Dual PanelI. Sosososo mandokkon marhanalomhon Debata 2-9. II. Lumbalumba mangorai marhaposan tu jolma dohot tu na so marnosan 10-13
1Ende sian si Daud.
2(I.) Tu Debata sambing do marhuraja rohangku, sian Ibana ro hatuaonku.
3Holan Ibana do partanobatoanku dohot hatuaonku, haporusanku ndang pola sadia humordit ahu.
4Sadia leleng on do hamu martahop dompak sada baoa, tung luhut hamu naeng mangarumpakkon ibana songon dorpi ni jomba, songon parik na matompas?
5Sai martuptup i nasida naeng mangonjarhon ibana sian hatimbulonna i, mangapian di gabus, mamasumasu ia pamanganna, hape mamburai do ianggo rohanasida di bagasan. Sela!
6Holan tu Debata ma ho marhuraja, ale tondingki, ai sian Ibana ro sihirimonku.
7Holan Ibana do partanobatoanku dohot hatuaonku, haporusanku, ndang tagamon humordit ahu.
8Guru di Debata do hatuaonku dohot hamuliaonku, partanobatoan ni hagogoonku, marhaposan tu Debata do ahu.
9Sai marhaposan tu Ibana ma tongtong nang hamu, ale dongan jolma! Usehon hamu ma rohamuna tu jolona, Debata do haposanta. Sela!
10(II.) Hosa sambing do ianggo jolma manisia, gabus do anak ni baoa nang nasangap, mungkal tu ginjang di bagasan timbangan, sian hosa do nasida luhutna.
11Unang ma pangasahon hamu pangarupaon, jala unang haginjangkon hamu na nidobo, unang ma mangapian rohamuna di gandaganda ni sinamot.
12Sahali do mangkuling Debata, dua hali do i hubege: Saguru di Debata do hagogoon. (62-13) Jala gok di Ho do, ale Tuhan, asi ni roha, ai dibaloshon Ho do tu ganup jolma hombar tu pambahenanna.