Dual PanelPassambayang malaku dirinding pala’ dio mai mintu’ uali
1Lu lakona pangala sengo. Pa’pudianna Daud. (140-2) O PUANG, rampananna’ dio mai to kadake, sia rinding pala’na’ dio mai to masa’ga’,
2(140-3) tu untannun sanda kadake lan ba’tangna, sia kiallo-kiallo umpabu’tu kasipakkan.
3(140-4) Tau iato mai umpamataran lilana susi ula’, sia dio randan pudukna tu ipo ula’ rakke’. Sela
4(140-5) O PUANG, rinding pala’na’ dio mai limanna to tang mekaaluk, sia kulambu tarunona’ dio mai to masa’ga’, tu morai la umpatilende’na’.
5(140-6) Iatu to matampo natananni bunina’ poya sia ulang, nae’te’ tu bunde dio biring lalan, sia natanannimo’ ba’tikan. Sela
6(140-7) Kukuami lako PUANG: Kamumo tu Kapenombangku, tananni talingamMi tu pengkamoyaku, o PUANG.
7(140-8) O PUANG, Puangku, patunduan matoto’ku, Misarongi tu ulungku ke tiosokki lempo kasirarian.
8(140-9) O PUANG, da Mipalolo’i tu pa’poraianna to tang mekaaluk, sia da Mipadanunni tu kasiturusan kadakena, da anna madongnga’. Sela
9(140-10) Nake nasamboi ipona sia kada kadakena sule tu mintu’ to umpatama limbuna’.
10(140-11) Nake nasamboi ruaya tu tau iato mai; sia nake Napembuanganni Puang tama to’ api sia rokko posi’na tana, da nabangun sule.
11(140-12) Iatu to pa’palele bekoan tae’ anna marendeng lan lino, sia la naula’ sumpu kamandasan tu to masa’ga’, anna sabu’i,
12(140-13) Kukanassai kumua Nasanda tonganni PUANG tu to dipandasa, sia katongananna to mase-mase.
13(140-14) Tonganna kumua iatu to malambu’ la umpudi sangamMi, sia iatu to bulo lollong la unnisung dio oloMi.