Dual Panel1Iatu Yefta, to Gilead, iamo misa’ pa’barani lalong, apa dadi dio mai misa’ baine kadake gau’; Gilead tu ambe’na.
2Iatu bainena Gilead umpadadian dukai ba’tu pira-pira pia muane. Iatonna kapuamo tu anakna baine iato, narambaimi tu Yefta nama’kada, nakua: Tae’ musipatu dipaketaa mana’ sisola bati’na ambe’ki, belanna anaknako iko baine senga’.
3Iamoto namallai tu Yefta dio mai siulu’na anna torro dio Tob, anna sae sirampun lako tu ba’tu pira-pira muane palong nasisolan, anna male sola.
4Ba’tu pirang-pirang allo undinnato sirarimi to Amon na to Israel.
5Iatonna sirarimo to Amon tu to Israel, malemi tu mintu’ pekaamberan Gilead unnala Yefta dio mai tondok Tob,
6anna ma’kada lako Yefta, nakua: Maimokomi, ammi dadi kamandang lompoki, angki rarii to Amon.
7Apa ma’kada tu Yefta lako mintu’ pekaamberan Gilead nakua: Tang mikabiri’ra’ka sia mangkamo’ mirambai dio mai bati’na ambe’ku? Ma’apai misae totemo umpellambi’ina’, na lanmokomi kapussakan?
8Ma’kadami tu mintu’ pekaamberan Gilead lako Yefta nakua: Tonganna, apa saemokan sule lako kalemi, la malemoki’ sola anta rarii tu to Amon; anna kamu dadi pangulungki, iamotu mintu’ to umpa’tondokki Gilead.
9Ma’kadami tu Yefta lako pekaamberanna Gilead, nakua: Iake la misolammo’ sule la urrarii to Amon, ianna sorongi PUANG lako kaleku, manassa aku la umpanguluikomi.
10Ma’kada pole’omi tu pekaamberanna Gilead lako Yefta, nakua: Naperangiimira PUANG tu pangallu’ta, ketang la kipogau’i susitu mangka mipokada.
11Attu iato malemi tu Yefta sola mintu’ pekaamberanna Gilead, anna angka’i to buda pangulunna sia kamandang lompona sia nasa’bu’ Yefta tu mintu’ kadanna dio oloNa PUANG dio Mizpa.
Yefta sipa’kada to Amon
12Nasuami Yefta tu ba’tu pira-pira pesua, lako datu to Amon mekutana: Apara tu tasikara-karai ammi saera ullaoina’ sia urrarii tondokku?
13Mebalimi tu datu to Amon lako pesuanna Yefta, nakua: Iatu to Israel, tonna tassu’ dio mai Mesir, urrampa lili’ tondokku, randuk dio mai salur Arnon sae lako salu Yabok sia sae lako salu Yordan. Totemo pasulean melo bangmo’.
14Nasua pole’omi Yefta tu pesua lako datu to Amon,
15nama’kada, nakua: Inde sia tu kadanna Yefta. Tae’ra narampai to Israel tu tondok to Moab ba’tu to Amon.
16Belanna tonna ke’de’ dio mai Mesir, tarru’ bangmi tu to Israel unnola padang pangallaran sae lako tasik Teberau anna rampo lako Kadesh.
17Nasuami to Israel tu pesua lako datu Edom umpalakui kumua: Elorangkanni unnola tarru’ tondokmi. Apa tang napasiola datu Edom. Sia nasua duka tu pesua lako datu Moab, apa tae’ napasituru’i; iamoto natorro dio Kadesh tu to Israel.
18Mangkato tarru’ bangmi unnola padang pangallaran ullilingi tondok Edom sia tondok Moab, anna rampo dio rampe matallona tondok Moab sia ma’tenda sambalinna lu salu Arnon, apa tae’ natama lili’na Moab tu tau iato mai, belanna iatu salu Arnon iamo katonanna Moab.
19Attu iato nasuami to Israel tu pesua lako Sihon datu to Amori, tu datu dio Hesbon, anna ma’kada to Israel lako, nakua: Elorampakan unnola tarru’i tu tondokmi sae lako tu inan la kipatu.
20Apa iatu Sihon tae’ napatonganni tu to Israel la unnolai lili’ tondokna, sangadinna napasirampun tu taunna, sia ma’tenda dio Yahas, anna sirari to Israel.
21Apa nasorong PUANG, Kapenombanna to Israel, tu Sihon sola mintu’ surodadunna tama limanna to Israel, anna taloi tu tau iato mai. Attu iato naalami to Israel napomana’ tu mintu’ tondok to Amori, tu umpa’tondokki te lili’ padang iate.
22Naalami napomana’ tu mintu’ lili’ to Amori, randuk dio mai salu Arnon sae lako salu Yabok sia randuk dio mai padang pangallaran sae lako salu Yordan.
23Susimoto tu PUANG, Kapenombanna to Israel, urrambai tu to Amori dio mai padang mana’na dio tingayona to Israel, taunNa, umbara mikua urrambai pole’kan?
24Tae’raka mipomana’i tu apa nabenkomi Kamos, deatammi, la mipomana’? Susi dukato la kipomana’ tu mintu’ tondok tu Narambai PUANG, Kapenombangki, tu to umpa’tondokki dio mai tingayoki?
25Mandu melorokomika anna iatu Balak, anakna Zipor, datu Moab? Denmoraka nasigaga tu to Israel ba’tu sirari?
26Talluratu’mo taunna tu to Israel torro dio Hesbon sola mintu’ lili’na sia dio Aroër sola mintu’ lili’na sia dio mintu’ kota dio randananna Arnon, ma’apai natae’ misae urrampananni to attu iato.
27Tonganna tae’ kupogau’ kakadakean lako kalemi, sangadinna kamu kalena umpogau’ kakelokan lako kaleku, belanna moraikomi la urrariina’. Na PUANGmora, tu To ma’paolai salu, umpaolai salunna tu to Israel anna to Amon.
28Apa iatu datu Amon tang napasiola tu kadanna Yefta tu naparampo lako kalena.
29Attu iato Narampoimi PenaanNa PUANG tu Yefta, anna tarru’ unnolai Gilead na Manasye, namane tarru’ unnolai Mizpa, dio lili’na Gilead, na dio mai Mizpa, dio lili’na Gilead, ke’de’ tarru’ lako to Amon.
Diona pangallonanna Yefta
30MangallonanMi tu Yefta lako PUANG, nakua: Iake Misorongi tama kuasangku tu to Amon,
31manassa iatu apa tassu’ dio mai to’ ba’ba banuangku kusitammuan, ke sule marampa’ siana’ dio mai to Amon, la dadi apanNa PUANG sia la kupopemala’ ditunu pu’pu’.
32Mangkato ke’de’mi tu Yefta la ullaoi to Amon sia la sirari anNa sorongi PUANG tu tau iato mai tama kuasanna.
33Nataloi randuk dio mai Aroër sae lako sikandappi’na Minit – den duangpulo kota – sia sae lako Abel-Keramim; kaditaloan kapua iate napobannangi tu to Amon mengkanorong lako to Israel.
34Iatonna sulemo tu Yefta lako Mizpa, lako to’ banuanna, natiroi tassu’mo tu anakna umpessitammui, umpannoni ganda’-ganda’ sia ma’gellu’. Iamo anak tungga’na, tae’mo anak senga’na la muane la baine.
35Iatonna tiromi Yefta tu anakna, naserekmi tu pakeanna, nametamba nakua: A’a anakku, mupatunduk tonganna’ sia ikomora tu umpamandasana’, belanna mangkamo’ umpatassu’ kada lako PUANG, sia tae’mo kuma’din urriu’ sulei.
36Apa mebalimi lako nakua: O ambe’, iammi mangkamo umpasun kada lako PUANG, pogau’mi susitu mangka mipokada, belanna Naelorangkomi PUANG umpabala’i samosomi tu kasalanna ualimmi, iamotu mai to Amon.
37Sia ma’kadapa lako ambe’na nakua: Iamanna te misa’ la mipalaloampa’, iamotu la mielorampa’ duang bulan male langngan buntu sola te mai sangbaineku la untangi’i tu kamalollerangku anak dara.
38Ma’kadami nakua: Malemoko; naelorammi male duang bulan. Attu iato malemi sola sangbainena untangi’i tu kamalolleranna anak dara dao buntu.
39Iatonna duang bulanmo sulemi lako ambe’na, napalanda’i ambe’na lako tu pangallonanna; iatu anak dara iato tae’ nasangampa’ len misa’ muane. Dadimi misa’ kabiasan dio lu to Israel,
40ke taunoi male tu mai anak dara to Israel patang allo ke sangtaunoi umbatingi anakna baine Yefta, to Gilead.