Dual PanelI. Tangiang mangido parpintoran, maradophon pangalele 2-10. II. Nalom ni roha mangasahon Debata 11-18
1Ende sian si Daud, na niendehonna tu Jahowa, ala ni hatahata ni si Kus, marga Benjamin i.
2(I.) Ale Jahowa, Debatangku, marhaposan tu Ho do ahu, tumpahi ma ahu maradophon sude angka na mangalele ahu, jala palua ahu!
3Asa unang disoro hosangku, songon panoro ni singa, jala diparsurage, soada na paluahon.
4Ale Jahowa, Debatangku, molo tung hubahen angka indi on: Molo tung hajahatan diulahon tanganku.
5Molo tung hubahen na roa tu angka alealengku jala hupupusi na manosak ahu, soada alana:
6Sai dilutlut musu i ma hosangku, jala dapotsa, diluntakluntak ma dohot ngolungku tu tano, jala margulu di orbuk hamuliaonku dibahen. Sela.
7Hehe ma Ho, ale Jahowa, di bagasan rimasmu! Borhat ma Ho mangalo roharoha ni angka na manosak ahu, jala dungo ma Ho mandapothon ahu, ai Ho do umpatik uhum.
8Sai dihaliangi luhutan ni angka bangso ma Ho sogot jala sian atasnasida ma Ho mulak tu ginjang.
9Jahowa do manguhum angka bangso; sai luluhon ahu, ale Jahowa, hombar tu hatigoranku dohot halidangon ni rohangku di bagasan.
10Aut mansohot ma nian hajahaton ni angka parjahat! Sai pargogoi ma na tigor roha i! Ai Ho do sidodo roha dohot pia, bonar do Debata.
11(II.) Mangasahon Debata do lombulombungku, Ibana do manumpahi angka na tigor roha i.
12Panguhum na tigor do Debata, jala mangalumbai do Ibana ganup ari.
13Molo so muba rohaniba, garutonna ma podangna, sintahonna ma dohot siorna manuju.
14Angka pangalo hamatean do ditujuhon dompak iba, mantat api do angka sumbiana i dibahen.
15Ida ma! Dirianrianhon rohana do hajahaton; gabe dapotan hamagoan ibana, jala ditubuhon sipaotooto.
16Dihali do sada godung jala bagas dibahen, hape laos ibana sandiri madabu tu godung, na binahenna i.
17Mulak tu uluna do hamagoanna i, jala songgop tu pakpak ni uluna do hajahatonna i. (7-18) Pujionku do Jahowa hombar tu hatigoranna i, jala endehononku do Jahowa Natumimbul i.