Dual PanelNinewe ditalo sia disanggang
1Iatu tau ma’patisambo’-sambo’ ke’de’mo la ullaoiko; kampai tu tambakuku, ma’penniroko dio lu lalan, pori tu aakmu, pematoto’i tonganni tu kalemu.
2Belanna la Nabangun PUANG sule tu kamala’biranna Yakub, susi dukato tu kamala’biranna Israel, belanna mangkamo narampa to mangrampa sia nasanggangi tu tangke anggoro’na.
3Iatu balulangna mintu’ to lalongna mararang, sia iatu pa’barani ma’pakean karamisi; iatu karetana bendan umpoarrang bae’-bae’na susi api, ke allo kadipasakkaranna, sia mintu’ doke dipopangandu.
4Iatu mintu’ kareta sigalunturan dio lu lalan, sia sisarrukan dio lu mintu’ tana lapang; iatu arrangna susi dama’, sia susi kila’ sipellepa’-leparan.
5Nainaa-naamo tu mintu’ pa’baraninna – sasa-sasa tu tau iato mai anna tilende’, tikara-kara tu tau iato mai male lako rinding tembo’na –, apa sakka’mo tu papa menarana to ma’tumbuk tembo’.
6Iatu babangan dio mintu’ randan salu tibungka’mo, na iatu tongkonan layuk tiseno-seno.
7Upu’mo: iatu kota dipuraimo tu mintu’ apanna sia dipali’ tu pa’tondokan, na iatu mai kaunanna baine sumarro susi oni bu’ku’, namarassan ussa’pa-sa’pa ara’na.
8Iatu Niniwe susi misa’ limbong ponno uai randuk bendanna; totemo lolongmo tu uainna male. Tadangkomi, tadangkomi, apa moi misa’ tau tae’ tibalik.
9Rampai tu salaka, rampai tu bulaan! Tae’ upuranna tu mintu’ ianan makamban, iamotu kala’bianna ma’rupa-rupa ianan maballo.
10Mangsan, lo’bang, sanggang! pussak tu penaa, sia ma’parondo-rondomo tu mintu’ guntu’; iatu mintu’ aak sipa’dikan sia mintu’ lindo pa’de rupanna.
11Umbamira totemo tu lo’ko’ singa, umbara tu inan dinii umpakande singa mangura, tu nanii lumingka singa laki sia singa birang sola anakna sia moi misa’ tae’ tau umpatirambanni?
12Umbara nanii tu singa, tu undammak pealanna la naben anakna sia untakessekki tu apa nadammak la naben birangna, sia umponnoi pangrampa tu lo’ko’na sia iatu inanna naponnoi apa nase’bu-se’bu?
13Manassa la Kulaoiko!, kadanNa PUANGna mintu’ ma’dandan maritik, la Kuballa nasang tu karetamu namerambu; iatu mintu’ singa mangurammu la nakande pa’dang, sia iatu pangrampamu la Kupisanni dao mai kuli’na padang, sia iatu gamaranna mintu’ sumbungan pudukmu tae’mo nala dirangi len.