Dual PanelPa’passakkena Musa
1Inde sia tu pa’passakke, tu nanii Musa, to Natonno’ Puang Matua umpassakke to Israel tonna tae’pa namate.
2Ma’kadami nakua: Iatu PUANG mengkalao dao mai Sinai sia bu’tu unnarrangi tu tau iato dio mai Seir; sombomi parrang dao mai ma’buntunna Paran sia rampomo bu’tu lu dio mai ma’pulo-pulo sa’bunna to masero pindan. Dio kananNa natiro tu api dukku.
3Tonganna Nakamasei tu mai bangsa iato; mintu’ to maserona – lan nasang limamMi, matindo dio to’ lentekMi sia untarima pirang-pirang buku kadamMi.
4Napasanmoki’ Musa tu Sukaran aluk, tu napoapa kombonganna Yakub.
5Puangmo dadi Datu dio lu Yesyurun, tonna sirampun tu mai pangulunna bangsa sola mintu’ sukunna Israel.
6Natuomora tu Ruben, da namate, sangadinna la tontong tang pira tu bilanganna.
7Inde sia tu diona Yehuda. Ma’kadami tu Musa nakua: Perangiimi, o PUANG, tu gamaranna Yehuda, amMi solanni lako bangsana; iatu limanna umpararianni, na Puangmora tu Patunduanna unneai tu ualinna.
8Iatu diona Lewi ma’kada nakua: Iatu TumimMi sia UrimMi napoapa tu to naala penaamMi, tu Mitoba dio Masa, tu Miposigaga dio to’ uainna Meriba;
9tu napokada diona ambe’na sia indo’na kumua, tae’ kutiroi; iatu siulu’na tae’ natandai sia iatu mai anakna tae’ naissanni. Belanna ungkaritutui kadamMi sia ungkanannangi basseMi.
10Naada’imi tu Yakub diona atoramMi sia Israel diona sukaran alukMi; natunumi tu dupa, amMi udukki sia napatorro tu pemala’ ditunu pu’pu’ dao inan pemalaramMi.
11Pamasakkemi, o PUANG, tu kamatotoranna sia popaimanni tu pentoeanna. Sanggangmi tu aakna tu to umbali sia iatu to ungkabiri’i, naurungan tang nakullemo bendan.
12Iatu diona Benyamin ma’kada nakua: Iatu to Nakamasei PUANG, tu la torro marampa’ Narondong Puang. Puang tontong unnonganni sia torro lan alla’na buntu mennaa’na.
13Iatu diona Yusuf ma’kada nakua: Napamasakkemira PUANG tu tondokna, anNa kamasei pamengan mala’bi’ tongan dao mai langi’ sia ambun, sia kalimbuang lu diong mai posi’na padang,
14sia pamengan mala’bi’ tongan, tu napabu’tu mata allo, sia pamengan mala’bi’ tongan tu napabu’tu bulan;
15sia sanda maelo napakendek buntu sipuli padang sia pamengan mala’bi’ tongan napalangngan tanete sangkarapoi itana,
16sia pamengan mala’bi’ tongan diong mai kuli’na padang situang kaseboanna; sia kanaalanna penaanNa Puang, tu ma’dioren lan to’ duri; narampomora tu iannato dao botto ulunna Yusuf sia toppo’ dao passaronganna to dipilei langsa’ dio lu to massiulu’.
17Iatu bunga’na sapinna unnampui kamala’biran sia iatu tandukna iamo tanduk sapi laki lampung; iamo la natandukanni tu mai bangsa, mintu’ randan langi’. Iamote tu ma’pulo-pulo sa’bunna Efraim sia iamote tu ma’sa’bu-sa’bunna Manasye.
18Iatu diona Zebulon ma’kada nakua: Parannuko, e Zebulon, diona kalingkammu, sia iko, e Isakhar, diona tendamu.
19La natambai langngan buntu tu mai bangsa; inde to la nanii umpemalaran pemala’ unturu’ tonganna, belanna napasusu kaseboanna tasik tu tau iato mai sia apa ballo tu kabunian dio biring tasik.
20Iatu diona Gad ma’kada nakua: Mintu’ kadipudian lu langngan Puang, tu umpamalona’ pa’padanganna Gad; matindomo diong susito singa birang, anna le’to-le’toi tu mai takia’, ondongpi untesse-tessei tu kararo ulu.
21Naalan kalena tu taa ma’iringanna, belanna inde to nanii membuni tu taana to ma’parenta; rampo lako pangulunna bangsa iato; napalalo tu kamaloloanNa PUANG sia ukunganNa sola to Israel.
22Iatu diona Dan ma’kada nakua: Iatu Dan susito anak singa, tu mekkondong tassu’ dio mai Basan.
23Iatu diona Naftali ma’kada nakua: Iatu Naftali dipedia’i kamasokanan sia dipakabu’i kamasakkean lu dio mai PUANG; alami tu tasik mupoapai sia iatu rampe Lo’na lu.
24Iatu diona Asyer ma’kada nakua: Namaupa’mora tu Asyer dio lu mintu’ pia muane; nakaboro’imira siulu’na sia naotonmira tu lentekna tama to’ minna’.
25Na bassimora sia tambaga muposalliran, nakamatotorammumora la pada lambe’ sunga’mu.
26Moi misa’ tau tae’ sangtende’na Puang Matua, e Yesyurun; tu ma’kareta dao langi’ butung to patunduammu, sia situang kapasareongananNa dao lu salebu’.
27Puang Matua matontongan mupopentionganan sia tontong urrande pala’ko. Belanna mangkamo unnula’ ualimmu dio tingayomu sia ma’kada Nakua: Pisanni!
28Iamoto natorro marampa’ Israel, sia mata uainna Yakub tang dipatumba lan tondok, tu nanii gandung sia uai anggoro’ ba’ru; ondongpi iatu langi’na umpato’doanni ambun.
29Maupa’ko, e to Israel; mindara susimmu? Iamotu misa’ bangsa Nalendokan PUANG, tu balulang patunduammu sia pa’dang kamatandeammu. Iamoto na iatu ualimmu unna’ga to mengkanorong bangmo kalena lako kalemu, sia mulese tu padang madaona.