Alkitab Mobile SABDA
[VER] : [TORAJA]     [PL]  [PB] 
 <<  Mazmur 104 >> 

Kamala’biranNa PUANG payan lan mintu’ panampaNa

1Pudimi tu PUANG, e sumanga’ku! O PUANG, Kapenombangku, Kamumo tu ma’iringanna kapua; Kamumo tu umpobelo kakapuan sia kamala’biran.

2Kamu tu umpembungku’ arrang butung to parramba’ sia umballa’ langi’ butung to sampin tenda.

3Iamo umparandanganni lan to’ uai tu inan ma’duang papa’na, Ia umpokareta salebu’, Iamo sumalong-malong dao pani’ angin.

4Sia angin Naposumbungan lentek, sia api dukku Napokambutu’ maringngan.

5Iamo mangka unnoton lino dao parandanganna, naurunganni tae’mo nala tigega’ len sae lakona.

6Mangkamo Mipabungku’i tasik butung to parramba’, iatu mai uainna ungkabu’ mintu’ tanete.

7Belanna pa’pakarrangMi anna sore tu uai, sia belanna galugumMi tilulunmi tu uai mallai;

8anna kendek tu mintu’ buntu sia mere rokko tu mintu’ lombok dio inan Mipanniannamo parandanganna.

9Mangkamo Mikatonanni tu anggenna, tu tae’ nama’din nalendu’i, kumua da anna sule pole ungkabu’i te lino.

10Ia umpatikula’dak mata kalimbuang dio lu mintu’ lombok, tu lolong ussellak len mintu’ tanete;

11Sia umpairu’ mintu’ olo’-olo’ dio lu kapadanganna, sia ia duka tu mintu’ keledai lampung umpapaya ma’rangna.

12Dio to’ inan sikandappi mintu’ uai iato nanii messerang manuk-manuk; anna unnoni-noni dao lu mintu’ tangke kayu.

13Ia ussakka’i tu mintu’ buntu dao mai inan ma’duang papa’na, anna pedia’i bua pengkarangamMi te lino.

14Napakendek tu riu napotuoi olo’-olo’, sia iatu mai tananan la naposara’ tolino, anna pabu’tui tu tobangan kollong diong mai kuli’na padang.

15Sia uai anggoro’ tu umpasende tolino, sia minnak tu umpatibangka’ rupanna, sia bo’bo’ tu umpamalapu’ penaanna tolino.

16Mintu’ kayunNa PUANG la dipedia’i, ondongpi, mintu’ kayu arasi’ dio Libanon tu mangka Natanan.

17Tu nanii manuk-manuk messerang, sia iatu tambolang lolok buangin nanii messerang.

18Mintu’ tu buntu malangka’ napopasang bembe’ lampung, sia mintu’ buntu batu nanii mello’ko’ kalinti to’ batu.

19Puang umpadadi bulan dinii untandai attu, sia ia duka tu allo umpeloloi kabotoanna.

20IamMi paden malillin, bongimi, na attu iato mintu’ olo’-olo’ lan kurra manapa’ tassu’ menono’.

21Mintu’ anak singa unnurrung-urrung unnanga’ kandena, sia undaka’ kandena dio mai Puang Matua.

22Ianna dellekmo allo, tibalikmi sola nasangi, anna mamma’ lan lu lo’ko’na.

23Sunmi tu tau lako to’ pengkaranganna, sia masara’ sae lako makaroen.

24Tumba ia budanna tu mintu’ penggauramMi, o PUANG! Kamumo tu mangka ungkombong nasangi to tete dio kamatarrusamMi; anna ponnoi pa’padadimMi tu lino.

25Iatu tasik pada kapuana to sia maluanganna, nanii olo’-olo’ sisayoan tang dikemba’ dibilang, la bitti’na la kapuana.

26Nanii sisayoan mintu’ kappala’, sia nanii Lewiatan tu mangka Mipadadi kumua amMi sipaningo.

27Mintu’i massola nasang umpeagiKomi, kumua amMi tadoanni kandena, ke allu’nami.

28IamMi tadoanni lako, narampunmi, sia iamMi bungka’ pala’Mi, dipedia’i nasang kameloan.

29IamMi buni lindoMi, tirambanmi, sia iamMi alami tu penaanna, matemi, anna sule lako litak.

30IamMi sua PenaamMi, dadi bangsiami tu mintu’na, sia Mibangla’i tu kuli’na padang.

31Sangapaoi anna tontong sae lakona tu kamala’biranNa PUANG, sia sangapaoi anna posendei PUANG tu panggaraganNa.

32IanNa pata’pai mata tu lino, tiseno-senomi, ianNa tumbui tu mai buntu, merambumi.

33La umpenanianna’ PUANG angge tuoku, sia la umpakendekanna’ pa’pudian Kapenombangku ke ten siapa’ to.

34Sangapaoi anna alai penaanNa tu mintu’na lalan ba’tengku! Iate aku la parannu paimanna’ lan PUANG.

35Iatu mintu’ to umparri-parri kasalan la roto’ lan mai lino, sia tappu tu mintu’ to tang mekaaluk. Pudimi tu PUANG, e sumanga’ku. Haleluya!


  Share Facebook  |  Share Twitter

 <<  Mazmur 104 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel