Dual PanelPa’nubua’ diona kasangganganna baine Samaria
1Tananni talinga te kada iate, e sapi Basan, tu untorroi buntu Samaria tu umpandasa to bongko sia umpakario-rio to mase-mase, tu ma’kada lako puangmi mikua: Benkanni angki mangiru’-iru’.
2Umposumpamo kamaseroanNa tu Puangta PUANG, Nakua: Tonganna, manassa narampoikomi attu, ke nariu’komi pekadang bassi langngan sia to torromipa la nariu’ pekan.
3Ammi tassu’ unnolai tembo’ ro’pok, pantan mentiro lako bang tingayo ammi diriu’ lako Hermon, kadanNa PUANG.
Iatu kamenombanna to Israel, kamenomban umpabu’tu kasalan
4Malekomi lako Betel, ammi pogau’ kadake, sia lako Gilgal –, ammi pamakamban kadakena! Pennoloanni tu pemala’mi, ke makale’ sia pa’taa sangpulomi, ke allo ma’pentallun.
5Padukkuanni api tu pemala’ pa’pudian dio mai roti diragii sia petambanni tu pemala’ tanning inaa sia pa’peissananni tu iannato! Belanna iamo pa’poraiammi to, e to Israel, kadanNa Puangta PUANG.
To Israel manoka mengkatoba’
6Apa iatu Aku, Kubenkomi kamaseroan isi lan lu mintu’ kotami sia kapu’duran roti lan lu mintu’ inanmi. Moi susito, tae’ duka mimengkatoba’ lako Kaleku, kadanNa PUANG.
7Sia Aku duka, tae’mo Kubenkomi uran, tonna tallung bulanpa, namane pegandungan, Kubenmo uran tu misa’ kota, apa iatu kota senga’ tae’; iatu sangteppe’ pa’lak kauranan, na iatu senga’na, tu tae’ nato’doi uran, marangke.
8Iatu tau lan da’dua ba’tu tallu kota tipa’re’ba-re’ba male lako misa’ kota la unniru’ uai, apa tontong ma’rang. Moi susito, tae’ duka mimengkatoba’ lako Kaleku, kadanNa PUANG.
9Kuparampoimokomi kamalangkoan sia pasian tu mintu’ pa’lakmi sia pa’lak anggoro’mi Kupamalayu iatu kayu arami sia kayu saitunmi nakande batik pa’kande. Moi susito, tae’ duka mimengkatoba’ lako Kaleku, kadanNa PUANG.
10Kuparampoimokomi tu ropu, susi dio Mesir. Kupateimo pa’dang tu mintu’ to mangurammi, anna dirampa tu darangmi. Sia Kupasongngonnimo bubosi tu illongmi lan mai to’ tendami. Moi susito, tae’ duka mimengkatoba’ lako Kaleku, kadanNa PUANG.
11Kubaliangammokomi susi Puang Matua umbaliangan Sodom na Gomora, ammi susi to lalotin disintak lan mai to’ api. Moi susito, tae’ duka mimengkatoba’ lako Kaleku, kadanNa PUANG.
12Iamoto la Kupasusi dukako to, e Israel. Belanna la Kupasusikoto, – la ma’parandanko la sitammu Kapenombammu, e Israel.
13Belanna tonganna Puangmo tu ungkombong buntu sia umpadadi angin, sia umpokadanni tolino tu apa lan penaanna, sia umpopemmalillinni tu arrang melambi’, sia unnola inan madao dao kuli’na padang – PUANG, Kapenombanna mintu’ ma’dandan maritik, iamoto tu SanganNa.