Alkitab Mobile SABDA
[VER] : [TORAJA]     [PL]  [PB] 
 <<  Mazmur 69 >> 

Passambayangna to malambu’ tu narampoi parri’ sia bayo-bayo kamatean

1Lu lakona pangala sengo. Unturu’ baenan sengo bunga bakung. Pa’pudianna Daud. (69-2) Lendokanna’, o Puang Matua, belanna natu’ba’mo’ uai.

2(69-3) Tammanna’ rokko buka mandalan, tu tae’ makarra’na dinii mellese; sia tallanna’ rokko liku mandalan, tu nanii ungkabu’na’ uai.

3(69-4) Mata’ka’mo’ meongli’-ongli’, sia materrekmo tu barokoku, sia maraunmo tu matangku ma’penunu untayan Kapenombangku.

4(69-5) Iatu to ungkabiri’ punala bangna’ mandu buda ia anna lamba’ beluakku; sia pasau’ tu to la ussabu’ina’, tu bulituk unnualina’; naparukuna’ ussondai barang apa tang kurampa.

5(69-6) O Puang Matua, Miissan tu kabagangku, sia iatu mintu’ salaku tae’ anna karerungan dio mai Kalemi.

6(69-7) Da napolean siri’ tu mintu’ to untayanKomi kutumang, o Puang PUANGna mintu’ ma’dandan maritik, sia da naattangan tu mintu’ to undaka’Komi kutumang, o Kapenombanna to Israel.

7(69-8) Belanna Kamumora angku tanggung kadibe’sean, sia natoding siri’ tu lindoku.

8(69-9) Belanna butungmo’ to toyang tondok lako mintu’ siulu’ku, sia to tang siperambumo’ mintu’ to nadadian indo’ku.

9(69-10) Belanna kamakaritutuan diona banuamMi umpapuru’mo penaangku, sia mintu’ pabe’sena to umbe’seKomi, narampoimo’.

10(69-11) Iatongku parra uai matangku, angku popengkadiongan kaleku ma’puasa, ia duka nabe’seanna’ to.

11(69-12) Sia iatongku potamangkale karoro’ napoparumbasanna’ tau iato mai.

12(69-13) Mintu’ to ma’ misa-misa dio to’ babangan tondok ungkada-kadaina’, sia Naposengona’ to pangirusan.

13(69-14) Apa iatu aku te massambayangna’ mati’ Kalemi, o PUANG, ke attu kamasorokamMi, o Puang Matua, baliina’ pa’tunduan maruru’Mi, sitinaya kamasokanan kapuaMi.

14(69-15) Riu’na’ diong mai buka da angku tamman, rampananna’ dikka’ dio mai mintu’ to ungkabiri’na’, sia endekanna’ lan mai mintu’ uai mandalan;

15(69-16) da dikka’ nakabu’na’ uai saba’, sia da naorrosanna’ uai mandalan sia da nakemunna’ liku mandalan.

16(69-17) Tanding talingana’ dikka’, o PUANG, belanna marampa’ tu kamasokanamMi. Sailena’ sitinaya kamamasean kapuaMi.

17(69-18) Da Mitanannina’ boko’ te aku, taumMi, belanna pussakna’! Tanding talingana’ madomi’.

18(69-19) Reke’i tu sumanga’ku, sia lendokanni, rampananna’ dikka’ belanna mintu’ ualingku.

19(69-20) Miissan tu kadibe’seangku sia siri’ku sia attangangku, sia mintu’ to umpandasana’ bendan dio oloMi.

20(69-21) Iatu kadibe’sean urranna’mo penaangku, napourunganni langga’ tu kaleku, untayanna’ masena tau, apa tae’ra, sia untayanna’ to ma’pakatana, apa tae’ra.

21(69-22) Ondongpi pa’du nabenna’ tau iato mai kukande, sia napairu’na’ sukka tongku ma’rang.

22(69-23) Da’ito namendadimora poya tu medana dio tingayona, sia iatu to nasolan kumande mendadi misa’ ba’tikan.

23(69-24) Melo ke dipamaraunni tu matanna tau iato mai, natang pakita, sia diparumonting bang tu aakna:

24(69-25) Patu’ba’i kasengkeamMi tu tau iato mai, sia melo ke naruai kamare’dekanna ara’Mi.

25(69-26) Nake makarorrongi tu lili’na pangosokan tendana, nake tang nanii tau lan tu tendana.

26(69-27) Belanna naula’ sumpumo tu to mangka Mipata’pai parri’ sia naulelean tu kamapa’diranna tu mai to mangka Mibangkei.

27(69-28) Tompoi sala tu salana tau iato mai, naurunganni tang nalambi’ kadibilangan malolo dio mai Kalemi.

28(69-29) Nake dibutai lan sura’katuoan, sia iatu sanganna da nadisura’ dipasola sanganna to malambu’.

29(69-30) Apa iatu aku te mandasana’ sia mapa’di’na’, melo ke naongannina’ kamakarimmanan lu dio mai Kalemi, o Puang Matua.

30(69-31) La kupudi nanian tu sanganNa Puang Matua, sia la kupakala’bi’ nanian kurre sumanga’.

31(69-32) Mandu naala ia penaanNa PUANG tu iannato anna iatu sapi laki, ba’tu anak sapi tu ketanduknamo sia kekanukunnamo.

32(69-33) Iatu mintu’ to umpopengkadiongan penaanna la natiro tu iannato situang kaparannuan; melo ke pa’yakki tu penaammi, e kamu mintu’ to undaka’ Puang Matua.

33(69-34) Belanna Natanding talinga PUANG tu to tae’, sia mintu’ taunNa tu dipattang tae’ Natapa’.

34(69-35) La napudi langi’ sola lino tu Puang, sia mintu’ tasik sola mintu’ tu angge menono’ lan.

35(69-36) Belanna la Nalendokan Puang Matua tu Sion, sia la Nabangun sule tu mintu’ tondok Yehuda, anna nii to ma’tondok torro sia la namana’.

36(69-37) Mintu’ tarukna taunNa la umpomana’i, sia mintu’ to ungkamali’i tu sanganNa la torro lan.


  Share Facebook  |  Share Twitter

 <<  Mazmur 69 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel