Dual PanelDiona inan pemalaran dinii mantunu
1La unggaragaiko misa’ inan pemalaran kayu simmin, limang siku lambe’na na iatu sangka’na limang siku duka naurunganni massulapa’ a’pa’ tu inan pemalaran iato, na tallung siku langka’na.
2Sia iatu tandukna la mugaragai dio to a’pa’ tetukna sia la mupasikande mugaraga tu tandukna, ammu kallasa’i tambaga.
3Sia la mugaragan tu kurinna, tu la dipatamai au sia pesodokna sia pindan pa’pi’pikanna sia petossokna sia peruayanna; mintu’ pareanan iato tambaga la mugaraga.
4La mugaragampa sala’bi’ ma’rupa dalla’ tambaga sia dio a’pa’ tetuk sala’bi’ la mugaragan a’pa’ komba tambaga.
5Ammu padioi biring inan pemalaran sia diongna lu, naurunganni iatu sala’bi’ la rampo tama tangnga inan pemalaran iato.
6Sia iatu inan pemalaran iato kayu simmin la mugaraganni tu bulleanna sia kallasa’i tambaga.
7Iatu bullean iato la diulu tama kombana bullean iato dio sa’de inan pemalaran patomalinna, kumua anna ma’din dibulle.
8La murinding papan; susitu mangka Napatiroangko Puang dao buntu, susi dukamo la napogau’ tau iato mai.
Diona tarampak kema
9Sia la mugaragapa tu tarampak kema; mintu’ tu tenda rampe sau’na bannang lenang melo dikaridi’ la digaraga; saratu’ sikunna tu landona dao sangsesena;
10sia la den lentongna duangpulo, dilette’i tambaga duangpulo sia mintu’ pekadangna sia tokeranna salaka digaraga.
11Susi dukato tu rampe rekkena unturu’ landona tu tenda; la saratu’ sikunna tu landona, sia la den lentongna duangpulo, dilette’i duangpulo tambaga sia mintu’ pekadangna sia tokeranna salaka digaraga.
12Sangka’na tarampak dio rampe matampu’ la limangpulo siku tu tendana, na sangpulo tu lentongna situang lette’.
13Susi dukato tu sangka’ tarampak rampe matallona la limangpulo siku.
14Sia sangpulo lima siku tu tenda dio sangsesena, na tallu tu lentongna situang lentekna.
15Sia sangpulo lima siku tu tenda dio sangsesena pole’o natallu tu lentongna situang lette’na.
16Dio to ba’ba tarampak iato la den misa’ kulambu duangpulo siku bannang ma’rupa lango-lango sia lango-lango makaseda sia karamisi sia bannang melo dikaridi’ misa’ pa’tannun paruki’ na a’pa’ tu lentongna situang lette’na.
17Mintu’ te lentong iate tiku lao tarampak napasikande mintu’ tokeran salaka; iatu pekadangna salaka na iatu lette’na tambaga digaraga.
18Iatu tarampak iato la saratu’ siku landona sia sangka’na limangpulo siku patomali sia langka’na lima sikunna, tu bannang lenang dikaridi’ digaraga na mintu’ tu lette’na tambaga.
19Iatu pareanan kema tu dipake umpabendanni, sia petangki’na sia petangki’ lentong lu ba’ba, tambaga nasang digaraga.
Diona minna’ palita
20La musua tu mintu’ to Israel umbangko minna’ bua saitun dilambuk sia malino, la dipatama palita, anna tontong dukku tu palita iato.
21Lan tu tenda kasitammuan dio salian kulambu tu dio olona kasa’bian, la napasakka’ Harun sia mintu’ anakna muane dio oloNa PUANG randuk dio mai makaroen sae lako melambi’; iamote tu misa’ aluk dipondok matontongan lako mintu’ to Israel la nasiosso’i.