PUANG Iamo Datu maserona to Israel
1PUANG tu untoe kapayungan – la ma’parondo mintu’ bangsa. Ia unnisungi karubion la rumonting te lino.
2Pasareongan tu PUANG lan Sion. Sia Iamo untongloi mintu’ bangsa.
3Sipatu mintu’ la umpudi tu kakapuanna sangamMi sia kametakuranna; Masero Ia.
4Belanna iatu kamatotoranNa Datu ungkabarii katonganan. Mangkamo Mipantok tu atoran malolo, sia mangkamo Mipogau’ tu katonganan sia kamaloloan dio lu bati’na Yakub.
5Pakala’bi’i tu PUANG, Kapenombanta. Sia tukkukomi menomba diong to’ pelleseanNa; Masero Ia.
6Iatu Musa sola Harun tama bilangan to minaanNa, na iatu Samuel tama bilanganna to umpengkamoyai sanganNa; mintu’i sola nasang pada meongli’ lako PUANG, sia Natanannimo talinga tu tau iato mai.
7Ma’kadami lanmai lentong gaun lako tau iato mai, anna karitutui tau iato mai tu mintu’ kasa’bianNa, sia iatu aluk Napondok Nasoronganni lako.
8O PUANG, Kapenombangki, Mitanannimo talinga tu tau iato mai, sia Kamumo napoKapenomban umpa’dei kasalan, moi amMi mangka umpakkanni tu penggauran kadakena.
9Pakala’bi’i tu PUANG, Kapenombanta, sia tukkukomi menomba umpennoloi buntu maindanNa, belanna masero tu PUANG, Kapenombanta.