Alkitab Mobile SABDA
[VER] : [TORAJA]     [PL]  [PB] 
 <<  1 Raja-raja 4 >> 

Diona to diala pareanna sia to marayanna Salomo

1Iatu datu Salomo umparenta lili’na mintu’ Israel.

2Inde sia tu mintu’ to diala parea dio kalena: Azarya, anakna Zadok, tu to minaa,

3Elihoref sia Ahia anakna Sisa, pangulu to massura’; na Yosafat, anakna Ahilud tu pa’paelean,

4na Benaya, anakna Yoyada, tu kamandang lompo; na Zadok sola Abyatar to minaa;

5Azarya, anakna Natan, pangulu to maraya; na Zabut, anakna Natan, misa’i to minaa, tu sangmanena datu;

6na Ahisar tu pangulu sandan uainna datu, sia Adoniram, anakna Abda, kapalana to umpasirundunan pa’diaman lompo.

7Sia den dukato marayanna Salomo sangpulo dua lan mintu’ lili’na Israel tu la umpoissan kandena datu sia tongkonan layukna; sisangbulan lan sangtaun la untu’gun kandena datu.

8Inde sia tu sanganna, iamotu: Ben-Hur dao buntu Efraim;

9na Ben-Deker, dio Makas sia dio Saalbim,

10sia dio Bet-Semes sia dio Elon-Bet-Hanan; na Ben-Hesed dio Arubot, naparenta dukapa Sokho sia mintu’ lili’na padang Hefer;

11na Ben-Abinadab umparenta Dor tu mentanetena, iamoto tu umpobaine Tafat, anakna Salomo;

12na Baana, anakna Ahilud umparenta Taanakh sia Megido sia mintu’ lili’na Bet-Sean, dio sa’dena Sartan, rokkona Yizreel, randuk dio mai Bet-Sean sae lako Abel-Mehola, tu’tun dio lakona Yokmeam;

13na Ben-Geber dio Ramot dio Gilead, tu umparenta mintu’ tondokna Yair, anakna Manasye dio Gilead sia mintu’ lili’na Argob dio Basan, annanpulona kota kapua tu dirinding tembo’ sia disalli’ tambaga;

14na Ahinadab, anakna Ido, dio Mahanaim,

15na Ahimaas dio Naftali; ia duka umpobaine anakna Salomo, disanga Basmat;

16na Baana, anakna Husai, dio Asyer sia Alot;

17na Yosafat, anakna Paruah dio Isakhar,

18na Simei, anakna Ela, dio Benyamin;

19na Geber, anakna Uri, dio lili’na Gilead, parentana Sihon, datu to Amori, sia Og, datu Basan, sia ia manna to maraya dio tondok iato.

20Iatu bilangan to Israel sia to Yehuda susi karangan dio biring tasik budanna; iatu tau iato mai kumande sia mangiru’ sia parannu-rannu.

Kataromposanna Salomo

21Iatu datu Salomo umparenta mintu’ kadatuan randuk dio mai salu Efrat sae lako tondok to Filistin, landa’ lako lili’na Mesir; iatu tau iato mai ma’kasian sia mengkaola lako Salomo lan mintu’ allo katuoanna.

22Iatu kandena Salomo lan sangallo den tallungpulo koro’ ta’pung manissang na annan pulona koro’ ta’pung.

23Sangpulo sapi malompo, duangpulo sapi dikambi’, saratu’ domba, senga’pa tu mintu’ donga sia kijang sia anuang sia angsa malompo.

24Belanna naparenta datu tu mintu’ lili’ indena mai salu Efrat, randuk dio mai Tifsah sae lako Gaza, iamotu mintu’ datu indena mai Salu, anna marampa’ tu datu tiku lao.

25Mintu’na to Yehuda sia to Israel, torro tang nairi’ angin diong to’ garonto’ anggoro’na sia garonto’ arana randuk dio mai Dan sae lako Bersyeba, angge tuona datu Salomo.

26Den duka naampui Salomo tu barung nanii patangpulo sa’bunna darang urriu’ karetana datu sia sangpulo dua sa’bu pakkanarang.

27Sia mintu’ to maraya, ke nalambi’oi tu bulanna, umpasakkaran kandena datu sia mintu’ to untarima kande dio mai datu Salomo, naurunganni tae’ misa’ naerean.

28Sia dalle sisikan sia dalame tu diben darang pangriu’ sia darang malinta’ dibaa lako inan dipamanassamo, pantan unturu’ apa dipapassananni.

29Sia Naben Puang Matua kakinaan tu Salomo sia kamatarrusan kapua tongan sia kapaissanan maluangan susi bungin dio randan tasik,

30naurungan iatu kakinaanna Salomo mandu kapua anna kakinaanna to dio lu rampe matallo sia mintu’ kakinaanna to Mesir.

31Mandu kinaa ia anna mintu’ tau sia anna Etan, to Ezrahi, sia Heman sia Kalkol sia Darda, anakna Mahol, naurungan tarompo’ tu sanganna dio lu mintu’ bangsa tiku lao.

32Nasa’bu’ tu tallungsa’bu kada peada’ na iatu mintu’ sengona sangsa’bu llimang lise’.

33Sia nasa’bu’ duka tu diona mintu’ kayu, randuk dio mai kayu arasi’ dao Libanon sae lako kayu supa, tu tuo dio rinding tembo’; sia nasa’bu’ duka tu diona mintu’ patuoan, manuk-manuk, olo’-olo’ mendonglo’ sia mintu’ bale.

34Sia dio mai mintu’ bangsa pantan sae tau la umperangii kakinaanna Salomo, sia pesuanna mintu’ datu lan lino tu umpekarebai tu diona kakinaanna.


  Share Facebook  |  Share Twitter

 <<  1 Raja-raja 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel