Dual PanelBungkaran kada: salama’na rasulu’
1Iate sura’ lu dio mai Paulus, tu ditambai mendadi rasulu’Na Kristus Yesu tete dio pa’poraianNa Puang Matua, sia dio mai siulu’ta Sostenes,
2diparampo lako kombonganNa Puang Matua dio Korintus, lako mintu’ tu to dipamaindan tete dio Kristus Yesu, tu ditambai mendadi to masero sola mintu’ to ussa’bu’ sanganNa Puangta Yesu Kristus dio lu mintu’ inan, tu naninna sia taninna.
3Narampoimorokomi kamaturu-turuan sia kamarampasan dio mai Puang Matua Ambe’ta sia Puang Yesu Kristus.
Pa’kurre sumanga’
4Tang torena’ ma’kurre sumanga’ langngan Puang Matua belanna kamu diona kamaturu-turuanNa Puang Matua Napa’kamasean lako kalemi lan Kristus Yesu,
5kumua tete diori Kalena ammi dipasugi’ dio mintu’na la diona kada, la diona kapaissanan;
6susitu dikatottonginna tu diona Kristus dipamanassamo lan penaammi.
7Naurunganni tae’ mikakurangan len pa’kamase, ke marassankomi umpeagi kapayananNa Puangta Yesu Kristus.
8Ia dukamo la umpabatta’komi sae lako ma’katampakanna, naurunganni tae’ sayuammi to ke alloNa Puangta Yesu Kristus.
9Iatu Puang Matua maruru’, tu mangka untambaikomi tama kasiturusammi AnakNa, tu Yesu Kristus, Puangta.
Pa’pakilalanna rasulu’ diona ba’tu pira-pira kasisakkan lan kombongan
10E kamu siulu’ku, ussa’bu’na’ sanganNa Puangta Yesu Kristus, umpakilalakomi, dikua ammi sanginaa sola nasang sia da misisarangnga’ bang, sangadinna la manda’komi lan kasiturusan umpamisa penaa sia misa pa’tangngaran.
11Belanna, e kamu siulu’ku, naparampoammo’ to lan banuanna Kloë tu diona kamu, kumua den kasisakkammi.
12Ia napatu te kadangku, tu pantan ma’kadakomi kumua: Aku te menturu’ diona’ aku Paulus, aku te menturu’ diona’ aku Apolos, aku te menturu’ diona’ aku Kefas, aku te menturu’ diona’ aku Kristus.
13Titaa-taaraka tu Kristus? Paulusraka dia’ta’ belanna kamu? Ba’tu tamaraka sanganna Paulus dinii undio’komi?
14Ma’kurre sumanga’na’, tu tae’ siapakomi misa’ kudio’, sangadinna Krispus sola Gayus,
15den manii misa’ tau ma’kada kumua mangkamokomi didio’ tama sangangku.
16Mangka dukamo’ undio’ to lan banuanna Stefanus, na iatu senga’na na iato tae’mo kuissan ba’tu la denpi tu kudio’.
17Belanna tae’ Nasuana’ Kristus la ma’dio’, sangadinna la umpa’peissanan Kareba-kaparannuan, tangia diona kada mammi’ ullisa’i kamanarangan lino, kumua da’ anna torro sala tu pea’ta’Na Kristus.
KakinaanNa Puang Matua na kakinaanna lino
18Belanna iatu pangadaran diona pea’ta’, nasanga pa’popetaa to lu lako kasanggangan; apa iake kita lu lakona kamakarimmanan iamo kuasanNa Puang Matua.
19Belanna den disura’ nakua: La Kuroto’i tu kakinaanna to kinaa, sia la Kuputtai tu kamanaranganna to manarang.
20Naumbamira tu to manarang? Umbamira tu pandita Sura’? Umbamira tu to umpelalan bang apa dadi lan te attu iate? Tae’raka Napopendadii Puang Matua pa’popetaa tu kakinaanna te lino?
21Apa belanna diona kakinaanna kalena te lino anna tang untandai tu Puang Matua lan kakinaanNa, iamoto anna iatu pa’poraianNa Puang Matua la ungkarimmanni tu to ma’patongan tete dio tu pa’popetaana pangadaran iato.
22Tu belanna to Yahudi napalaku la dipakitan tanda kalle-kallean sia to Yunani undaka’ kakinaan,
23anna iate kita te umpa’peissanangki’ Kristus dia’ta’, tu napomatana’ to Yahudi sia misa’ pa’popetaa lako to kapere’,
24apa lako to ditambai, la to Yahudi la to Yunani, iatu Kristus, iamo kuasanNa Puang Matua sia kakinaanNa Puang Matua.
25Belanna iatu pa’popetaaNa Puang Matua ondong ia kinaanna na to lino; sia iatu kalanggaranNa Puang Matua ondong ia mawatangna na tolino.
26Tiro bangmi, e kamu siulu’ku, tu diona kamu tommi ditambai, kumua tae’ra mibuda paissan, ke pentiro lino, sia tae’ mibuda to paa sia tae’ mibuda to kapua;
27apa iatu dipetaainna lan te lino Napilei Puang Matua, kumua anNa pakasiri’i tu to kinaa, sia langga’na lan te lino Napilei Puang Matua, kumua anNa pakasiri’i tu mawatangna,
28sia iatu bongkona lan te lino sia iatu tang dibilangna Napilei Puang Matua, ontongpi tu tang keangga’na, kumua Naputtai tu keangga’na,
29kumua da naden misa’ tau ussattuan kalena dio oloNa Puang Matua.
30Apa bannang dio mai Puang Matua ammi lan Kristus, tu mendadi kakinaan tapokinaa dio mai Puang Matua sia kamaloloan sia kadiseroian sia kadila’bakan;
31kumua anna susitu disura’na, nakua: Minda-minda tu massattuan, la massattuan tete dio Puang.