Dual PanelYusuf ussembang tindona da’dua tau lan pa’tarungkuan
1Denmi pissan tonna mangka tu mintu’nate, iatu pa’kampa pangiru’na datu Mesir sia pa’kampa kandena ungkadakean penaa puangna, iamotu datu Mesir.
2Sengke tonganmi tu Firaun lako to parea mase’ponna sola duai, tu pangulu pa’kampa pangiru’ sia pangulu pa’kampa kande.
3Napattangmi sola duai lan banuanna pangulu pekampa tongkonan layuk, tu naninna duka Yusuf ditarungku lan.
4Napasibaami Yusuf pangulu pekampa tongkonan layuk tu tau sola duai kumua naparakai; ba’tu sangapami lan pa’tarungkuan sola duai.
5Ma’tindomi sola duai tu tau iato, pantan den tindona lan to sangbongi, sia pantan den battuananna tu tindona, la iatu pa’kampa apa diiru’ la iatu pa’kampa kandena datu Mesir, tu dipattang lan pa’tarungkuan.
6Iatonna melambi’ dio mai saemi tu Yusuf lako to tau da’dua, natiroi masussa sola duai.
7Nakutanaimi Yusuf tu parea mase’ponna Firaun sola duai, to nasolan lan pa’tarungkuan dio banuanna puangna, nakua: ma’apai narondon bang tu lindomi te allo?
8Nabalimi nakua: Mangkakan ma’tindo, apa tae’ misa’ tau indete la ussembangi. Nakuami tu Yusuf lako: Tang Puang Matuaraka umpoissanni tu battuananna; pokadan siana’ mai tu tindomi.
9Narundunammi pangulu pa’kampa pangiru’ lako Yusuf tu tindona, nakua: Lan tindoku den kutiro dio tingayoku tu sangto’ garonto’ anggoro’.
10Iatu garonto’ anggoro’ iato den tallu tu tangkena, mane mellolo natiballa’o tu ta’binna sia iatu burena silelemo matasak tu bua anggoro’ dio.
11Iatu irusanna Firaun kutoe angku alai tu bua anggoro’, kuparrai tama irusanna Firaun, kumane umpennoloanni tu irusan iato lako Firaun.
12Nakuami tu Yusuf lako: Susite tu battuananna: iatu tallu tangke battuananna tallung allo.
13Tallung allopi anna angka’komi Firaun sia napasulekomi tama toemi ammi pennoloan polei tu irusanna Firaun lako susitu biasanna tommi ma’kampa pangiru’pa.
14Apa kilalai siana’, ke torro melomokomi, katuru-turuina’ sia pokada melona’ lako Firaun, ammi patassu’na’ lan mai te banua pa’pattangan.
15Belanna iatu aku te naboko bangra’ tau lan mai tondok to Ibrani, inde duka mai tae’ tu apa kupogau’ tu sipatu nanii tau umpatamana’ te lo’ko’.
16Ta’kala tonna tiromi pangulu pa’kampa kande tu battuananna tindona solana kumua melo, ma’kadami lako Yusuf nakua: Aku duka lan tindoku den tallu bakku’ inan deppa kududung.
17Iatu inan deppa tu iringna daona lu nanii ma’rupa-rupa kande-kandena Firaun, panggaraganna panggaraga roti; nakandemi manuk-manuk lan mai inan deppa dao ulungku.
18Mebalimi tu Yusuf nakua: Susite tu battuananna iatu tallu bakku’ battuananna tallung allo.
19Tallung allopi naangka’i Firaun tu ulummi, anna toke’i tu batang kalemi dio to’ kayu namintu’ manuk-mauk la sae ungkandei tu duku’mi!
20Iatonna ma’tallung alloammo tonna allo kadadianna Firaun napadenanmi misa’ pa’maruasan tu mintu’ pareana anna angka’i tu pangulu pa’kampa pangiru’ sia naangka’ tu pangulu pa’kampa kande dio tingayona mintu’ pareana.
21Napatamai tu pangulu pa’kampa pangiru’ tama toena sule, kumua napennoloan polei tu irusan lako Firaun.
22Apa iatu pangulu pa’kampa kande natoke’ susitu nabattuananninna Yusuf lako sola duai.
23Tae’ duka nakilalai pangulu pa’kampa pangiru’ tu Yusuf, sangadinna nakalupai.