Dual PanelI. Panunggulion di roha mamuji Debata marningot angka pambahenanna 2-9. II. Dohot marningot angka panoguna di manisia 10-16
1Ende di ari Sabbat.
2(I.) Na denggan situtu do na mamuji Jahowa dohot mangendehon goarmu, ale Natumimbul!
3Mamaritahon asi ni roham manogotna i dohot hasintonganmi bornginna i.
4Mardongan uninguningan sisampulutali dohot sisampuluduatali dohot hasapi.
5Ai nunga dipalas Ho rohangku, ale Jahowa, marhitehite angka pambahenanmu, marolopolop do ahu mida angka jadijadian ni tanganmu.
6Tung na balga do angka jadijadianmu, ale Jahowa, bagas situtu do angka pingkiranmu.
7Ianggo baoa na bodo ndang mananda disi, jala na oto ndang marateatehonsa.
8Lam martumbur pe angka parjahat songon duhutduhut, jala marbunga pe sude angka siulahon hajahaton, asa siaphononhon do nasida salelenglelengna.
9Alai anggo Ho, ale Jahowa, timbul do ro di salelenglelengna!
10(II.) Ai ida ma, angka musum, ale Jahowa! Ai ida ma, sai na siap do sogot angka musum sai na marserak do sude angka siulahon hajahaton.
11Alai dipatimbo Ho do tandukku songon tanduk ni sada rango, nunga dimiahi ahu dohot miak na lambok.
12Jala sombu do roha ni matangku marnida angka na mangonggop ahu, lomo do roha ni pinggolhu mananginangi barita ni angka na jungkat roha mangalo ahu.
13Ianggo partigor i, sai na martumbur do songon harambir, songon sada hau Ares di Libanon do ibana martunas.
14Angka na sinuan di bagasan bagas joro ni Jahowa, marbunga do nasida di bagasan angka alaman ni Debatanta.
15Sai marpinompari dope nasida, nang dung ubanon, marmiak jala rata do nasida. (92-16) Mamaritahon, paboa na tigor do Jahowa, partanobatoanki, jala ndang adong hageduhon di bagasan Ibana.