Dual Panel1Ge'enaka de ngoi tosano: Ma Jo'oungu ma Dutu waki'umokau? 'o Israeloka ge'ena la to 'una ma sirete 'awi 'umati? Ma raiokau ko'uwa! Ngoi ma sirete 'o Israel ma nyawa 'o Abraham 'awi waata, de 'o Benyamin 'awi sukuno.
2Ko'uwa! Ma Jo'oungu ma Dutu kowaki'umowa 'awi 'umati gee wakiirikokau ka ma si-sirakasi. 'Esa moi ngini nianako 'okia naga gee 'isilefoku 'o Buku 'Itebi-tebinoka ma ngale 'o Elia, ma 'orasi 'o Israeloka wakikalaki ma Jo'oungu ma Dutuka. 'O Elia kawongosekau,
3"Jou, 'ani nabii-nabii yakito'omakau de 'o su-suba gee 'isitede-tedene ngonaka ma ngi-ngii yatorouokau. Ka ngoiou tomatengoka de yomau 'ito'omau."
4Kokia ma Jo'oungu ma Dutu 'awi sa-sango 'o Eliaka? Ma Jo'oungu ma Dutu wosango, "Konomatengokawa. Naga yacaana tumudiingosi takitingaokau ma ngale tatapu 'isuba ngoi. 'Ona koma'iwasi yasuba 'o Ba'al ge'ena 'o pilogoti."
5Koge'enali mita ma 'orasi ne'ena, naga munukakasi ma Jo'oungu ma Dutu wakiiri-iriki. 'Una wakiiriki sababu 'awi singina ma 'ofi.
6'Una wakiiriki moteke 'awi singina ma 'ofi, so ko ma ngalewa 'ato sababu manga di-diai. Sababu nako ma Jo'oungu ma Dutu woiriki moteke 'o nyawa manga di-diai, ge'ena 'awi singina ma 'ofi ge'ena ko 'o singina ma 'ofi ma gou-gounguawau.
7So kokia? 'O Israel ma nyawa koyomadamakewa 'okia naga gee 'ona yanonu. Ka munuka duga yomadamake ge'ena la ka gee ma Jo'oungu ma Dutu wakiiri-irikokau. Gee 'iregu-regu yoodumu manga singina 'i'opinokau ma Jo'oungu ma Dutu 'awi ga-gasoika.
8Sababu naga 'o Buku 'Itebi-tebinoka 'isilefoku konee, "Ma Jo'oungu ma Dutu wodiai to 'ona manga singina de manga di-dibangi 'ipupuka, de sigado ma 'orasi ne'ena manga ako koyosimakewa de manga ngauku koyosi'isenuwa."
9'O Dautu wongose mita, "Tanu to 'ona manga rame ma ngale yomangodomo 'imadadi 'o gorosau, so yotorouoka matero ka 'o haewani 'o modoi yaliko bolo 'o guruuku 'iotaka!
10Tanu to 'ona manga ako 'itarusu la koyomasimakewa, de tanu 'ona manga gina 'itubuso la yosangisara kaisi'ado-'adonika."
11Ngoi tosanoli: 'Ato 'o Yahudioka yotorouoka sababu yootaka 'o sowonuku? Ma gou-goungu ko'uwa. Duga 'ona koyosingounuwa so ko 'o Yahudiokawa gee yamake 'o laha. So 'o Yahudioka yotaleana 'o nyawa 'ireguka go'ona.
12Sababu 'o Yahudi ma nyawa yosowonokau de koyodomotekuwa ma Jo'oungu ma Dutu 'awi mau, so 'o nyawa 'iregu-regu 'o duniaka ma Jo'oungu ma Dutu wakisibarakati. De nako 'o Yahudi ma nyawa de ma Jo'oungu ma Dutu yomarimoioli, ma raiokau 'o co-catu 'ifoloiosi 'iamoko ma Jo'oungu ma Dutuno.
13Ma 'orasi ne'ena ngoi tomau tobicara nginika 'Esa moi gee ko 'o Yahudiokawa! Ngoi ne'ena 'o su-suloko ma ngale tinileleani ngini gee ko 'o Yahudiokawa. Sigado ne'ena ngoi posironga tahoromatioka 'ai manarama.
14Ngoi tongano-nganonou de 'ai manarama ne'ena ngoi 'idadi todiai to ngoi ma sirete 'ai nyawa yotaleana, de ma ngekomo ge'ena, 'onaka naga munuka 'idadi yakisilaha.
15Sababu 'ona ma Jo'oungu ma Dutu wakiitomo, so 'o nyawa 'o duniaka yomarimoioli de ma Jo'oungu ma Dutu. 'Ifoloiosi nako 'ona ma Jo'oungu ma Dutu wakidawongo, ma raiokau ge'ena kaimatero de 'o nyawa yosongenukou de yomomikoli!
16Sababu ma Jo'oungu ma Dutu wakiirikokau nanga edete de nanga dotumu so manga waatuku mita wakiirikokau. 'Isoka 'isi-'ade-'ade 'o roti 'o ngai moi gee 'isira-sira yasakai la yokulakau ma Jo'oungu ma Dutuka, ge'ena ma ngale ma roti koisa-sakaiwasi 'iodumu ge'ena mita to ma Jo'oungu ma Dutu. De nako 'o gota ma ngutuku la yosarakaniokau ma Jo'oungu ma Dutuka, ge'ena ma ngale ma sago-sago 'iodumu ge'ena to ma Jo'oungu ma Dutu mita.
17'O Yahudioka 'ona yakisi'ade-'ade 'isoka 'o gota 'o zaitun gee 'o nyawa yapa-paliara ma sago-sago. Ma sago-sago ge'ena munuka yaorangokau, ma sago-sago ma rioka ge'ena yositagalika 'o zaitun ma gota gee 'o nyawa koyapa-paliarawa ma sago-sago la 'i'ahu. Ngini ko 'o Yahudiokawa nisi'ade-'ade 'isoka 'o zaitun ma gota gee 'o nyawa koyapa-paliarawa ma sago-sago. Ngini nisitagalika 'o zaitun ma gou-goungu ma roesoka so ne'ena ngini niamake 'okia sonaa yaowa-owa 'o Yahudi ma nyawano, 'isoka 'o zaitun gee 'o nyawa koyapa-paliarawa ma sago-sago 'isitagalika 'o zaitun ma gou-goungu ma roesoka so 'imadamake ma 'inomo ge'enano.
18So ngini koidadiwa nimamaoku ngini niodaduie de 'o Yahudioka gee ma Jo'oungu ma Dutu wakiitomo 'isoka 'o zaitun ma sago yaora-oranga. Ka ma eta ma koya'akunuwa ngini nimaie, ngini ge'ena 'isoka 'o gotali tanu ka ma sago. Niongano-nganono ko ma sagowa yatowo ma ngutuku, ma 'ena ma ngutuku yatowo ma sago-sago.
19Poilia naga nginioka moikani yongose, "Ma Jo'oungu ma Dutu wakiitomo 'o Yahudioka ma ngale midawongo ngomi ko 'o Yahudiokawa, 'isoka 'o gota ma sago yaoranga la ngomi 'idadi misitagali ma rioka!"
20Ge'ena yadaene. Ma 'ona yaki'umo sababu 'ona koyongakuwa ma Kristusika, 'ena ngini 'Esa moi nidawongo sababu niongaku. So 'uwa nimaie sababu ngini nidawongo; yaowa ngini salingou niamao nimodongo.
21Sababu nako ma Jo'oungu ma Dutu kowakisinginawa waki'umo 'o Yahudioka gee yakisi'ade-'ade 'isoka 'o zaitun ma gou-goungu ma sago-sago, 'uwa niongose 'una winisingina wini'umo ngini!
22So ne'enaka ngone pamake ma Jo'oungu ma Dutu 'awi singina yaowa ma sala de mita wi guatoka. 'Una wakikuata gee yosowo-sowonika, ma winisimara'ai nginika 'Esa moi, 'itilai ngini tatapu nio'ahu 'awi singina ma sure ma sigoronaka. Nako ko'uwa ge'ena ngini mita 'asa ni'umo.
23De ma ngale 'o Yahudioka ma nyawa go'ona, nako 'ona yomaogoro manga cara gee koyongaku-ngakuwa, ge'ena 'ona 'asa wakidawongoli. Sababu ma Jo'oungu ma Dutu wokuasa ma ngale wakidawongoli.
24Ngini 'Esa moi gee 'ania 'asali ko 'o Yahudinowa ge'ena 'isi'ade-'ade 'isoka 'o zaitun gee 'o nyawa koyapa-paliarawa ma sago-sago gee ya'oguokau. Nako ngini kaidadi nio'ahu nisitagalika 'o zaitun ma dutuoka, ge'ena 'o Yahudioka gee yakisi'ade-'ade 'o zaitun ma dutu ma sago-sago, 'onasi 'ifoloi 'igapangi ma ngale ma Jo'oungu ma Dutu wakisigilio to 'ona ma sirete manga 'asalika matero ka 'o zaitun ma dutu gee ma sago-sago yaorangokau de yosigilioli la 'i'ahu.
25'Esa moi riaka dodoto ka 'o ngo-ngaku moi! Ngoi tomau ngini 'uwa nima-maoku 'ato ngini nianakokau 'o sagala moi-moi. Sababu naga 'o ngai moi gee ma Jo'oungu ma Dutu womau-mau ma 'o nyawa koyanakowasi, de ngoi tomau ngini nianako. Ge'ena la: 'O Yahudioka munuka yoma'opini, ma 'ona yoma'opini koisi'ado-'adonikawa. Ka gee ko 'o Yahudiokawa yoboa ma Jo'oungu ma Dutuka ma no-noimi 'itotomoka, de ma Yahudioka koyoma'opinuawau.
26Koge'enau so dua 'o Yahudioka ma nyawa yoodumu 'asa yakisilaha. Sababu 'o Buku 'Itebi-tebinoka 'isilefoku konee, "Ma Koana 'o Nyawa Wosilaha-laha 'awi 'asali 'o Sionino 'asa woboa. 'Una 'asa waisanga 'o sagala 'ito-torou 'o Yakub 'awi waatino yadi-diai.
27Kone'enau to ngoi 'ai jaji 'onaka ma 'orasi taisanga to 'ona manga sagala sowono."
28Sababu 'o Yahudi ma nyawa yooluku yadawongo 'o Habari ma Owa ma Jo'oungu ma Dutuno, so 'ona yodadi ma Jo'oungu ma Dutu 'awi saturuu; de ge'ena 'imadadi to ngini 'Esa moi ko 'o Yahudiokawa 'ania laha. Duga 'o Yahudioka 'ona ge'ena ma Jo'oungu ma Dutu 'awi 'umati ngano manga edete de manga dotumu wakiirikokau. So 'o Yahudi ma nyawa-nyawa ma Jo'oungu ma Dutu tatapu wakisibosono.
29Sababu nako ma Jo'oungu ma Dutu wakiiriki de wakico-catu 'o nyawa go'ona, ge'ena kowangali-ngaliwa 'okia naga gee wadiaiokau.
30Ma sira ngini ko 'o Yahudiokawa koniosingounuwa ma Jo'oungu ma Dutuka. Ma gee 'o Yahudioka koyosingounuwa, de ngini ma Jo'oungu ma Dutu winisipidilokau 'ania sowonoka.
31Koge'enali mita 'o Yahudioka ma nyawa-nyawa go'ona. Ma 'orasi ne'ena 'ona koyosingounuwa ma Jo'oungu ma Dutuka, la ngini nisipidili 'ania sowonoka, ma 'ona mita 'asa yakisipidili manga sowonoka.
32'O nyawa 'iodumu koyosingounuwa ma Jo'oungu ma Dutuka, de ma Jo'oungu ma Dutu wosidamadaka koge'ena la 'idadi wosidumutu 'awi dora 'ona yoodumika.
33Tei, ma Jo'oungu ma Dutu posironga wokoragoka. De posironga wocawaroka de wosikanako ma sala 'okia sonaa moi-moi. Komoiwa ya'akunu yalega ma diai 'awi sagala butusangi, de komoiwa ya'akunu yasahe 'awi jako womanarama.
34'O Buku 'Itebi-tebinoka 'isilefoku konee, "Komoiwa yanako ma Jou 'awi di-dibangi! De komoiwa ya'akunu widongose 'unaka!
35Komoiwa 'o kianikia yokula ma Jouka, sigado salingou 'unali wokula 'onaka!"
36Sababu ma Jo'oungu ma Dutu wodiai 'okia sonaa moi-moi. 'Iodumu ge'ena 'una wapareta, de ge'ena ma dumutu ma ngale wisiarene 'una. Powisitedene ma Jo'oungu ma Dutu kaisi'ado-'adonika! 'Amin. Koge'enau.