Alkitab Mobile SABDA
[VER] : [TABARU]     [PL]  [PB] 
 <<  Yakobus 4 >> 

1'Ido'oa so niomakatutuku de niomakangamo? Ge'ena ma sababu 'ania nyafisuu gee koimaogo-ogoruwa 'ikudoti nia singina ma dodaka, ma ngale 'imau niamake 'o dunia ma sanangi.

2Ngini nionyafisuu 'o kianikia ma konimadamakewa so nioto'oma. Ngini niotaleana ma konimadagakunuwa 'okia naga nianonu-nonu ge'ena, so nimakatutuku de nimakangamo. Ngini kokiawa nimadamake sababu konimalahidoawa ma Jo'oungu ma Dutuka.

3De ngaro nimalahidoakau ma konimadamakewa, sababu nia ga-ga'asoko ge'ena ma dumutu 'isowono. 'Okia naga nioga'asoko ge'ena duga ka ngini ma sirete nimasisanangi.

4Ngini ge'ena nia singina ko de ma gounguwa winimoteke ma Jo'oungu ma Dutu matero ka 'o ngeweka mimoi 'ami ako 'ikudai. Ngini nianakokau 'ato nako niogiamanai de 'o dunia ge'ena kaimatero de winimusu ma Jo'oungu ma Dutu. So nago'ona yomau yogiamanai de 'o dunia ne'ena, 'ona yomadiai ma Jo'oungu ma Dutu 'awi musu.

5'Uwa niongose 'ato 'o Buku 'Itebi-tebinoka kaisisomoa 'ingose 'ato, "Ma Jo'oungu ma Dutu wonakulakau 'o ngomasa gee ma nyafisuu 'ikua-kuata."

6Ngaro koge'ena ma ma Jo'oungu ma Dutu 'awi simara'ai ngoneno 'ifoloi 'ikuata de to ngone nanga nyafisuu. Ge'enau so ma Jo'oungu ma Dutu 'awi bukuoka 'isilefoku mita, "Ma Jo'oungu ma Dutu wakidu'uduku 'o nyawa manga singina 'ikuru-kurutie, ma wakisimara'ai gee manga singina 'iti-tipokoku."

7Sababu ge'ena salingou winisigisene ma Jo'oungu ma Dutu de nialawani 'o Tokata ma Koana, la 'ena 'asa 'iowara nginioka.

8Nimasisori ma Jo'oungu ma Dutuka la 'una mita 'asa womasisori nginika. Nia 'ahu niatebinika ma ngale niamada 'o dorou, ngini gee niosowo-sowono! De nia singina niatebinika gee nia singina 'ikapula-pula!

9Ngini salingou ma gou-goungu nimatoduba niosigari-gari. So tanu nia giete 'imadadi 'o gari, de nia morene 'imadadi 'o balisa!

10Nimasidaduuku ma Jo'oungu ma Dutu wi bionoka, la 'una 'asa winigoraka.

11'Esa moi, riaka dodoto, 'uwa nimasikagurubungu moi de moi. Nago'ona yosigu-gurubungu de yakisisala-sala manga 'esa moi, 'ona ge'ena yosito-torou de yosisowono ma Jo'oungu ma Dutu 'awi besesongo. Ge'ena ma ngale 'ona koyamotekuwa 'o besesongo ge'ena, ma 'ena yodadi ma hakimi.

12Momongo kawomatengoka duga 'o hakimi de 'o besesongo wodi-diai, ge'ena la ma Jo'oungu ma Dutu, gee wa'akunu wonariwo wonasilaha bolo wonasotumu. So ge'ena ma ngale ngini koya'akunuwa 'o nyawa niakisisala-sala.

13Nio'isenika ngini gee niongose 'ato, "Ne'ena ma wange bolo wangede dua miotagi nee ma kotaka de miogogere ge'enaka miomanarama 'o taunu moi miomawukunu la 'o pipi miomadamake."

14Momongo ngini koniosidongoowa 'okia dua 'idadi wangede 'ania 'ahu ma sigoronaka. Ngini ge'ena 'isoka 'o 'uku ma dowo so ka 'o 'orasi moioka 'ena 'iisangokau.

15'Ena salingou ngini niongose konee, "Nako ma Jo'oungu ma Dutu wosimoteke, ngomi 'asa mio'ahu de miodiai koneda de konee."

16Ma gee ngini niadi-diai ma 'orasi ne'ena, ge'ena kanimadaduie ngano nimaie. Nimadaduie koge'ena ge'ena ka 'o dorou.

17So 'o nyawa gee yanakokau 'okia naga yaowa-owa gee salingou yadiai ma koyadiaiwa, ge'ena yosowono.


  Share Facebook  |  Share Twitter

Download Audio MP3 (Yakobus 4):
Mobile (Low Quality) - CD (High Quality)

 <<  Yakobus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel