Dual PanelPa’timbanganna Ahitofel napekka Husai
1Ma’kadami tu Ahitofel lako Absalom, nakua: Eloranna’ totemo umpilei sangpulo dua sa’bunna tau, angku male unnula’ Daud te bongi ia bangsiamote;
2angku laoi ta’bulu’ mata’ka’pi sia langga’, angku patirambanni, naurunganni mallai tu mintu’ tau nasolan, angku patei tu datu misa-misai.
3Namintu’ tu to buda la kupasule lako puangku. Iatu kasuleanna mintu’ to buda tuo diori tinde to midaka’, namane marampa’ nasang tu mintu’ tau.
4Tonganmi tu pa’timbangan iato dio olona Absalom sia lako mintu’ pekaamberan to Israel.
5Apa nakua Absalom: Tambai tu Husai, to Arki, anta perangii dukai tu apa napokada.
6Iatonna mennolo tu Husai lako Absalom, nakuami Absalom lako: Susite tu kadanna Ahitofel; la taturu’raka? Iake tae’i, pokadai.
7Nakuami Husai lako Absalom: Iatu kada napokada Ahitofel, te pissanna te tae’ namelo.
8Sia nakuapa Husai: Mitandai kumua iatu ambe’mi sia mintu’ taunna lalong nasang, sia mapalla susi beruang setangan dio lu padang, tu sisayuran anakna. Ondongpi iatu ambe’mi to malute parari, dadi tae’ nala torro ma’bongi sola mintu’ to buda.
9Tae’ nasalai ba’tu umbannamo garuang nanii membuni ba’tu lan lu misa’ inan senga’. Ondong pissanpi, ke mulannai namate tu ba’tu pira-pira taunta, manassa iatu to urrangii tu ianna te, la ma’kada nakua: ditalomo tu tau unturu’ Absalom.
10Attu iato moi to barani, tu ma’penaa singa, manassa la raang penaanna, belanna natandai mintu’ to Israel, kumua iatu ambe’mi misa’ to lalong sia barani nasang tu mintu’ to nasolan.
11Apa iake timbangangku, melo ke dirampunni tu mintu’ to Israel randuk daa mai Dan sae sau’ Bersyeba, susi karangan dio biring tasik, na puangku kalena duka la male sola parari.
12Anta laoi umba-umba inan tanii unnappa’i, la tata’pai susito ambun to’do tama lino; anna dio mai kalena sia dio mai mintu’ tu to nasolan moi misa’ tae’mo tuo.
13Iake napasorong boko’mi tu surodadunna tama misa’ kota, nalebu’i ulang mintu’ to Israel tu tondok iato, anta riu’i rokko salu, manassa moi misa’ batu bitti’ tae’mo diapparan.
14Nakuami Absalom sia mintu’ to Israel: Iatu pa’timbanganna Husai, to Arki melo na pa’timbanganna Ahitofel. Apa inang pangelorannamo PUANG susito, belanna la Nadampa tu pa’timbanganna Ahitofel, kumua anNa pasaeanni kasanggangan PUANG tu Absalom.
Daud ke’de’ lako Mahanaim
15Mangkato nakuami Husai lako Zadok sia Abyatar, to minaa sola duai: Susito susite tu pa’timbangan napokada Ahitofel lako Absalom sia mintu’ pekaamberan to Israel, apa susito susite tu kadangku.
16Totemo la madomi’komi ussua tau umbaa kareba lako Daud, kumua: Da nama’bongi tu puangku bongi iate dio inan kalambanan dio lu padang pangallaran, sangadinna la madomi’ tu puangku lamban, da nadisabu’i tu puangku sola mintu’ tu to nasolan.
17Iatu Yonatan sola Ahimaas torro sikandappi’ kalimbuang En-Rogel, na misa’ kaunan baine nenne’ male lako umpokadanni tu kareba, anna male sola duai inde to dio mai lako datu Daud umpokadai tu kareba iato, belanna tae’ nama’din sola duai tama kota umpa’pekanaan kalena.
18Apa den misa’ pia muane untiroi sola duai, anna pokadai tu ianna te lako Absalom. Matira’mi male sola duai, anna rampo lako banuanna misa’ tau dio Bahurim, tu nanii misa’ bubun dio tarampakna, anna mengkalao sola duai rokko bubun iato.
19Naalami baine iato tu sampin, naballa’i dao tu baba bubun, naambo’i ono gandung, naurungan moi sidi’ tae’ kakitanan.
20Saemi tu tauna Absalom lako baine iato lan banuanna, anna ma’kada nakua: Umbara nii tu Ahimaas sola Yonatan? Mebalimi tu baine iato lako tau iato mai, nakua: Ullambannimo salu sola duai. Malemi tu tau iato mai undaka’i, apa iatonna tae’mo naappa’i, sulemi lako Yerusalem.
21Iatonna sulemo tu tau iato mai, kendekmi sola duai diong mai bubun, anna male umpokadai tu kareba iato lako datu Daud sia ma’kada lako nakua: Ke’de’komi ammi lamban madoi’, belanna susite susito tu pa’timbanganna Ahitofel la ullaoikomi.
22Ke’de’mi tu Daud sola mintu’ tu to nasolan, anna lambanni salu Yordan, naurunganni iatonna tibangka’mo masiang, moi misa’ tau tae’mo tu tang ullambanni Yordan.
23Iatonna tiromi Ahitofel, kumua tae’ nadituru’ tu pa’timbangna, nalapikkimi tu keledainna, anna male lako banuanna dio tondokna; iatonna mangkamo umpasanni tu mintu’ to lan banuanna nataa-taanni tu apanna, untoke’mi kalena; susimo kamateanna to, anna dilamun diong panglamunanna ambe’na.
24Rampomi tu Daud lako Mahanaim; iatu Absalom ullambanmo Yordan, la ia, la iatu mintu’ to Israel nasolan.
25Naangka’mi Absalom tu Amasa kamandang surodadu ussonda Yoab. Iatu Amasa anakna misa’ tau disanga Yitra, to Ismael, tu umpobaine Abigal, anakna Nahas, sangbainena Zeruya, indo’na Yoab.
26Iatu to Israel sia Absalom umpabendan tendana dio padang Gilead.
27Iatonna rampomo tu Daud lako Mahanaim, saemi tu Sobi, anakna Nahas dio mai Raba to Amon sia Makhir, anakna Amiel dio mai Lodebar sia Barzilai, to Gilead dio mai Rogelim,
28umbaa kasoro’ sia piring sia kurin sia gandung sia dalle sisikan sia ta’pung sia gandung diba’te sia kadong sia kadong barra’, mangka duka diba’te,
29sia tani’ enoan sia bumbungan pa’pamakko sia bembe’ sia domba sia dangke, naban Daud sia mintu’ tu to nasolan, anna kandei tau iato mai, belanna nakua: Tangdia’ sia mata’ka’ sia ma’rang te mai tau lan te padang pangallaran.