Dual PanelDiona ca’ ma’pempitunna sia pitu malaeka’ anna pitu tarompe’ pua
1Iatonna bungka’i Anak domba tu ca’ ma’pempitunna, bittukmi lan suruga den agi-agi sangtangnga te’te’.
2Kutiromi tu pitu malaeka’ bendan dio oloNa Puang Matua, anna diben pitu tarompe’ pua.
3Saemi misa’ malaeka’ senga’ nabendan dio sa’de inan pemalaran, untoe puaro bulaan, dibenmi buda kemenian lako, kumua napennoloanni sola pangandona mintu’ to masallo’ dao inan pemalaran bulaan dio olo isungan kapayungan iato.
4Iatu rambu kemenian sola pangandona mintu’ to masallo’ kendek langngan oloNa Puang Matua diong mai limanna malaeka’ iato.
5Naalami malaeka’ iato tu puaro anna patamai api dio mai inan pemalaran, anna pellebaranni tama lino, dadimi ba’tu pira-pira guntu’ sia ba’tu pira-pira gamara sia kila’ sia lino’.
6Iatu pitu malaeka’, untoe pitu tarompe’ pua tumayamo la ma’pannoni.
Lino namampu’i api
7Iatu malaeka’ bunga’na umpannoni tarompe’ puana, nasae uran batu sia api, sirau rara; mintu’nato dibolloan tama lino. Mampu’mi sangtaa tallunna tu lino sia mampu’ sangtaa tallunna mintu’ garonto’ kayu sia mampu’ tu mintu riu maluna.
Tasik disanggang
8Iatu malaeka’ ma’penduanna umpannoni tarompe’ puana, butung to misa’ buntu kapua nakande api dipembuangan tama tasik; iatu tasik sangtaa tallunna mendadi rara;
9Sia matemi sangtaa tallunna tu mintu’ apa kepenaa lan tasik; sia tallan sangtaa tallunna tu mintu’ kappala’.
Mintu’ uai memmapai’
10Iatu malaeka’ ma’pentallunna umpannoni tarompe’ puana, naronno’ dao mai langi’ misa’ bintoen kapua, dukku susi bia’, iatu bintoen iato, nai’pinni tu sangtaa tallunna mintu’ salu sia mintu kalimbuang.
11Iatu bintoen iato disanga Apsintus, nasangtaa tallunna mintu’ uai mendadi apsantin; budami tau mate napobua’ uai iato, belanna mapai’mo.
Mintu’ apa dao langi’ disanggang
12Iatu malaeka’ ma’penna’pa’na umpannoni tarompe’ puana, anna sanggangi tu sangtaa tallunna mata allo sia sangtaa tallunna bulan sia sangtaa tallunna mintu’ bintoen, kumua anna malillin tu sangtaa tallunna sia da namarorrong sangtaa tallunna masiang, sia bongi susi dukato.
13Kutiromi sia kurangi misa’ langkan maega mettia’ lan tangngana langi’ ma’kada umpekapuai gamaranna; A’a, a’a, a’a, masolang tu mintu’ to untorroi kuli’na padang tu belanna oni tarompe’ pua senga’na, iamotu lu dio mai tallu malaeka’ tu la umpannonii undinna.