Alkitab Mobile SABDA
[VER] : [TORAJA]     [PL]  [PB] 
 <<  Mazmur 115 >> 

Mintu’ kadipangkeran lu lako nasang Puang Matua

1O PUANG, tae’ anna kami, tae’ anna kami, sangadinna sangamMiri tu sipatu dipakala’bi’, tu belanna kamasokanamMi sia diona kamarurusamMi.

2Ma’apari anna la sumura tu mintu’ to kapere’ kumua: Umbamira tu Kapenombanna?

3Iatu Kapenombangki dao mai suruga, mintu’ pa’poraianNa Napogau’ Ia.

4Iatu mintu’ rapang-rapang napodeata tau iato mai salaka sia bulaan digaraga, panggaraga lima tolino.

5Den tu pudukna, apa tae’ anna ma’kada, den tu matanna, apa tae’ anna pakita,

6den talinganna, apa tae’ anna parangi, sia den duka tu illongna, apa tae’ anna manguduk.

7Den tu limanna, apa tang panggega’, sia den duka tu lentekna, apa tae’ anna titengka, sia den deko-dekona, apa tae’ anna sumu.

8Iatu to unggaragai to, la ten to apa iato, susi dukato tu to umposande’i.

9E Israel, la sande’ko lako PUANG, Iamo patunduanna sia balulangna.

10E mintu’ bati’na Harun, sande’komi lako PUANG, Iamo patunduanna sia balulangna.

11E kamu mintu’ to ungkataku’ PUANG, sande’komi lako PUANG! Iamo patunduanna sia balulangna.

12Nakilalaimiki’ PUANG sia la Napamasakkeki’, la Napamasakke tu bati’na Israel,

13sia la Napamasakke tu mintu’ to ungkataku’ PUANG, la bitti’ la kapua.

14Sangapaoi anNa popemba’ka’komi PUANG, la kamu la bati’mi.

15Kamumo tu to Napamasakke PUANG, tu Puang mangka ungkombong langi’ na lino.

16Iatu langi’ langi’na PUANG, apa iate lino Naba’giammo ma’rupa tau.

17Tae’ anna ia tu to mate la umpudi PUANG, ba’tu to lendu’mo rokko ma’allun-allunna.

18Apa kitari te, tu la umpudi PUANG, randuk totemo landa’ sae lakona. Haleluya!


  Share Facebook  |  Share Twitter

 <<  Mazmur 115 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran