Dual PanelElia ma’nubua’ diona kamateanna Ahazia
1Iatonna matemo tu Ahab balikmi tu to Moab dio mai to Israel.
2Tobangmi tu Ahazia dao mai to’ tarali, dao mai bilik mengkadaoanna dio Samaria, anna masaki. Nasuami tu pesuanna sia ma’kada lako tau iato mai, nakua: Malekomi lako Baal-Zebub, deatanna to Ekron, la umpekutananni ba’tu la matana siara’ka dio mai te sakingku, tae’moraka.
3Apa ma’kada tu Malaeka’Na PUANG lako Elia, to Tisbe, nakua: Ke’de’moko, mumale umpessitammui tu pesuanna datu Samaria, sia ma’kada lako tau iato mai, kumua: Tae’raka Puang Matua dio lu to Israel, ammi malera mekutana lako Baal-Zebub, deatanna to Ekron?
4Iamoto, inde sia tu kadanNa PUANG Nakua: Tae’ mula millik dao mai inan kamammarammu tu munii mamma’ dao, sangadinna inang la matemoko. Malemi tu Elia.
5Sulemi lako datu tu to disua, nama’kada tu datu lako tau iato mai, nakua: Ma’patumbari ammi sulemora totemo?
6Nakuami tu tau iato mai lako: Den misa’ tau sae umpessitammuikan sia ma’kada lako kaleki nakua: Sulemokomi lako datu tu ussuakomi, ammi ma’kada lako kumua: Inde sia tu kadanNa PUANG: Tae’raka Puang Matua dio lu to Israel ammu malera mekutana lako Baal-Zebub, deatanna to Ekron? Iamoto tae’ mula millik dao mai inan kamammarammu, tu munii mamma’ dao, sangadinna inang la matemoko.
7Ma’kadami datu lako tau iato mai, nakua: To matumbara rupanna tu sae umpessitammuikomi sia umpokadai te kada iate lako kalemi?
8Mebalimi tu tau iato mai lako datu, nakua: Iato tau iato ma’bayu lamba’ balulang, sia se’ aak kuli’ lan aakna. Ma’kadami datu nakua: Iato tau iato Elia, to Tisbe.
9Nasuami datu lako tu misa’ kamandang ungkapalai surodadu limangpulo sola tu surodadunna limangpulo. Kendekmi langngan Elia, belanna iatu Elia unno’ko’ dao botto tanete, sia ma’kada lako nakua: E taunNa Puang Matua, napa’parentan datu, kumua mengkalaokomi!
10Mebalimi tu Elia lako tinde kamandang ungkapalai limangpulo surodadu, nakua: Iake tonganna taunNana’ Puang Matua da’ito nasae tu api dao mai langi’, anna sappiikomi sola tu taummi limangpulo.
11Nasua pole’omi tu misa’ kamandang ungkapalai surodadu limangpulo sola tu surodadunna limangpulo. Ma’kadami lako Elia nakua: E taunNa Puang Matua, napa’parentan datu, kumua madomi’komi mengkalao.
12Mebalimi tu Elia sia ma’kada lako tau iato mai nakua: Iake taunNana’ Puang Matua da’ito nasae tu api dao mai langi’, anna tappu’ikomi sola tu taummi limangpulo. Ta’kala saemi tu apinNa Puang Matua dao mai langi’ anna tappu’i sola tu taunna limangpulo.
13Nasua pole’omi datu tu kamandang ungkapalai surodadu limangpulo, tu ma’pentallunna, sola tu surodadunna limangpulo. Na iate kamandang ungkapalai surodadu limangpulo, tu ma’pentallunna, kendek langngan anna malinguntu’ dio olona Elia, mengkamoyami sia ma’kada lako Elia nakua: E taunNa Puang Matua, ke ma’dinni tu katuoangku sia katuonna te taummi limangpulo anna keangga’ dio pentiromi.
14Tonganna saemo tu api dao mai langi’ tu ussabu’i da’dua kamandang ungkapalai surodadu limangpulo tu dolona, sola tu taunna nasilimangpuloi. Totemo, ke ma’dinni anna keangga’ tu katuoangku dio pentiromi.
15Attu iato ma’kadami tu Malaeka’Na PUANG lako Elia, nakua: Mengkalaomoko sola, da mumataku’ lako. Ke’de’mi anna mengkalao sola na male lako datu.
16Ma’kadami tu Elia lako datu nakua: Inde sia tu kadanNa PUANG: Belanna mesuako mekutana lako Baal-Zebub, deata to Ekron – tae’raka tu Puang Matua dio lu to Israel, tu ma’din minii undaka’ pa’timbangan – iamoto tae’ mula millik dao mai inan kamammarammu, tu munii mamma’ dao, sangadinna inang la matemoko.
17Matemi tu datu susitu kadanNa PUANG tu mangka napokada Elia; na Yoram ussondai dadi datu, tonna taun ma’penduan kadatuan Yoram, anak Yosafat, datu to Yehuda; belanna tae’ anakna muane.
18Iatu tang dipokadannapa tu mintu’ tuna’na Ahazia, iamotu apa napogau’, tang tisura’moraka lan sura’ ossoranna mintu’ datu to Israel?