Dual PanelAttu kasalamaranna mintu’ bangsa
1Penaniammi PUANG tu misa’ nanian ba’ru, sia penaniamMi tu PUANG, e mintu’ issinna lino.
2Penaniammi tu PUANG, sia pudii tu sanganNa; pasitarru’-tarru’i tu allo Minii umpa’peissanan kasalamaran lu dio mai Kalena.
3Pakaleleammi tu kamala’biranNa dio lu mintu’ bangsa, sia iatu penggauran kalle-kalleanNa dio lu mintu’ to sangpetayanan.
4Belanna pasareongan tu PUANG sia sipatu tongan dipudi, mandu metakuran Ia na mintu’ deata.
5Belanna iatu mai deatanna mintu’ bangsa, dipa’deatainna bangri, apa PUANG Ia tu ungkombong langi’;
6Dio oloNa tu tanda kabilangan sia kadipangkeran, anna kapaan sia kamala’biran lan inan maindanNa.
7E mintu’ suku bangsa, palulakoi PUANG, palulakoi PUANG tu kadipangkeran sia akui tu kuasanNa.
8Ondongpi palulakoi PUANG tu kamala’biranna sanganNa, pennoloanni tu pemala’, ammi tama tarampakNa.
9Tukkukomi menomba lako PUANG umpokassa’ pakean maindan, la ma’parondokomi dio oloNa, e mintu’ issinna lino!
10Pokadai dio lu mintu’ bangsa, kumua: PUANG untoe kapayungan, iamoto anna bantang tu lino, naurunganni tang tibendon; Puang tang pakayun bimbang la umpaolai salu tu mintu’ bangsa.
11Melo ke sende paimanni tu langi’, anna mela’tek tu lino, sia la mongngo’ tu tasik sola mintu’ issinna lan.
12Melo ke lo’dok to kaiyanganni tu padang sola mintu’ tu denna; attu iato mintu’ kayu lan pangala’ la unnarrak.
13Dio oloNa PUANG, belanna la sae, manassa la sae la umpaolai salunna lipu daenan; la Napaolai malambu’ salu te lino, sia mintu’ bangsa sitinaya kamarurusanNa.