Dual PanelTae’ gai’na tu kaparannuan napabu’tu kameloan lan lino
1Ma’kadamo’ lako kaleku kukua: Totemo la kupatobaiko kaparannuan, iamoto popaimanni tu kameloan. Apa manassa tae’ duka gai’na tu iannato.
2Diona kametaan kukua bangmi: Kabagan iato; sia diona kaparannuan kukuami: Apara napabu’tu to?
3Kuparessa duka tu penaangku angku pemanamanni kaleku unniru’ uai anggoro’ – na iatu penaangku umpasirundunanni tu iannato diona kakinaan – sia unturu’ katangpaissanan, sae lako kutiro tu apa losong melona la napogau’ ma’rupa tau tu nasambo langi’ lan katuoan tang masae lako.
4Kupogau’mo tu mai apa kapua, iamotu umbangunmo’ banua sia untanannimo’ ba’tu pira-pira pa’lak anggoro’,
5sia kugaragaimo tu pa’lak bunga sia pa’lak kutananni ba’tu pirang-pirang rupa kayu membua,
6sia kugaragaimo tu ba’tu pira-pira limbong, nanii tassu’ uai la ussakka’i tu pangala’ mane ditananni kayu.
7Kuallimo tu ba’tu pira-pira kaunan muane sia kaunan baine, sia ba’tu pira-pira dukamo tu dadi lan banuangku; sia kuampui duka tu sapi sia domba sia bembe’ buda tongan, tu mandu buda na iatu apanna mintu’ to dolo dio Yerusalem na aku.
8Kurampunan dukamo kaleku tu bulaan sia salaka, sia ianan nabaa datu senga’ sia napabu’tu negara senga’; kupadenammo kaleku tu to menani muane sia to menani baine sia iatu mai apa umpoparannu tolino, iamotu ma’rupa-rupa kamaruasan.
9Susimoto tu kataromposangku sia kasugirangku losong na iatu to dolo dio Yerusalem na aku; lan mintu’nato tontong bang tu kakinaangku urrondongna’.
10Moi misa’ apa tu nakamorai matangku tae’ kusakkalanganni, sia tae’ kudampai tu penaangku dio mai kaparannuan moi misa’ duka, ondongpi iatu penaangku umpoparannu mintu’ sara’ku, na iatu mintu’nato iamo bunga rangka’ku.
11Iatongku messaile lako mintu’ panggaraga limangku, sia lako sara’ tu kunii mara’ta’ la ungkarangi tu iannato – manassa iatu mintu’nato tae’ gai’na sia susito unnula’ angin sia tae’ kamauparan lan naarrang matanna allo.
12Mangkato messaileomo’ la untiro kakinaan sia kabagan sia katangpaissanan, belanna umba nakua tu tangnga’na tau tu la ussonda datu tu diona apa mangka napogau’ datu?
13Manassa kukanassaimo, kumua iatu kakinaan losong melona na iatu kabagan, susi kamasiangan losong melona na iatu kamalillinan.
14Iatu to kinaa unnampui mata la mentiro, apa iatu to baga lolang lan kamalillinan; apa kukanassai duka, kumua misa’ri lampak urrampoi tu mintu’ tau iato.
15Sipa’kadamo’ kaleku kukua: Iatu apa urrampoi to baga, narampoi dukana’: Apara gai’na angku tarru’ kinaa? Iamoto kusipa’kada kaleku kukua! Ia duka tu apa iato tae’ gai’na.
16Belanna iatu kadikilalaianna to kinaa sia to baga pada tae’ bangmo, belanna lan allo la sae masaimo dikalupai tu mintu’na to; a’adikka’ umbara nakuato, anna pada mate bangsia tu to kinaa sia to baga!
17Iamoto kukagi’gi’mi te katuoan iate, belanna kadake dio pentiroku tu pengkarangan dipogau’ lan naarrang matanna allo; iatu mintu’nato tae’ gai’na sia susiki’ to unnula’ angin.
18Ondongpi, kukagi’gi’ tu mintu’ sara’ku, tu kunii mara’ta’ lan naarrang matanna allo, belanna inang la kutampean to undi na aku.
19Sia mindara untandai, ba’tu to kinaaraka, ba’tu to baga; moi nasusi to iamo la ungkuasai tu mintu’ apa kukara’ta’i sia kukarang situang kakinaangku lan naarrang matanna allo; ia duka tu apa iato tae’ gai’na.
20Iamoto tibalikmi tu penaangku tang urrannuammo sara’ku tu kunii mara’ta’ lan naarrang matanna allo.
21Belanna moi nakara’ta’i tau tu misa’ pengkarangan situang kakinaan sia kapaissanan sia kamanarangan, inang la natampe napotaai to tang ungkara’ta’i. Ia duka tu apa iato tae’ gai’na sia kadake tongan.
22Apara poleanna tu tau diona mintu’ sara’na sia mintu’ apa naanga’ penaanna, tu nakara’ta’i lan naarrang matanna allo.
23Ke ungkarangi pengkaranganna lan mintu’ allo katuoanna situang kamasussan sia karossoan, sia moi mabongi tae’ narapa’ penaanna? Ia duka tu apa iato tae’ gai’na.
24Iatu tolino tae’ kuasanna la kumande sia mangiru’ sia la napomanaman tu diona bunga rangka’na; iate iannate kukanassaimo kumua lu dio mai limanNa Puang Matua.
25Belanna mindara tu ma’din kumande sia mindara tu ma’din umpamanaman kalena, ke tangia pa’poraianNa Puang.
26Belanna iatu to melo dio pentiroNa Puang Naben kakinaan, kapaissanan sia kaparannuan, apa iatu to tae’ naalai penaanNa, Napatakoi pengkarangan la mangrampun sia ma’pakombong, kumua anna sorongi lako minda-minda tu naala penaanNa Puang Matua. Ia duka tu apa iato tae’ gai’na sia susito unnula’ angin.