Dual Panel1Iake den misa’ tau kasalan urrangi penggata tu dipokada maleso sia dadi sa’bi belanna narangi kalenamo, ba’tu naissanmo, anna tae’ napokadai, la napassan tu kakadakeanna.
2Ba’tu iake denni misa’ tau ungkaka’ apa maruttak, la iatu batang rabukna olo’-olo’ marera, tu maruttak, la iatu batang rabukna patuoan maruttak, la iatu batang rabukna olo’-olo’ mendonglo’ maruttak, apa tae’ naissanni, manassa la maruttak sia kasalan tu tau iato.
3Ba’tu iake ungkaka’i apa maruttakna tau, moi umba-umba duka nakua anna maruttak, apa tae’ naissanni, undi namane ungkanassai, manassa tau iato kasalan.
4Ba’tu iake denni misa’ tau umpalao sumpa sia umpalendu’ kadanna, la umpogau’ misa’ kadake, ba’tu melo, moi umba-umba nakua tau umpalao sumpa umpalendu’ kadanna, anna tae’ naissanni, undi namane ungkanassai, manassa tau iato kasalan diona misa’ apa iato.
5Iake den naposala lan te misa’ apa iato, la naaku tu kasalan napogau’,
6sia la napemalaran lako PUANG tu misa’ patuoan bitti’, tu birangna, iamotu misa’ domba ba’tu misa’ bembe’ diposuru’ pengkalossoran, la usseroi tu kasalan napogau’; susimoto tu to minaa la umpadenanni kadiseroian kasalan tu tau iato belanna kasalanna.
7Apa iake tang nabelai umpaden misa’ patuoan bitti’, la napennoloan lako PUANG tu da’dua bu’ku’, ba’tu da’dua anak dangan-dangan la usseroi tu kasalan napogau’, iamotu misa’ la diposuru’ pengkalossoran, na iatu misa’ dipopemala’ ditunu pu’pu’.
8La nabaa lako to minaa, anna pemalaranni dolo, tu napatu’tun la diposuru’ pengkalossoran. La napula’ tu ulunna dio mai barokona, apa tae’ naditantangi tarru’.
9Iatu rara suru’ pengkalossoran la napa’pi’pikan pira dio to’ rinding inan pemalaran, apa iatu rara torronapa la diparra tu duku’na, anna to’do tu rarana dio to’ lette’ inan pemalaran; iamote tu misa’ suru’ pengkalossoran.
10Iatu ma’penduannato la nakarang ditunu pu’pu’ situru’ pepasanna. Nasusito iatu to minaa la umpadenanni kadiseroian kasalan tu tau iato diona tu kasalan napogau’ namane dipagarri’.
11Apa iake tang nabelai umpadenni tu da’dua bu’ku’ ba’tu da’dua anak dangan-dangan, ta’pung manisak pissan taa sangpulona epa napemalaran diona tu kasalan napogau’. Apa da nabolloi minna’, ba’tu naparokkoi dupa, belanna iamote tu misa’ suru’ pengkalossoran.
12La nabaa lako to minaa, anna alai to minaa diong mai sangraku’ dipopemala’ kapengkilalan sia natunu dao inan pemalaran dao pemala’ pantunu dipemalaran lako PUANG; iamote tu misa’ suru’ pengkalossoran.
13Susimoto tu to minaa la umpadenanni kadiseroian kasalan tu tau iato napobua’ kasalan napogau’ diona misa’ te apa iate anna dipagarri’. Na iatu la’binna iamo napotaa to minaa, susi diona kande dipemalaran.
Diona suru’ pangakuan sala
14Ma’kadami tu PUANG lako Musa Nakua:
15Iake denni tau tang maruru’ sia tang naangga’i umpogau’ kasalan diona apa dipamaindanan PUANG, la napemalaran lako PUANG tu misa’ domba laki tu tae’ tattanna dio mai domba sia bembe’ diposuru’ pangakuan sala, la usseroi tu kasalanna, na iatu angga’na dibutunganni unturu’ sikele’ salaka, iamotu pada gasa sikele’ maindan.
16Iatu maindanna tu naposala la nasondai sia la narangnganni pole’pa pissan taa ma’pellimanna; la nabaa lako to minaa anna to minaa umpadenanni kadiseroian kasalan tete dio domba laki iato tu diposuru’ pangakuan sala, namane dipagarri’.
17Iake denni misa’ tau kasalan sia umpogau’ misa’ apa tu Nagagai PUANG, anna tae’ naissanni manassa sala ia sia napassan kalena tu kakadakeanna.
18La nabaa lako to minaa tu misa’ domba laki, dio mai domba sia bembe’ tu tae’ tattanna dibutunganni angga’na, diposuru’ pangakuan sala, anna to minaa la umpadenanni kadiseroian kasalan diona tu apa napogau’ natae’ naangga’i namane dipagarri’.
19Iamote tu misa’ suru’ pangakuan sala; naseroi tonganmi tu kasalanna lako PUANG.