Dual PanelKadibilanganna surodadunna to Israel
1Ma’kadami tu PUANG lako Musa lan padang pangallaran Sinai, lan Tenda Kasitammuan, tonna allo bunga’na bulan ma’penduan lan taun ma’penduanna mangkanna tassu’ tu tau iato mai lan mai tondok Mesir, Nakua:
2Alai tu bilanganna mintu’ kasirampunan to Israel unturu’ pa’rapuanna sia rapunna, situru’ bilangan sanganna, iamotu mintu’ muane, simisa’-misa’i,
3randuk dio mai duangpulo taunna ba’tu la’bi, iamotu mintu’nato la lao parari lan Israel; iko sola Harun la unnia’i unturu’ tuntunan surodadunna.
4Anna tunduikomi misa’ tau ke simisa’oi suku, iamotu pekaamberan lan mintu’ rapunna.
5Inde sia tu sanganna muane la untunduikomi, iamotu dio mai Ruben disanga Elizur, anakna Syedeur;
6dio mai Simeon disanga Selumiel, anakna Zurisyadai;
7dio mai Yehuda disanga Nahason, anakna Aminadab;
8dio mai Isakhar disanga Netaneel, anakna Zuar;
9dio mai Zebulon disanga Eliab, anakna Helon;
10dio mai anakna Yusuf, iamotu dio mai Efraim disanga Elisama, anakna Amihud; dio mai Manasye disanga Gamaliel, anakna Pedazur;
11dio mai Benyamin disanga Abidan, anakna Gideoni;
12dio mai Dan disanga Ahiezer, anakna Amisyadai;
13dio mai Asyer disanga Pagiel, anakna Okhran;
14dio mai Gad disanga Elyasaf, anakna Rehuel;
15dio mai Naftali disanga Ahira, anakna Enan.
16Iamoto tu la ditambai dio mai kasirampunan, iamotu arungna suku nene’na; iatu tau iato mai pekaamberan lan pa’rapuan to Israel.
17Attu iato natambaimi Musa sia Harun tu to disa’bu’ sanganna anna solanni,
18sia natambai ma’misa tu mintu’ kasirampunan tonna allo bunga’na bulan ma’penduan, pada bendan unturu’ pa’rapuan sia rapu, situru’ bilangan sanganna, randuk dio mai siduangpulo taunna ba’tu la’bi, simisa’-misa’i,
19susitu Napepasanan PUANG lako Musa. Anna bilangi lan padang pangallaran Sinai.
20Iatu bati’na Ruben, pa’bunga’na Israel, iamotu, lanto mimi’na unturu’ pa’rapuanna sia rapunna, situru’ bilangan sanganna simisa’-misa’i, mintu’ muane, randuk dio mai siduangpulo taunna ba’tu la’bi, mintu’nato la lao parari,
21mintu’ tu iaranna suku Ruben patangpulo nnannan sa’bu llimaratu’.
22Iatu bati’na Simeon, iamotu lanto mimi’na unturu’ pa’rapuanna sia rapunna situru’ bilangan sanganna simisa’-misa’i, mintu’ muane, randuk dio mai siduangpulo taunna ba’tu la’bi, mintu’nato la lao parari,
23mintu’ tu iaranna suku Simeon limangpulo ngkasera sa’bu ntalluratu’.
24Iatu bati’na Gad, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari,
25mintu’ tu iaranna suku Gad patangpulo llima sa’bu nnannanratu’ llimangpulo.
26Iatu bati’na Yehuda, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari,
27mintu’ tu iaranna suku Yehuda pitungpulo nna’pa’ sa’bu nnannanratu’.
28Iatu bati’na Isakhar, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.
29Mintu’ tu iaranna suku Isakhar, limangpulo nna’pa sa’bu nna’pa’ratu’.
30Iatu bati’na Zebulon, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.
31Mintu’ tu iaranna suku Zebulon limang pulo mpitu sa’bu nna’pa’ratu’.
32Dio mai anakna Yusuf iamotu bati’na Efraim, iamotu mai lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’na to la lao parari.
33Mintu’ tu iaranna suku Efraim patangpulo sa’bu llimaratu’.
34Iatu bati’na Manasye, iamotu lanto mimi’na unturu’ pa’rapuanna sia rapunna, situru’ bilanganna sanganna, randuk dio mai siduangpulo taunna ba’tu la’bi, mintu’nato la lao parari.
35Mintu’ tu iaranna suku Manasye tallungpulo ndua sa’bu nduaratu’.
36Iatu bati’na Benyamin, iamotu lanto mimi’na unturu’ pa’rapuanna sia rapunna situru’ bilangan sanganna randuk dio mai siduang pulo taunna ba’tu la’bi, mintu’nato la lao parari.
37Mintu’ tu iaranna suku Benyamin tallungpulo llima sa’bu nna’pa’ratu’.
38Iatu bati’na Dan, iamotu lanto mimi’na unturu’ pa’rapuanna sia rapunna situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.
39Mintu’ tu iaranna suku Dan annan pulona ndua sa’bu mpituratu’.
40Iatu bati’na Asyer, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.
41Mintu’ tu iaranna suku Asyer patangpulo mmisa sa’bu llimaratu’.
42Iatu bati’na Naftali, iamotu lanto mimi’na unturu’ pa’rapuanna sia rapunna, situru’ bilangan sanganna, randuk dio mai siduangpulo taunna ba’tu la’bi, mintu’nato la lao parari.
43Mintu’ tu iaranna suku Naftali limangpulo ntallu sa’bu nna’pa’ratu’.
44Mintu’ tau iate naia’mo Musa sola Harun sia arung to Israel, sangpulo dua muane simisa’ ke sangrapuoi.
45Iamote tu bilanganna to Israel, unturu’ rapunna randuk dio mai siduangpulo taunna ba’tu la’bi, iamotu mintu’nato la lao parari lan Israel,
46iatu mintu’na tau iato annanratu’na ntallu sa’bu limaratu’ llimangpulo.
47Apa iatu mintu’ to Lewi unturu’ suku nene’na tae’ naalai bilangan sola tau iato mai.
48Belanna susimote tu kadanNa PUANG lako Musa, Nakua:
49Ia manna tu suku Lewi tae’ mula umbilangi sia da’ mualai tu bilanganna dio lu mintu’ to Israel.
50Sangadinna la mupatage’i to Lewi tu kema kasa’bian sia mintu’ pareanan sia mintu’ tu dipakena; anna tau iato umbullei tu kema sia mintu’ pareananna; sia la untoe pentoeanna dio sia ma’tenda untikui kema.
51Iake la dipake’de’mi male tu kema, anna rondonni to Lewi, sia iake la dipatorroi tu kema la napabendan to Lewi; apa minda-minda tu tang sipatu urreke’i la mate dipongko.
52Iatu mintu’ to Israel la umpabendan tendana pantan dio to’ tendana sia banderana, situru’ tuntunanna.
53Apa iatu mintu’ to Lewi la umpabendan tendana untikui kema kasa’bian, da’ narampoi kare’dekan ara’ tu kasirampunanna to Israel; iamoto anna kampai to Lewi tu kema kasa’bian iato.
54Susimoto napogau’ tu to Israel susi tongan tu mangka Napepasanan PUANG lako Musa, tu napogau’.