Dual PanelDiona tongkonan palita
1Ma’kadami tu PUANG lako Musa, Nakua:
2Ma’kadako lako Harun sia kuanni, mukua: Iake umparandanko palita, sipatu tu pitu palita la parrang lu lako tingo tongkonan palita.
3Napogau’mi Harun susito; napadio tingo tongkonan palita tu palitanna susitu mangka Napepasanan PUANG lako Musa.
4Inde sia tu garaganna tongkonan palita iato, iamotu bulaan pa’kombong ditampa, la batangna la iatu bunganna, situru’ tu apa Napa’patuduan PUANG lako Musa, susimoto tu tongkonan palita mangka nagaragai.
Diona kaditokkoanna to Lewi
5Ma’kadami tu PUANG lako Musa Nakua:
6Tambai tu mintu’ to Lewi dio mai mintu’ to Israel ammu pamaseroi.
7La mupogauran tu tau iato mai susite, ke mupamaseroi, iamotu la mupi’pikki uai pebase kasalan; mangkato la naku’ku’i tu mintu’ kalena sia la nabusukki tu mintu’ tamangkalena, kumua nadipamasero.
8La naala tau iato mai tu misa’ anak sapi laki sola tu kande dipemalaran, tontong dipasisola, iamotu ta’pung manisak, dipasigerok minna’, sia la muala tu misa’ anak sapi laki ma’penduanna, la diposuru’ pengkalossoran.
9Mumane ussuai tu to Lewi sae mengkareke’ lako tingo Tenda Kasitammuan, ammu tambai sae sirampun tu mintu’ kasirampunan to Israel.
10Ammu suai tu to Lewi urreke’ oloNa PUANG, na iatu mintu’ to Israel la urremme’i tu to Lewi.
11Sia iatu Harun la ussorong untarima sule to Lewi susito pemala’ disorong ditarima sule dio mai to Israel dio oloNa PUANG, sia la dipamanassa tu tau iato la untoe pentoeanNa PUANG.
12Mangkato naremme’i to Lewi tu ulu anak sapi laki iato sia la mupemalaran tu misa’ diposuru’ pengkalossoran sia iatu misa’ dipopemala’ ditunu pu’pu’ lako PUANG, la umpadenan kadiseroian kasalan to Lewi.
13Iatu mintu’ to Lewi la musolan dio olona Harun sia dio olona anakna, sia la musorong mutarima sule tu tau iato susito pemala’ disorong ditarima sule lako PUANG.
14Susimoto la mupamarimbangan tu to Lewi dio mai mintu’ to Israel, anna iatu to Lewi Akumo tu Puangna.
15Mangkato namane tama tu to Lewi la untoe pentoean dio Tenda Kasitammuan; susimoto la mupamasero tu tau iato butung to pemala’ disorong ditarima sule.
16Belanna dio mai mintu’ to Israel la disorong nasangmo tu tau iato mai lako Kaleku. Tau iato mai Kualammo Kaleku la ussondai tu mintu’ bunga’na urrubak pa’tambukanna indo’na, iamotu mintu’ anak pa’bunga’na to Israel.
17Belanna mintu’ anak pa’bunga’ dio lu to Israel la dio mai tolino la dio mai olo’-olo’ Akumo tu Puangna, belanna iato allo Kunii ussabu’i tu mintu’ anak pa’bunga’ dio tondok Mesir iatu tau iato mai Kupamarimbangammo lako Kaleku.
18Kualami tu to Lewi la ussonda mintu’ anak pa’bunga’ dio lu to Israel.
19Iatu to Lewi dio mai mintu’ to Israel Kusorongmo lako Harun sia lako anakna la untoe pentoeanna to Israel dio Tenda Kasitammuan sia la umpadenan kadiseroian kasalan to Israel, kumua da’ naruai kamandasan tu to Israel, ke mengkareke’i tu to Israel lako inan maindan.
20Napogau’mi Musa sola Harun sia mintu’ kasirampunan to Israel te iannate lako to Lewi; susitu mangka Napepasanan PUANG lako Musa diona to Lewi, napogau’mi to Israel lako tau iato mai.
21Iatu to Lewi umpamasero kalena dio mai kasalan sia nabusukki tu tamangkalena, anna sorongi natarima sule Harun tu tau iato mai susito pemala’ disorong ditarima sule dio oloNa PUANG, sia napadenan kadiseroian kasalan tu tau iato mai sia napamasero.
22Mangkato tamami tu to Lewi la untoe pentoeanna dio to’ Tenda Kasitammuan, tu napa’patuduan Harun sola anakna. Susitu mangka Napepasanan PUANG lako Musa diona to Lewi, anna dipogau’ lako tau iato mai.
Attu pentoeanna to Lewi
23Ma’kadami tu PUANG lako Musa, Nakua:
24Inde sia tu atoranna to Lewi: Iatu mintu’ to siduangpulo llima taunna sia la’bi sipatu la sae mengkarang diona pentoean lan Tenda Kasitammuan.
25Apa iake limangpulomi taunna, tilendokmo tu tau iato mai dio mai pentoean iato, tae’mo na la untoe pentoeanna tu tau iato mai.
26Moi anna ma’din siapa untundui siulu’na untoe apa dipatanggungan tau iato mai dio to’ Tenda Kasitammuan, apa tae’mo na la untoe pentoeanna. Susimoto tu la mupogauran to Lewi diona apa dipatanggunganni.