to mai mangampago Ia. Wali Ia manganto’oka wo’u kami to anaguruNya, “Lo’aja! Sigenamo tau damangaya kareba yako resi i Pue Allah. Wali ne’e mampeas mampakarebaka sira. Ne’e ewa tau to mangampeas temponya mamota, to manganto’o, ‘Opo mbuyawa panewa darata temponya mamota.’ Ne’e ewa wetu apa sigenamo tau boros damangaya kareba yako resi i Pue Allah. See naka sira maya raporapaka ewa nawu to matasamo pae!

36Wali si’i semo temponya mamota! Wali Aku re’e mampokau komi yau resi tau to roomo mangandonge tuntu i mPue Allah. Tau to uyunya nayau mampotundeka sira tuntu i mPue Allah raporapaka ewa tau to mamuya, pei komi mampaponsanika wo’u sira mangkonong Aku see sira damangaya. Wali palaong etu raporapaka ewa komi yau mamota nja’u nawu to si’a komi nangika. Tau to yusa to mapalaong mangika nawu etu, pei komi semo to mangarata wua mpalaong nsira etu. Wali palaong to etu singkonong kojo pei panto’o ntau to manganto’o, ‘Tau samba’a to mamuya, pasi tau to yusa to mamota.’ Wali ane tau to mamota, sira mangkenika tau pue nawu pae to rapota etu, panewa sira rawaika ntanapanya. Pasi ewa see seja komi to mampakarebaka sa’e tuntu i mPue Allah, komi ewa mangkenika i Pue Allah tau etu, wali komi darawaika seja ntanapa. Pasi tau to rapakarebaka etu pei mangaya kareba etu, tau etu damangarata katuwu to singkasaenya. Wali tau to mamuya pasi tau to mamota paka ndende kojo raya nsira sindara-ndara.” Wali etu semo gombo i Yesu resi kami to anaguruNya.

37(4:36)

38(4:36)

39Wali yako etu, boros tau Samaria yako ri kota etu to mangaya i Yesu apa saba gombo ntau we’a etu to manganto’o, “Ia re’e mangansaritaka aku samparia palaong to roomo inikangku.”

40Wali see naka ojo karata ntau Samaria etu resi i Yesu, sira mamporapika resi Ia see Ia maroo resi sira. Wali Ia maroo nja’u kota nsira etu dua mbengi kasaenya.

41Pasi tempo Ia maroo nja’u ria Ia mampotundeka sira, see naka tidugang wo’u kaborosinya tau to mangaya Ia.

42Panewa sira manganto’oka tau we’a etu, “Kami mangaya si’i-si’i, pei si’a ojo yako gombo ngkorom. Naka pei kami mangaya Ia apa kami semo re’e mangandonge anu to to’oNya. Pasi kami mangansani monso pu’u tau si’i i Kerisitu, to Pansompo nto lino.”

43Wali ojo kagananya dua mbengi, i Yesu pasi kami to anaguruNya mayoko yako ri kota etu, damawolili muni njo’u propinsi Galilea.

44Wali ojo karata mami nja’u Galilea, tau nja’u ria masanang mampobuuka i Yesu bara damangika wo’u palaong to taa rapobiasa apa seore sira re’e mangkita samparia palaong to inikaNya ndate Yerusalem tempo Roa Paskah, apa tempo etu sira ndate seja ndate ria. Pei sira taa mangaya Ia to pantuntu tuntu i mPue Allah apa Ia seja tau Galilea wali sira mampobuuka Ia ojo tau biasa semo. Wali Yesu semo to manganto’o, “Ane to pantuntu tuntu i mPue Allah, biasa taa na’angga ntau ane nja’u lipu to si iaja.”

45(4:44)

46Wali tempo i Yesu nja’u propinsi Galilea, Ia yau ri kota Kana. Nja’u ria semo Ia mangawali yau ue mawali tule anggur seore. Wali tempo i Yesu rata wo’u ri kota Kana etu, tempo etu re’e samba’a tau to bae pangkanya to maroo ri kota Kapernaum to nja’u seja nja’u propinsi Galilea etu. Ngkai etu masaki ananya to langkai. Ananya etu masaki mapari kojo, mosu damate.

47Wali ngkai etu re’e mangandonge kareba to manganto’o i Yesu rata munimo ri Galilea yako nja’u Yudea. Ojo pangandongenya kareba etu, ia yau mangampago i Yesu ri kota Kana pei mamporapika kojo resi Ia see Ia dayau mampakatao muni ananya to mosu damate etu.

48Wali i Yesu manganto’oka ngkai etu, “Maka pei tare komi to mangaya Aku ane taa mangkita ruyu palaong to taa rapobiasa to mampakaipu raya ngkomi pasi to mawali tondong resi komi?”

49Pei tau to bae pangkanya etu tiroo manganto’o, “Gete, Pa’a, anu kita yau mangampago anangku see ia taa damate!”

50Wali i Yesu manganto’oka ia, “Intamo, anamu etu matao munim.” Wali ngkai etu mansarumaka gombo i Yesu etu, see naka ia meyoko dayau muni ri lipunya.

51Yako etu, eo rao wo’u ia tiroo ri raya mpalinjanya mawolili muni lo’u lipunya etu, panewa re’e to papolaonginya to mangantomu ia, sira manganto’o, “Ana ngkomi matao munim.”

52Wali ia mampotanaka resi sira bara jam sawei ananya matao muni. Sira manganto’o, “Jam satu ntongo eo wengi ia roo muni wojo.”

53Wali tau to bae pangkanya etu mangansani pas-pas jam satu semo tempo i Yesu manganto’o, “Anamu matao munim.” See naka ia mangaya i Yesu Ia semo Makole parajanji i mPue Allah, pasi samparia tau to maroo ri raya banuanya paka mangaya seja.

54Wali palaong to taa rapobiasa to naika i Yesu tempo Ia owo rata muni yako Yudea etu, etu semo palaong to taa rapobiasa to kadua to inikaNya nja’u propinsi Galilea.


  Share Facebook  |  Share Twitter

Download Audio MP3 (Yohanes 4):
Mobile (Low Quality) - CD (High Quality)

 <<  Yohanes 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran