Dual PanelPebali bunga’na PUANG lako Ayub, kumua iatu mai panampaNa umpasomboi tu kapaanNa sia kapandarananNa
1Napebaliimi PUANG tu Ayub lan mai angin bara’ sia ma’kada Nakua:
2Mindara tu umpamalillinni tu pangra’ta’ tanan penaanNa Puang ma’kada tang ma’battuan?
3Pa’bakkanni tu aakmu susito misa’ muane, angKu kutanaiko, ammu pamanassanNa’.
4Umbara munii tongKu parandanganni te lino? Pokadaikae, ke denni inaammu!
5Mindara umpamanassai suka’na’? Inang muissan tu iannato! Ba’tu mindara tu unne’teranni ulang pesuka’?
6Umbara nalambi’ tu lentongna tonna diparokko, ba’tu mindara unnotonni tu batu petaunna,
7tonna siarrakan tu mintu’ bintoen melambi’, sia mintu’ anak Puang Matua siangngaran?
8Mindara untutu’i ba’ba tu tasik, tonna mariak tassu’ lan mai pa’tambukans-
9tongKu padadi tu salebu’ la napopake sia kapittukan la napopebimbin;
10tongKu popa’lekko-lekkoi tu angge Kupamanassanni, sia Kupalakoi salliran sia ba’ba;
11tongKu ma’kada Kukua: Rampo indemokote sia da mulendu’i, indemote tu nanii torro tu sumopana bombangmu!
12Denmoraka mupasan melambi’ temponmu tuo, sia umpadulluan inan tilalekna masiang,
13la ungkaka’ mintu’ randan langi’, naurungan dita’pii lan mai tu to tang mekaaluk?
14Membalimo tu lino susi pitti’ dinii umpalakoi peca’, iatu mintu’ apa ditiromo susito ma’pakean.
15Attu iato iatu to tang mekaaluk dialaimo arrangna, sia iatu lima tiangka’ dile’tomo.
16Mulambi’raka rokko tu mata kalimbuangna tasik, sia muolairaka lendu’ tu mandalanna tasik, tu dibunian tolino?
17Dipasombomoraka lako kalemu tu babangan lino tomate, sia mutiromoraka tu babangan lino lillinan parrak?
18Iatu paissanmu la nalambi’raka lako tu kalua’na kuli’na padang? Pokadaikae, ke muissan nasangi tu mintu’na te!
19Umbara nii tu lalan lako to’ inanna masiang, na iatu kapittukan umbara nanii torro,
20muurunganni ma’din umbaai lako to’ lili’na, sia untandai tu lalan lu lako banuanna?
21Inang la mutandai, belanna attu iato munii dadi sia makambanmo tu bilangan allo katuoammu.
22Mulambi’moraka tu bilik pangrampunanna ambun makko? Sia mutiromoraka tu bilik pangrampunanna uran batu,
23tu Kunannanmo attunna kapussakan, sia allona kasirarian na tananan ra’?
24Umbara nanii tu lalan lu lako inan nanii arrang titale’, tu nanii angin lu dio mai rampe matallo sisarak-sarak dao kuli’na padang?
25Mindara ungkalii tu kalo’na uran kamban sia unggaragan lalan lila kila’,
26la umpasaean uran padang tang dipa’tondokki sia padang aak tu tang natorroi tau,
27la umpemalompoi padang pangallaran sia padang lo’bang sia umpatiballa’ lolona apa mentaruk?
28Denraka uran keambe’? Ba’tu mindara undadian to’dona damo’?
29Mindara pa’tambukan nanii tassu’ tu uai makko, sia ambun dao mai langi’ mindara undadianni?
30Memmakkomo tu uai susito batu, sia sikandemo tu mai baba tasik mandalan.
31Ma’dinrokoka unnarra’i peporinna bintoen Bunga’, ba’tu ungko’ka’i tu pungona bintoen Orion?
32Ma’dinrokoka umpadellekki tu mai rupanna bintoen Sodiak sia ullalanan bintoen Ursa sola anakna?
33Mutandairaka tu apa dipondok dao langi’, sia mupamanassaraka tu parentana dao kuli’na padang?
34Ma’dinrokoka umpekapuai gamarammu sae langngan gaun, anna sae tu uran kamban ussamboiko?
35Ma’dinrokoka ussua kila’, anna male sia ma’kada lako kalemu nakua: Inde siakan?
36Mindara umpatorroi kakinaan tu salebu’ malillin, ba’tu mindaraka umbenni patiro penaa tu ma’rupa-rupa ma’lodokna salebu’?
37Mindara tu umbilang salebu’ situang kakinaan, sia umbalittua’ bussona langi’,
38ke maka’dangi tu barra’-barra’ anna susito logan dipati’no’, sia pada sikandeppe’ losso’ ma’lemong?
39(39-1) Ma’dinrokoka unnularan kandena singa birang, sia umpabossa kamailuanna anak singa,
40(39-2) ke tukkui lan lo’ko’na, ba’tu mangamu’i lan to’ pangala’-ala’?
41(39-3) Mindara umpadenan kande kaduaya ke metambai tu anakna langngan Puang Matua, lu lako lu dio mai, tae’ nakande?