Dual PanelPenggauran mesirisan dio Gibea
1Attu iato tonna tae’ tu datu dio to Israel, denmi misa’ to Lewi torro to sae dao lu mennaa’na buntunna Efraim, tu mangka unnala misa’ baine dio mai Betlehem Yehuda napogundi’.
2Apa iatu gundi’na unnola boko’ muanena, sia natampe male lako banuanna ambe’na dio Betlehem, lili’na Yehuda natorro dio malebu patang bulan.
3Ke’de’mi tu muanena undi unnula’i la umpakatana penaanna bainena, anna solanni sule; den tu misa’ taunna nasolan sia keledai sangayoka. Nasolammi baine iato tama banuanna ambe’na. Iatonna tiromi ambe’na baine iato tu to Lewi, parannumi penaanna male untammui.
4Napatorromi matusanna, iamotu ambe’na baine iato, anna torropa sola tallung allo; kumandemi sia mangiru’ sia ma’bongi inde to dio.
5Iatonna allo ma’penna’pa’ millik kale’mi sola duai, la ke’de’ male; ma’kadami ambe’na tinde baine mangura lako menintunna nakua: Messa’pokomi dolo roti sangsasa’, ammi matoto’, mimane male.
6Unno’ko’mi sola duai anna kumande sia mangiru’. Nama’kada tu ambe’na baine mangura iato lako tinde muane nakua: Melo ke mipasiolapi te ammi torropa ma’bongi anna parannu tu penaammi.
7Iatonna ke’de’mo la male, naparuku-rukumi matusanna la torro, naurunganni torro pole’pa ma’bongi dio.
8Iatonna allo ma’pellima millik kale’mi la ke’de’ male, apa ma’kada tu ambe’na baine mangura iato nakua: Messa’pokomi dolo sidi’, ammi matoto’, sia torropokomi sae lako tipalempena allo. Kumandemi sola duai.
9Ke’de’mi tu tau iato namale sola gundi’na sia taunna, apa ma’kada tu matusanna, ambe’na baine mangura iato lako, nakua: Tiromi tipalempemo allo, torromokomi ma’bongi, tiromi la lambunmo tu allo, torrokomi indete ma’bongi, anna parannu tu penaammi; masiangpa mimillik kale’ ammi ke’de’ sule lako banuammi.
10Apa tae’mo namorai tu muane iato torro, sangadinna ke’de’mo male. Rampomi lako inan sitingoan Yebus, iamotu Yerusalem, sisola tu keledainna sangayoka situang lapik sia gundi’na.
11Iatonna la urreke’mo Yebus sia lambunmo tu allo, ma’kadami tu taunna lako puangna nakua: Melo ke lendu’ki’ inde te kota to Yebus, anta ma’bongi dio.
12Apa mebali tu puangna lako nakua: Tae’ tala lendu’ lako misa’ kotana tau, tu tang nanii to Israel, sangadinna la tarru’ki’ lako Gibea.
13Sia ma’kadapa lako taunna nakua: Maimoko anta pellambi’i tu sala umbanna misa’ tondok, anta ma’bongi dio Gibea ba’tu dio Rama.
14Tarru’mi male, apa tonna rampomo sikandappi’ Gibea, dio lili’na Benyamin, lambunmi tu allo.
15Iamoto sepangmi tu tau iato mai anna ma’bongi dio Gibea. Iatonna rampomo lako, torro bangmi dio rante dio kota iato, apa moi misa’ tau tae’ bang untambai la ma’bongi dio banuanna.
16Denmi misa’ to matua sule mengkarang dio mai pa’lakna to bongi iato. Iatu tau iato lu dao mai buntunna Efraim sia torro to sae dio Gibea; iatu mintu’ pa’tondokan iato to Benyamin.
17Iatonna bangunan matanna natiromi tu to lumio’ dio rante dio kota, anna ma’kada tu to matua nakua: Umba la miolai sia umba minii sae?
18Mebalimi tu tau iato nakua: Ke’de’ lu diokan mai Betlehem, lili’na Yehuda, lu lako mennaa’na buntunna Efraim. Lu indena’ to dio mai; malemo’ lako Betlehem, lili’na Yehuda; totemo la sulemo’ lako banuangku, apa moi misa’ tau tae’ untambaina’ lako banuanna.
19Den sia dalame sia kande la kibenni tu keledaingki da’dua sia den sia roti sia uai anggoro’ tu akunna sia iate taummi baine sia iate kaunan nasolan taummi; tae’ kikakurangan apa-apa.
20Ma’kadami tu to matua nakua: Da namasussa tu penaammu! Apa-apa kurang dio kalemu aku la umparandanni; podo da muma’bongi inde te rante iate.
21Nasolammi tu tau iato tama banuanna, anna pakandei tu mai keledai; umbaseimi lette’na sola tallu’i, namane kumande sia mangiru’.
22Iatonna marassan parannu-rannu kumande, saemi tu pa’tondokan, to bulituk, untalimbung tamai tu banua iato, anna undedek ba’ba sia ma’kada lako to matua, puangna banua, nakua: Patassu’i mai salian tu muane, sae ma’bongi lan banuammi angki sangampa’.
23Tassu’mi tu puangna banua untammui tu tau iato mai, anna ma’kada nakua: Da misusito, e mintu’ siulu’ku, da mipogau’i tu apa kadake; belanna tamamo banuangku te tau iate, da mipogau’i te kabagan mesirisan.
24Na anakkumora, tu anak darapa, sola gundi’na tu tau iato, kupatassurangkomi; ammi rongkongi, mipogau’i lako kalena tu apa misanga melo, podo da na iatu muane iato, minii umpogau’i lako te kabagan mesirisan.
25Apa tae’ namorai tu tau iato mai umperangii. Pakalan naalami to Lewi tu gundi’na, napatassuran tau iato mai. Nasangampa’ sia narongkong situ’turan bongi sae lako masiangna. Iatonna tilalekmo masiang narampanammi tau iato mai namale.
26Iatonna passisi randan langi’ rampomi tu baine iato, songka dio to’ ba’ba banuanna tau iato, tu nanii puangna ma’bongi, (anna torro mamma’) sae lako tilalekna masiang.
27Iatonna melambi’mo dio mai, tonna millikmo tu puangna, nabungka’mi tu ba’ba banua, anna tassu’ la male lumingka, natiromi tu baine iato, iamotu gundi’na, tibambang bangmo dio to’ ba’ba banua, natibasse langngan ampang ba’ba tu limanna patomali.
28Ma’kadami tu puangna lako nakua: Millikmoko, tamale. Apa tae’ nabalii. Naangka’mi langngan keledainna, anna male lako inanna.
29Iatonna rampomo lako banuanna, naalami tu piso, natoei tu batang rabukna gundi’na, naleso-lesoi, napa’sangpulo dua, anna pakatui tu lesoan iato lako mintu’ lili’na to Israel.
30Minda-minda untiroi tu iannato ma’kada nakua: Tae’pa ia dadi sia tae’ lenpa ia ditiro tu susinna te temponna to Israel tassu’ lan mai tondok Mesir sae lako allo iate. Palan penaai te apa iate, kombonganni sia pokadai!