Dual PanelKadipamaseroanna kasalan napobua’ to mate dipongko tu tang ditandai
1Iake diappa’i lan tondok tu la Nasorongangko PUANG, Kapenombammu, mupoapa, tu misa’ to dipatei, sumpandan dio padang, anna tae’ natandai tau minda tu umpatei,
2la tassu’ tu mai pekaamberammu sia to ma’paolai salummu lao ussuka’i tu mambelanna dio mai inan nanii to dipongko sae lako mintu’ kota tiku lao.
3Iatu pekaamberanna kota, tu nasikandappiran to mate dipongko, la unnala misa’ anak sapi, tu tang dioongpa sia tang umpassanpa ayoka.
4La nabaa pekaamberanna kota iato tu anak sapi rokko lombok, tu nanii tontong lolong uainna, tu tang dikarang sia tang diambo’i, sia indemoto diong lombok, la nanii untotoi tu sokkongna anak sapi iato.
5Iatu mai to minaa, tu bati’na Lewi, la male lako tingayo – belanna Napileimo PUANG, Kapenombammu, tu tau iato la umpengkaolai Puang sia ma’passakke tete dio sanganNa PUANG; situru’ pangra’ta’na la dira’tasanni tu mintu’ kara-kara sia mintu’ kadiba’tanna tau.
6Iatu mintu’ pekaamberanna kota iato, iamotu to sikandappi’ tongan to mangka dipatei, sipatu la umbasei limanna dao anak sapi, tu ditoto sokkongna diong lombok,
7anna sa’bii kumua: Tangia limangki umbolloanni te rara iate sia tae’ duka natiro matangki.
8Padenanni kadiseroian kasalan tu taumMi Israel, tu mangka Mirampanan, o PUANG, sia da Mipapassanni tu rara to tang umpogau’ kasalan dio lu taumMi Israel. Iake dipasusito la dilendokammo dio mai tau iato mai tu rara iato.
9Susimoto la munii umpa’dei tu rara to tang umpogau’ kasalan dio mai kamu, belanna iake susito, mupogau’ tu apa malolo dio pentiroNa PUANG.
Diona baine dirampa lan kasirarian
10Iake tassu’ko male urrarii ualimmu, Nasorongmi PUANG, Kapenombammu, tama kuasammu tu tau iato, ammu rampai tu ba’tu pira-pira tau,
11sia mutiro tu misa’ baine dio lu to dirampa iato, melo tu pa’kaleanna, naurungan naala penaammu, la morai umpobainei,
12la musolan tama banuammu la naku’ku’i tu beluakna sia naalai tu kanukunna,
13la nalendokan tu tamangkale napake, tonna dirampa, anna torro lan banuammu sipeupu’ bulan, la untangi’i ambe’na sia indo’na; mangkato mumane ma’din tama ussitammuanni sia umpobainei, anna dadi bainemu.
14Iake tae’mi naalai penaammu, manassa la mueloran male umba-umba tu naporai; da’ maro’ mubalukanni, da mupasusii kaunan, belanna mangkamo muparuku mupobaine.
Diona katongananna anak pa’bunga’
15Iake denni misa’ muane da’dua bainena, misa’ napakaboro’, misa’ tae’, anna padadianni pia muane sola dua la iatu baine napakaboro’na la iatu baine tang napakaboro’na, na iatu pia muane pa’bunga’na nadadian baine tang napakaboro’,
16sia iake nataai tu apanna lako anakna napomana’, tae’ nama’din ussorongi lako anakna baine napakaboro’ tu katongananna anak pa’bunga’ sia tang naangga’ tu anakna baine tang dipakaboro’, tu anak pa’bunga’ tongan.
17Sangadinna iatu anak pa’bunga’, tu anakna muane baine tang dipakaboro’, sipatu naaku tu katongananna, ke dibenni tu taana manglokkon tu mintu’ apanna, belanna iamo bunga’na kamatotoranna, anna ia puangna katonganan anak pa’bunga’.
Diona pia muane pabali-bali
18Iake den misa’ muane, unnampui misa’ pia muane torokossik sia pabali-bali, noka umperangii tu ambe’na sia indo’na, sia tang sopati moi anna pandasami,
19iamoto nala’ka’i ambe’na sia indo’na, nabaai lako pekaamberanna kotana, tama to’ babangan pa’tondokanna,
20sia la ma’kada lako pekaamberanna kotana nakua: Iate anakki muane pia torokossik sia pabali-bali, tae’ namorai umperangiikan, sia untabu-tabu bang ianan sia pangirusan.
21Attu iato iatu mintu’ muane lan kotana ussileba’i batu, naurunganni mate. Susimoto la munii umpa’dei tu kadake dio lu kamu; narangimi mintu’ to Israel sia mataku’.
Panglamunan batang rabukna to diukung dipatei
22Iake den misa’ tau umpogau’ kasalan tu sipatu dinii umpatei, anna dipatei sia mutoke’ dio lentong,
23manassa iatu batang rabukna, tae’ nama’din torro sipeupu’ bongi dio lentong, sangadinna la mulamun bangsiamoto allo iato, belanna iatu tau ditoke’ Natampakki ropu Kapenomban; da mupamaruttakki tu tondok, la Nabenko PUANG, Kapenombammu, la mupotaa mana’.