Dual PanelMordekhai undaka’ lalan la urrampanan to Yahudi
1Iatonna issanmi Mordekhai tu mintu’ apa dadi, naserek-serekmi tu pakeanna anna mellullung karung sia au, anna male tama tangnga kota, na sumarro sia unnurruk-urruk tumangi’.
2Rampomi lako tingayo babangan datu, belanna tae’ nama’din tu tau tama babangan datu ma’pakean karoro’.
3Lan lu mintu’ propinsi tu nanii rampo parenta sia atoranna datu, den passanda bolongan kapua, pa’puasa, tangi’ sia sarro dio lu to Yahudi, iamotu buda tau mamma’ umpennampa’ au.
4Iatonna pokadanni to ma’kamayana baine sia tomase’ponna Ester lako kalena te iannate, tirambanmi tu datu baine, anna pa’peanni pakean tu Mordekhai kumua napakei, anna lendokanni tu pakean sanda bolongna dio mai kalena, apa tae’ natarimai.
5Natambaimi Ester tu Hatah, misa’i tu tomase’ponna datu, tu napamanassa la ungkamayai Ester, anna suai male mekutana lako Mordekhai la unnissananni kumua apa bannangna sia apa patunna.
6Malemi tu Hatah lako Mordekhai dio tana lapang kota dio tingayo babangan datu.
7Napokadammi Mordekhai tu mintu’ apa dadi lako kalena sia pira tongan budanna tu salaka tu mangka napokada Haman la natimbangan patti pangnannanna datu, podo ke dieloranni ussanggangi tu mintu’ to Yahudi.
8Sia naben dukamo lako tu misa’ pallemba’ sura’ atoran, tu mangkamo dipa’peissanan lan Susan la ussabu’i to Yehuda, anna pa’petiroanni lako Ester, kumua napaissanni tu mintu’nato. Sia napalaku duka anna parampoi lako datu baine tu pepasanna, kumua anna mennolo lako datu umpengkamoyai kamaturu-turuanna sia umpalakui anna kamasei tu bangsana.
9Tamami tu Hatah umparampoi lako Ester tu mintu’ kadanna Mordekhai.
10Apa napepasanan Ester lako Hatah la umpokadanni Mordekhai, kumua:
11Iatu mintu’ to diala pareana datu sia mintu’ pa’tondokan propinsinna datu unnissanni, kumua lako minda-minda, la muane la baine, tu tama mennolo lako datu dio tingayo bilik lanna lu, anna tae’ naditambai, misa’ri ukunganna, iamotu la dipatei. Sangadi, ke nadullui datu tekken bulaan kadatuan, ia mannapito namane makarimman. Lan te tallungpulomo allona tae’ natambai lenna’ datu.
12Mintu’ te kadanna Ester diparampo lako Mordekhai.
13Napalakumi Mordekhai umparampoi lako Ester tu pebalinna nakua: Da misangai kumua kamu manna tu mintu’ to Yahudi la tilendok, belanna lankomi tongkonan layukna datu.
14Belanna iake kappa bangkomi lan attu iate, manassa la sae duka ia tu pa’tunduan sia kadirampanan dio mai inan senga’ lako to Yahudi, apa kamu sia to lan banuanna ambe’mi la sanggang; sia minda unnissanni, kumua umbai na attu iate, ammi dipakala’bi’ tama kadatuan.
15Mesuami Ester lako tau umpokadanni Mordekhai kumua:
16Malekomi mirampunni tu mintu’ to Yahudi lan Susan, ammi ma’puasa tallungallo belanna aku, da mikumande sia mangiru’ la bonginna la allona. Ia duka tu aku sola mintu’ to ma’kamayaku baine la ma’puasakan, namangkato kumane male mennolo lako datu, moi na tangia atoran; iake la kuposanggangi, da’ito kusanggang.
17Malemi tu Mordekhai, anna pogau’i tu mintu’ apa napasan Ester lako.