Dual PanelKadirampanan dio mai kamandasan ke mengkatoba’mi tu to Israel
1Iake narampoiko te mintu’ apa, iamotu kamasakkean sia tampak ropu, tu kupennoloan dio tingayo, ammu palan penaai te iannate dio lu mintu’ bangsa, tu Nanii urrambaiko PUANG, Kapenombammu,
2sia iake mengkatoba’moko lako PUANG, Kapenombammu, sia umperangii tu gamaranNa situang penaa ponnomu sia kakalebuanna deatammu situru’ tu mintu’ apa kupasanangko allo iate, la iko la iatu mai anakms-
3namane iatu PUANG, Kapenombammu, la ungkamaseiko sia Puang la umpasirampunkomi dio mai mintu’ bangsa, tu Nanii PUANG, Kapenombammi, umpatisambo’komi.
4Moi na iatu to dirambaimmu torro dio randan langi’, la Napasirampun duka PUANG, Kapenombammu, dio mai sia Nasolan dio mai,
5sia la Nasolangko PUANG, Kapenombammu, lako tondok, tu napotondok nene’ to dolomu, ammu potondokki, sia Puang la ungkasokanniko sia la umpopemba’ka’ko losong na nene’ to dolomu.
6Sia PUANG, Kapenombammu, la ussunna’i tu penaammu sia penaanna bati’mu, muurunganni ponno penaammu sia kalebu deatammu ungkamasei PUANG, Kapenombammu, ammu marendeng-rendeng.
7PUANG, Kapenombammu, la umpata’pai ualimmu te mintu’ pa’tampak ropu iate sia mintu’ to ungkabiri’ko, tu undi unnula’ko.
8La muperangii pole’ tu gamaranNa PUANG sia la mupogau’ nasang tu pepasanNa, tu kupapassanangko allo iate.
9PUANG, Kapenombammu, la ungkamaseangko kameloan sebona dio mintu’ pentoeammu, lan rianna pa’tambukammu sia rianna patuoammu sia bura padangmu, belanna Napapaiman pole’ko PUANG, tu mupomelona, susi nene’ to dolomu mangka Napapaiman Puang,
10– iammu tananni talinga tu gamaranNa PUANG, Kapenombammu, la ungkaritutui tu pepasanNa sia aluk Napondok, tu disura’ lan sura’ Sukaran aluk iate sia iake mengkatoba’ko lako PUANG, Kapenombammu, situang penaa ponnomu sia kakalebuanna deatammu.
La mira’ta’ tu mipileinna
11Belanna iate pepasan tu kupapassanangko totemo, tae’ natarru’ masussa lako kalemu sia tae’ duka natarru’ mambela.
12Tae’ nadao langi’, muurungan ma’kada kumua: Mindara la kendek langngan langi’ la unnalangkan sia la umparangiangkan, kumua angki pogau’i?
13Tae’ nasambalinna lu tasik, muurungan ma’kada kumua: Mindara la lamban lian la unnalangkan sia la umparangiangkan, kumua angki pogau’i?
14Sangadinna kada iate sirondong tonganko, lan sadangmu sia lan penaammu la umpogau’i.
15Manassa kupennoloan totemo dio tingayomu tu katuoan sia kameloan, apa ia duka tu kamatean sia kakadakean,
16belanna kupasan lako kalemu totemo la ungkamali’ PUANG, Kapenombammu, iamotu unturu’ lalanNa sia ungkaritutui pepasanNa sia aluk Napondok sia atoranNa, kumua mumarendeng-rendeng sia memba’ka’ sia Napamasakkeko PUANG, Kapenombammu, lan tondok, tu muala mupoapa.
17Apa iake sorong boko’i tu penaammu sia tang ma’perangi, sangadinna dinaranko la umpenombai kapenomban senga’ sia umpengkaolai,
18tonganna kupokadangkomi totemo, kumua manassa la sanggangkomi; tae’ mila malambe’ sunga’ lan tondok, tu la muala mupoapa, ke mangkamoko ullamban Yordan.
19Allo iate kuala tu langi’ sola padang la ussa’biikomi, kumua angku pennoloanni dio tingayomi tu katuoan sia kamatean sia iatu kamasakkean sia tampak ropu, iamoto pileimi tu katuoan ammu tuo la iko la iatu mai bati’mu,
20belanna mukamali’ tu PUANG, Kapenombammu, sia muperangii tu gamaranNa sia la’ka’ko lako, belanna iamo mupotuo sia unnindo’i kamalamberan sunga’mu torro lan tondok, tu Naallu’ PUANG umbenni nene’ to dolomu, Abraham, Ishak sia Yakub Napalaoi sumpa.