Dual PanelPa’pakilala untoyangan kale dio mai kasalan
1Belanna mangkamo umperasai kamaparrisan tu Kristus unnala a’gan tolino, la sipatukomi umpoparea lalan inaa ia dukato, kumua minda-minda umperasai kamaparrisan diona a’gan batang kale, dilendokammo dio mai kasalan,
2dikua anna lan mintu’ angge tuomipa, da mituru’ mintu’ kamailuan a’gan tolino, sangadinna pa’poraianNa Puang Matua.
3Belanna silasamo tu attu lendu’ minii mangka umpogau’i tu pa’poraian to kapere’, umpogau’ passulo bongi, kamailuan, malango, ma’dadu tambuk, tang ussanda mangiru’, menomba sanda kadake lako deata.
4Lan tu iannato mangnga untangnga’komi, kumua tae’ ammi turu’ sisola tau iato mai rokko liku tang penggauran ia dukato, naurunganni umpalele bekokomi;
5apa inang la napebalii lako Puang undinna, tu tumaya la umpaolai salunna la to tuo la to mate.
6Belanna iamora patunna to anna dipa’peissanan duka lako to matemo tu Kareba-kaparannuan, dikua anna dipaolai salunna tu tau iato mai situru’ a’gan tolino lan batang kalena, apa tuo lu lako Puang Matua unturu’ a’gan mempenaa.
Pa’pakilala la matangkin-tangkin, belanna mandappi’mo tu katappuranna lino
7Apa iatu ma’katampakanna mintu’ apa mandappi’mo, iamoto la matangkinkomi sia mainga’ lan passambayangmi.
8Iatu ma’iringanna tongan la siala masekomi, belanna iatu kasiala-masean ussamboi kasalan makamban.
9Sipatukomi sikendek-kendekan tang naturu’ ma’nuku-nuku.
10La sikamayangkomi sitinayanna pa’kamase dio kale simisa’-misa’mi, susito mangringki mapato tu dipaingko’i ma’rupa-rupa pa’kamaseanNa Puang Matua.
11Iake den tau ma’ulelean, sipatu ma’ulelean susito umpokada kadanNa Puang Matua; iake den tau ungkamayai solana, sipatu naturu’ tu kamatotoran Nakamaseanni Puang Matua; anna dipakala’bi’ tu Puang Matua lan mintu’na tete dio Yesu Kristus; lu lako Kalena tu kamala’biran sia kapaan tontong sae lakona. Amin.
Pa’pakilala la bantang ma’patari lan kamaparrisan belanna Kristus, dikua anna diappa’ tu kamala’biran
12E pa’kaboro’ku, da mikamangngai tu kadipakario-rioan maparrang tu rampo ussudikomi, butung misa’ apa makalaen-laen urruakomi,
13sangadinna la parannukomi sitinaya kataanammi lan kamaparrisanNa Kristus; dikua ke attunnami sombo tu kamala’biranNa la parannukomi sia sende paiman.
14Iake ditellekomi belanna sanganNa Kristus, maupa’komi, apa Natorroikomi tu Penaa kamala’biran, iamotu PenaanNa Puang Matua untorroikomi.
15Iamoto, da miden misa’ umperasai kamaparrisan butung to papatean ba’tu to boko ba’tu misa’ to kadake, ba’tu to umpentamai sara’na to senga’;
16apa iake denni misa’ narua kamaparrisan belanna Sarani, da anna masiri’, sangadinna iatu sanga iato la napakala’biran Puang Matua.
17Belanna nalambi’mo attunna tu to lan banuanNa Puang Matua randuk dipaolai salunna, apa iake kita te tu nanii randuk, apara katampakanna tu mintu’ to tang unturu’ Kareba-kaparannuanNa Puang Matua?
18Sia iake maparri’i tu to malambu’ unnappa’ kamakarimmanan, naumbara la nanii mennolo tu to tang mekaaluk sia to kadake?
19Iamoto sipatu tu mintu’ to umperasai kamaparrisan situru’ pa’poraianNa Puang Matua ussorong penaanna lako To tumampa maruru’, anna pogau’ kamalamburan.