Dual PanelTo mangra’ta’ kara-kara tang malambu’
1Napokadan pole’omi Yesu misa’ pa’pasusian lako tinde tau la umpamalesoi, kumua, sipatu tau la massambayang nenne’, da narayang.
2Nakua: Lan misa’ tondok den misa’ to mangra’ta’ kara-kara tae’ namataku’ langngan Puang Matua, sia tae’ bang tau nasanga moi misa’ duka.
3Lan tondok iato den misa’ baine balu messule-sule bang loo mennolo lako, nakua: Pakaloloampakan dikka’ te kara-karaki.
4Lendu’mo masainna moka bang tu to mangra’ta’ kara-kara, apa undinna nakuami lan penaanna: Moi natae’ kumataku’ lako Puang Matua sia moi tae’ bang tau kusanga misa’ duka;
5apa belanna nasussai bangna’ te baine balu iate, dadi la kura’ta’mo tu kara-karana, undinna manii nasae nakaramussangmo’.
6Nakuami Puang: Perangiimi tu kada napokada tu to mangra’ta’ kara-kara bimbang.
7Tae’raka nala umpakaloloi Puang Matua tu kara-karana mintu’ to Napilei, tu napalakunna nametamba-tamba lako keallo kebongi sia maremparaka ungkilalai tu tau iato?
8Kukua lako kalemi: Manassa madomi’ la Napakaloloan tu kara-karana tinde tau. Apa iake saeI tu Anak rampan dilino, la ungkabu’tuiparaka kadipatonganan lan te lino?
Papasusian diona to Farisi sia passima
9Napokadan pole’omi Yesu te pa’pasusian iate lako tu tau ussanga kalena malolo sia ussayu bang mintu’ to senga’:
10Den da’dua tau kendek langngan banuanNa Puang Matua la massambayang, iatu misa’ to Farisi na misa’ passima.
11Ke’de’mi tu to Farisi massambayang lan penaanna, nakua: O Puang Matua! ma’kurre sumanga’na’ lako Kalemi, belanna aku te tae’ kususi to senga’, to unnalai bang apanna tau, ba’tu to matampo, ba’tu to pasandak salu lako rampanan kapa’, ba’tu susite passima iate;
12lan sangminggu sipenduanna’ ma’puasa sia ianna dipa’sangpulo tu mintu’na apangku, sangtaanna bang kupa’kamasean.
13Iatu passima mambela-bela tu nanii ke’de’, moi mentingara langngan langi’ tae’ nasarai, sangadinna ussa’pa-sa’pa ara’na, nakua: O Puang, ala masena’, aku te misa’ to kasalan!
14Kukua lako kalemi: iate tau iate diseroi sule lako banuanna, apa iatu tau ina’ tae’, belanna minda-minda umpamadoan bang kalena, iamo la dipamadiongan, na minda-minda umpamadiongan kalena, iamo la dipamadoan.
Puang Yesu unneloran pia’-pia’ sae lako Kalena ( ; )
15Nasolan dukami tau tu pia’-pia’ lako, kumua anNa kaka’i Yesu tu kalena. Iatonna tiromi anak gurunNa tu iannato, nasarabaimi tu tau.
16Apa Natambai Yesu tu pia’-pia’ sae urreke’i, Nakua: Popa’elo’nai tu pia’-pia’ sae lako Kaleku, da migagai, belanna iamotu to susite tu unnampui ParentaNa Puang Matua.
17Kukua mati’: Tonganna minda-minda tu tang susi pia’-pia’ untarima ParentaNa Puang Matua, la tama lenorika!
To sugi’ mangura
18Denmi misa’ to kapua mekutana lako nakua: O Guru masokan, apara tu sipatu la kupogau’, angku pomana’ katuoan sae lakona?
19Nakuami Yesu lako: Ma’apari musangaRa’ masokan? Tae’ tau misa’ duka masokan sangadinna Misa’ri, Ia manna tu Puang Matua.
20Manassa mutandai sia tu Sukaran alukNa Puang Matua kumua: Da mupasandak salu lako rampanan kapa’, da mupapatean, da muboko, da musa’bi tang tongan; kasiri’i tu ambe’mu sola indo’mu.
21Nakuami tu tau iato: Mintu’na to inang kupenandaimo tempon dio mai bitti’ku.
22Iatonna rangimi Yesu to, Nakuami: Misa’pa tu musala. Balukampi tu mintu’na apa-apammu, ammu taa-taai lako to mase-mase, ammu ampui ianan lan suruga, mumane male mai undi urrundu’Na’.
23Apa iatonna rangimi, lendu’mi rossona penaanna, belanna sugi’ kapua tongan.
24Iatonna tiromi Yesu, Nakuami: Tang pada malia’na lako to unnampui ianan tu la tama ParentaNa Puang Matua!
25Belanna malomo sia ia misa’ unta tama to’tok darun ke la to sugi’mora tama ParentaNa Puang Matua.
26Nakuami tu mintu’ to urrangii to: Iake susito, mindapa tu la unnappa’ kasalamaran?
27Nakuami Yesu: Iatu nasanganna tolino tae’ nadadi tae’ natang dadi ke Puang Matua.
La maupa’ tu to untampe apa dio kalena belanna ParentaNa Puang Matua
28Iatonna iato nakuami Petrus: Manassa kitampe nasangmo, angki undi urrundu’Komi.
29Nakuami Yesu lako: Tonganna tu kadangKu mati’, kumua tae’ tau tu untampenamo banuanna, ba’tu bainena, ba’tu siulu’na, ba’tu indo’ ambe’na, ba’tu anakna tu belanna ParentaNa Puang Matua,
30tu tang la unnappa’ pole’i ba’tu pempiran-piran manglokkon totemo, sia katuoan sae lakona dio lino undi.
Ma’pennannanna Puang Yesu umpokada kamapa’diranNa ( ; )
31Iatonna iato natambaimi tu anak gurunNa sangpulo dua namale sola, Nakua: Manassa la malemiki’ langngan Yerusalem, dadi iatu mintu’na mangka nasura’ mintu’ nabi tu diona Anak rampan dilino la diganna’imo.
32Belanna la disorong lako to kapere’, natelle-telleI tau sia naa’ga-a’ga sia natittuduI;
33ianna mangka ullongkan-longkanNi, la napateI, na allo ma’pentallun, Namalimbangun sule.
34Tae’ bangmi misa’ natandai tinde tau tu iannato sia iatu kada iato tae’ bang napebayangi, tae’ naissanni tu Napokadanna Yesu.
To buta dio Yerikho, disanga Bartimeus ( ; )
35Iatonna mandappi’mo lako Yerikho, denmi to buta unno’ko’ dio biring lalan malaku-laku.
36Iatonna rangimi tu to buda lendu’, mekutanami, nakua: To ma’apara te?
37Napokadammi tau lako kumua: Iamo Yesu to Nazaret tu lendu’.
38Metambami, nakua: O, Yesu, Anakna Daud, kamaseina’ dikka’!
39Nasarabaimi tinde to dolo, nasua ma’loko-loko, apa samandu-mandunnaora metamba nakua: O Anakna Daud! kamaseina’ dikka’.
40Tadangmi tu Yesu, Nasuami umbaai dio mai.
41Iatonna saemo urreke’i, Nakutanaimi lako Nakua: Apara mukamorai la Kupogau’ lako kalemu? Nakuami: O Puang, elo’namo ke pakita dukana’!
42Nakuami Yesu lako: Pakitako! manassa kapatonganammumo umpatuoko.
43Ta’pa pakita bang siami naundi urrundu’ Yesu umpakaraya Puang Matua. Iatonna tiromi mintu’ tau tu iannato, umpudi-pudi dukami Puang Matua sola nasang.