Dual PanelNanian pa’kurre sumanga’ belanna mintu’ pa’kamaseNa Puang Matua
1Lu lakona pangala sengo, Misa’ nanian pa’pudian. (67-2) Anna Puang Matuamora ungkamaseiki’ sia umbura’ki’ lindo masakke, sia umpaarrangiki’ rupanNa, Sela
2(67-3) Anna tandai tau lan te lino tu lalanMi, sia natandai duka mintu’ bangsa tu kasalamaran lu dio mai Kalemi.
3(67-4) Sangapaoi anna pudiKomi mintu’ bangsa, o Puang Matua; ondongpi mintu’ bangsa massola nasang la umpudiKomi.
4(67-5) Sangapaoi anna mintu’ to sangpetayanan parannu-rannu sia sila’tekan, belanna Mipaolai maloloi salunna tu mintu’ bangsa, sia Mipatudu lalan tu mintu’ to sangpetayanan lan te lino. Sela
5(67-6) Sangapaoi anna pudiKomi mintu’ bangsa, o Puang Matua, ondongpi mintu’ bangsa massola nasang la umpudiKomi.
6(67-7) Iatu padang umpakendekmo burana, na Puang Matua, Kapenombanta, umpamasakkeki’;
7(67-8) Napamasakkeki’ Puang Matua, sia mintu’ randan langi’ la ungkabangnga’i.