Dual PanelMusa sola Harun dio olona Firaun
1Mangkato malemi tu Musa sola Harun mennolo lako Firaun, anna ma’kada nakua: Susite tu kadanNa PUANG, Kapenombanna to Israel: Eloranni tu mintu’ taungKu male, anna memala’ lako Kaleku lan padang pangallaran.
2Apa mebali tu Firaun nakua: Mindara tu PUANG, tu sipatu la kuturu’ kadanNa sia unneloranni tu to Israel male? Tae’ kutandai tu PUANG iato sia tang kueloran tu to Israel male.
3Nakuami Musa sola Harun: Sitiromokan tu Kapenombanna to Ibrani, iamoto elorammokan sola nasang male lan kalingkan tallung allo mambelanna tama padang pangallaran la memala’ lako PUANG, Kapenombangki, da anNa sae umparampoikanni ropu ba’tu kandean pa’dang.
4Ma’kadami tu datu Mesir lako nakua: E Musa sola Harun, ma’apai ammi patadangi tu to buda lan diamanna. Malekomi lako pa’diamammi!
5Sia nakuapa Firaun: Iatu to kamban buda kadakemo lan tondok iate, ammi la umpatadangopi dio mai pa’diamanna!
6Iamoto nama’kada tu Firaun allo iato lako mintu’ kapala bandoro’ sia bandoro’ tu untiro to buda, nakua:
7Damo mibenni dalame dita’tak-ta’tak tu tau la napantunui batu susi sangmai’ sia duangbongi’, sangadinna ia kalena la male undaka’i,
8sia patage’i batu tu tau iato pada budanna tu nagaragai sangmai’ sia duangbongi’, da mipasosso’i, belanna napopaningo-ningoan bangri lumingka, iamoto nama’kada nakua: Elorangkanni male angki memala’ lako Kapenombangki.
9La dipabokkokki tongan pa’diaman, anna karangi, da natolo’ talinga kada tang tongan.
10Tassu’ nasangmi tu mintu’ bandoro’ lompo sia bandoro’ untiro to buda, anna ma’kada lako to buda nakua: Susite tu kadanna Firaun: Tae’mo mila diben dalame dita’tak-ta’tak.
11Male kalenakomi unnalai tu dalame umba-umba tu minii unnappa’i apa iatu diamammi tae’ra la dipasosso’.
12Sisarak-sarakmi tu to buda lan lu mintu’ tondok Mesir la urrampun dalame la dita’tak-ta’tak.
13Naula’mi mintu’ bandoro’ lompo tu tau iatu mai anna kuanni: Mangkai tu pa’diamammi, iamotu borongammi susi biasanna tonna denpa dalame dita’tak-ta’tak.
14Mintu’ tu bandoro’na to Israel, tu napapatui borongan bandoro’ lompona Firaun, nalonga’ bandoro’ lompona Firaun, anna ma’kada nakua: Ma’apai natae’ mimangkai tu panglallang batu borongammi, la allo iate la iongi’, susito lendu’na?
15Iamoto namale tu mintu’ bandoro’na to Israel mennolo lako Firaun, anna ma’kada nakua: Ma’apari anna ma’pasusito tu puangki lako kaunanna?
16Tae’ nabenni dalame dita’tak-ta’tak tu kaunanmi, anna ma’kada nakua: Garagai tu batu. Kami tu nalonga’, apa taunna ia puang tu sala!
17Ma’kadami Firaun, nakua: Mipopaningo-ningoan bang lumingka, ondongpi mipopaningo-ningoan bangri, ammi ma’kada: Elorangkanni male, angki memala’ lako PUANG.
18Iamoto malemokomi totemo ma’diama; tae’ mila diben dalame dita’tak-ta’tak, apa inang la ganna’ bilanganna tu batu mipatama.
19Attu iato naissanmi mintu’ bandoro’na to Israel, kumua kadakemo tu apa urrampoi, belanna dipokadammo, kumua: Tae’ mima’din umpasosso’i tu batu, iamotu borongammi kiallo-kiallo.
20Iatonna tassu’mo dio mai olona Firaun tu tau iato mai, sitammumi Musa sola Harun, tu bendan ungkampai.
21Ma’kadami tu tau iato lako: Kenna tiroorokomi PUANG sia Napaolaikomi salu, belanna mipakadake lelemokan lako Firaun sia lako mintu’ pareanna natumang kadammi, butung-butung to mipatangkei pa’dang la umpateikanni.
Ma’penduanNa PUANG ussua Musa male lako Mesir
22Sulemi tu Musa mennolo lako PUANG, nakua: O Puang, ma’apari amMi parampoi kakadakean te bangsa iate? Ma’apa dukari amMi suana’?
23Belanna randuk to attu kunii umpennoloi Firaun la umparampoanni tu kadamMi, ta’pa napogau’ tu kakadakean lako bangsa iate, anna tae’ra Mirampananni tu taumMi.