Dual PanelElia diangka’ langngan suruga
1Den pissan, tonna la unnangka’mi PUANG tu Elia langngan suruga naputu’ talimpuru’, malemi tu Elia sola Elisa dio mai Gilgal.
2Ma’kadami tu Elia lako Elisa nakua: Torromoko inde te, belanna Nasuana’ PUANG male lako Betel. Apa mebali tu Elisa nakua: La lelukraka tuoNa PUANG sia tonganna susi tuomi, inang tae’ kula untampekomi. Malemi tu tau iato mai rokko Betel.
3Attu iato tassu’mi tu mintu’ passikola nabi, tu torro dio Betel, lako Elisa sia mekutana lako nakua: Miissan siaraka, kumua allo iate la Naangka’ PUANG tu puangmi dao mai ulummi? Mebali nakua: Kuissan duka sia; kappakomi.
4Ma’kadami tu Elia lako nakua: O Elisa, torromoko indete, belanna Nasuana’ PUANG lako Yerikho. Apa mebali nakua: La lelukraka tuoNa Puang sia tonganna susi tuomi, inang tae’ kula untampekomi. Nasusito rampomi tu tau iato mai lako Yerikho.
5Attu iato saemi tu mintu’ passikola nabi dio Yerikho lako Elisa sia mekutana lako nakua: Miissan sia raka, kumua allo iate la Naangka’ PUANG tu puangmi dao mai ulummi? Mebali nakua: Kuissan duka sia; kappakomi.
6Ma’kadami tu Elia lako nakua: Torromoko inde te, belanna Nasuana’ PUANG lako Yordan. Apa mebali nakua: La lelukraka tuoNa PUANG sia tonganna susi tuomi, inang tae’ kula untampekomi. Nasusito tarru’mi male sola duai.
7Limangpuloi dio mai mintu’ passikola nabi male duka, anna bendan mambela dio mai tau iato mai, tonna bendan sola duai dio biring Yordan.
8Naalami Elia tu bayu lamba’na, anna lulunni, nasambakki tu uai, anna tipa’dua lu rekke sia lu sau’, anna lamban sola duai dao to’ karangkeanna.
9Iatonna rampomo sola duai lian, ma’kadami tu Elia lako Elisa, nakua: Palakumi tu apa ma’din kupogaurangko kumane diangka’ dio mai kalemu. Mebalimi tu Elisa nakua: Ke ma’dinni na iatu penaammi duang taan untorroina’.
10Ma’kadami tu Elia nakua: Iatu palakummu misa’ apa masuli’. Iammu tirona’ ke marassanna’ diangka’ dio mai kalemu, manassa la dadi tu susinna to lako kalemu, apa iake tae’i, manassa tae’ duka nala dadi.
11Iatonna marassan lumingka sipa’ulelean, ta’kala denmi misa’ kareta api sola darang api umpasisarakki sola duai. Susimoto tu kakendekanna Elia langngan suruga naputu’ talimpuru’.
12Iatonna tiroi Elisa tu apa iato, metambami nakua: O ambe’ku, ambe’ku! Karetana sia pakkanarangna to Israel! Ta’kala natae’mo natiro. Nalalakkimi tu pakeanna, naserekki napa’dua.
13Naalami tu bayu lamba’na Elia, tu rondon dio mai kalena, anna sule sia bendan dio biring Yordan.
14Naalami tu bayu lamba’na Elia, tu rondon dio mai kalena, anna sambakki tu uai sia metamba nakua: Umbara tu PUANG, Kapenombanna Elia, manassa iamo Ia? Nasambakkimi tu uai anna tipa’dua lu rekke sia lu sau’, anna ma’din ullambanni Elisa lian.
15Iatonna tiromi mintu’ passikola nabi dio Yerikho, tu bendan mambela, nakuami: Manassa iatu penaanna Elia diomo Elisa. Saemi tu tau iato mai umpessitammui Elisa, anna tukku rokko padang menomba dio olona.
16Ma’kadami tu tau iato mai lako nakua: Tonganna den dio taummi tu muane malinta’ limangpulo; da’ito namale undaka’ puangmi, Naangka’ manii PenaanNa PUANG, anna popengkalaoi dao misa’ tanete ba’tu Naparokkoi misa’ lombok. Apa nakua Elisa: Da misua tau.
17Apa iatonna tole-tolemi tau iato mai umpalakui lako, masiri’mi tu Elisa anna ma’kada nakua: Sua bangmi. Nasuami tu tau limangpulo, nadaka’i lan tallung allo, apa tae’ naappa’i.
18Sulemi tu tau iato mai lako Elisa, tonna torro siapa dio Yerikho, anna ma’kada Elisa lako: Tae’raka kupokadangkomi kumua: da mimale?
Elisa umpemeloi uai dio Yerikho
19Ma’kadami tu pa’tondokan lako Elisa nakua: Tonganna melomo torrona te kota iate susitu natiro puangki, apa iatu uainna kadake sia iatu padang umpaden katangmemba’karan.
20Nakuami tu Elisa: Alanna’ misa’ pindan ba’ru, ammi parokkoi sia. Nabaami tau lako tu pindan.
21Tassu’mi tu Elisa namale lako to’ kalimbuang, nabuangi tu sia tama nama’kada nakua: Inde sia tu kadanNa, PUANG: La Kupamelo te uai iate, tae’mo nala umpaden kamatean sia katangmemba’karan.
22Melomi tu uai sae lako allo totemo susitu kada mangka napokada Elisa.
Elisa natelle-telle pia dio Betel
23Ke’de’mi Elisa inde to dio mai lako Betel. Iatonna marassan tuka’ langngan, sunmi tu ba’tu pira-pira pia lan mai tondok untelle-tellei sia meoli lako nakua: Kendekmoko mai, to pese! Kendekmoko mai, to pese!
24Messailemi anna tiroi tu pia iato mai, anna tampakki ropu tete dio sanganNa PUANG. Saemi da’dua beruang birang lan mai pangala’, nasepak-sepakki tu pia patangpulondua.
25Ke’de’mi tu Elisa inde to dio mai, namale lako buntu Karmel na inde to dio mai nanii sule lako Samaria.