Dual PanelI. Pangkalungunhon ni si Daud pajongjongkon sada joro Debata 1-10. II. Bagabaga ni Debata tu si Daud 11-18.
1Ende hananangkok. (I.) Sai ingot ma, ale Jahowa, di si Daud sude angka parniahapanna!
2Na marmangmang i ibana tu Jahowa, marbagabagahon tu Sipargogoi Jakkob:
3Molo tung bongotanku undungundung ni bagashu, molo tung panaehonku podoman hapeahanku.
4Molo tung loasonku tarnono matangku manang tung podompodom bolak langkop ni matangku.
5Paima jumpang ahu sada ojahan di Jahowa, sada inganan di Sipargogoi Jakkob.
6Ida ma, nunga itabege barita ni poti parpadanan di Eprata, nunga jumpang hita di ladang ni si Jaar.
7Antong itabongoti ma angka ingananna i, marsomba ma hita tu jolo ni sidegedegean ni totna!
8Hehe ma Ho, ale Jahowa, mandapothon paradiananmu, Ho dohot poti hamuliaonmu!
9Sai marpangkean hatigoran ma angka malimmi jala marolopolop angka na niasianmu.
10Ala ni si Daud, naposomi, unang tulakkon bohi ni na miniahanmu!
11(II.) Nunga pola diuarihon Jahowa hasintongan tu si Daud, ndang tagamon ubaonna: Sian pinomparmi do pabangkitonku di ho nampuna habangsa i.
12Molo tung diradoti angka anakmu padan na hubahen i, dohot panindangionku na huajarhon tu nasida, anaknasida pe sai hundul do di habangsam ro di salelenglelengna.
13Ai nunga dipillit Jahowa Sion, dipangido rohana naeng maringanan disi.
14On do paradiananku ro di salelenglelengna, dison do Ahu naeng maringan, ai hasudungan ni rohangku do i.
15Sai pasupasuonku do bohalna i, pamahaponku do angka na pogosna i mangan roti.
16Jala bahenonku do angka malimna i marpangkean hatuaon, jala ingkon mariaia do angka na niasianna i.
17Patimbulonku ma disi sada tanduk di si Daud, paradehon sada palito di na miniahanku na miniahan.
18Bahenonku ma ianggo angka musuna marulos haurahon, alai marlinanglinang ma ianggo di uluna tumpalna i.