Dual PanelSURA’ MA’PENNA’PA’NA: (PA’PUDIAN 90–106); Puang Matua Pentionganan matontonganna tolino tang marendeng
1Passambayangna Musa, to Natonno’ Puang Matua. O Puang, Kamumo tu mangka kipentilindungi tontong kisiosso’i.
2Tonna tang dikombongpa tu buntu, sia tonna tae’pa amMi randukki tu kuli’na padang anna lino, tempon dio mai landa’ lako attu disituran-turananni. Inang Kamumo tu Puang Matua.
3Kamumo umpasule tolino lako litak, Mikua ma’kada: Sulekomi, e mintu’ ma’rupa tau.
4Belanna iatu passangamMi sangsa’bu taunna, butungri to allo sangmai’ mane mangka lendu’, sia butung sangteponari bongi.
5Mipatallan tu tau iato mai; sia butung to mamma’ sule ke melambi’, sia ten to riu lobo’ tuona.
6Iake melambi’pi menta’bi sia lobo’, anna iake makaroenni sae, malayu anna marangke.
7Belanna sabu’kan diona kasengkeamMi, sia roto’kan diona kare’dekamMi.
8Midandan nasangmo dio oloMi tu mintu’ kakadakeangki, sia iatu kasalan membuningki naluangmo arrang oloMi.
9Belanna mintu’ allo katuoangki roto’mo diona kasengkeamMi, sia kiupu’imo tu katuoangki butung to tindo.
10Iatu mintu’ allo katuoangki, pitungpulo taunna, iake marendengkanni karua pulona taunna; apa iatu diposattuanna to, kamasussan manna sia karossoan, bellanna madoi’ bang lendu’, angki pa’de poton.
11Mindara unnissanni tu kuasa kasengkeamMi, sia kare’dekamMi, sipato’na kadikatakuramMi.
12Iamoto ada’ikan umbilang mintu’ alloki, angki appa’ penaa kinaa.
13MessailemoKomi, o PUANG! SangapaporoKomi tang la messaile? Ala masei tu mai taumMi.
14Pedia’i kamasokanamMi tu penaangki ke melambi’, angki mela’tek sia sende paiman angge tuoki.
15Pasendei tu penaangki sitinaya tu allo mangka Minii umpakario-riokan sia sitinaya taun kunii mangka untiro kamandasan.
16Sangapaoi anna payan lako mintu’ taumMi tu penggauramMi, sia payan lako lanto mimi’na tu kamala’biramMi.
17Sangapaoi anna rampoikan kamana-mananNa Puang Kapenombangki, sia patontongangkan tu lalan limangki, ondongpi iatu lalan limangki la Mipatontong.