Dual PanelRapang-rapang diona Zedekia umpoka basse
1Rampomi tu kadanNa PUANG lako kaleku Nakua:
2E ma’rupa tau pokadako misa’ karrume, paissanni misa’ pa’pasusian tu to Israel,
3sia ma’kadako kumua: Inde sia tu kadanNa, Puangta PUANG Nakua: Den misa’ langkan maega kapua, mawatang pani’na, malinta’ pettia’na, makamban bulu pani’na sia ma’rupa-rupa, ta’pa dao Libanon, anna ala lolok kayu arasi’.
4Iatu takke’-takke’ manguranna daona lu nasa’pekki, nabaai lako misa’ tondok nanii ma’baluk-baluk, anna palanni misa’ kota to ma’balili.
5Naalami tu taruk misa’ dio mai padang iato, anna tananni lan misa’ pangamboran, tu nanii buda uai, natananmi susi kanii.
6Mentarukmi dadi garonto’ anggoro’ kalua’ male membalaba’, maresso’ tu garonto’na, anna ma’palulako nasang tu tangkena sia diong nasang liu tu uaka’na. Susito dadimi garonto’ anggoro’ mentangke-tangke sia mellolo.
7Apa den siapa misa’ langkan maega kapua, mawatang tu pani’na sia buda bulu pani’na. Ta’kala iatu garonto’ anggoro’ umpoperroro uaka’na lu lako sia napopembalaba’ tu tangkena lako, kumua anna sakka’i langkan maega iato, tangia pangamboran, tu dinii untananni.
8Apa ditanan dio lu padang lunak, tu nanii buda uai, la mentaruk sia mellolo sia membua, anna dadi misa’ garonto’ anggoro’ ballo.
9Pokadai kumua: Inde sia tu kadanNa Puangta PUANG, Nakua: La dadi siaraka? Tae’ siaraka nala ullampi’i tau tu aka’na sia nasa’pek tu buanna, naurunganni marangke tu daunna sia tarukna? La marangke sia tae’ tu lima matoto’ sia buda tau la ditambai la urra’ta i diong mai aka’na.
10Manassa ditanan, apa ma’dinraka la dadi? Tae’raka nala marangke pissan, ke nairi’i angin rampe matallo, namarangke dio inan dinii untananni?
11Rampomi tu KadanNa PUANG lako kaleku Nakua:
12Pokadanni bati’ pabali-bali kumua: Tae’raka mitandai apa battuananna te? Pokadanni kumua: Manassa saemo datu Babel lako Yerusalem, anna baai male tu datu sia iatu mai arung, anna pali’i lako Babel, napadio kalei.
13Sia naala tu misa’ bati’ datu, anna sibasse sola sia napadudungi sumpa; sia nasolan duka male tu to paana tondok.
14Iake susito la tae’mo kamatotoranna tu kadatuan sia tae’mo nakullei unnadongan ulunna, sangadinna nakaritutui tu basse, anna tontong bendan.
15Apa naeamo, belanna mesua lako Mesir, anna benni darang buda sia tau buda. La maupa’ siaraka? Ma’dinraka tilendok tu to umpogau’i susito? Sia iatu to umpoka basse ma’dinraka la tilendok?
16La lelukraka tuoKu, kadanNa Puangta PUANG, manassa la mate tu Zedekia dio Babel, sikandappi’ datu, lan inan nanii torro datu mangka unnangka’i dadi datu, belanna napamatuna tu sumpa mangka nasumpanni sia napoka tu basse mangka nasibassei.
17Sia tae’ duka nabenni Firaun surodadu buda sia to parari makamban la untundui lan kasirarian, ke umbangunni panampo sia unggaragai benteng, la ungka’tu sunga’na buda tau.
18Napamatunamo tu sumpa, belanna napoka tu basse; moi namangkamo sitoe lima, umpogau’i tu mintu’ apa iato; tae’ nala tilendok.
19Iamoto, kadanNa Puangta PUANG: la lelukraka tuoKu, iatu sumpa disa’bu’ tete dio sangangKu, tu napamatuna sia iatu basse ditanan tete dio sangangKu, tu napoka, la Kupasule langngan ulunna.
20La Kutananni porro’Ku, anna alai poyaKu, angKu solanni lako Babel, nadio Kunii umpaolai salu, natumang gau’ tang maruru’na lako Kaleku.
21Iatu mintu’ to mallai dio mai mintu’ tuntunan surodadunna, la tibambang nakande pa’dang, na iatu torronapa la dipatisambo’ lako mintu’ mata angin. Ammi tandai, kumua Akumo tu PUANG, tu mangka umpokadai to.
22Inde sia tu kadanNa Puangta PUANG Nakua: Attu iato Aku Kalena la unnalai tu misa’ taruk dao mai lolok kayu arasi’ madao, angKu tananni rokko padang; dao mai takke’-takke’ mangura madaoanna la Kusa’pek tu misa’ tarukna na Aku kalena la untananni dao misa’ buntu malangka’ sia mala’bi’.
23Dao buntu malangka’na Israel la Kunii untananni, anna mentangke sia membua sia mendadi misa’ arasi’ ballo. Anna sanda rupanna tu manuk-manuk, ma’rupa-rupa bulunna sae messerang diong; anna mentiongan diongna lu tangkena.
24Anna mintu’ kayu dio padang la untandai kumua Akumo, tu PUANG, umpamadiongan kayu matande sia umpamatande kayu mengkadiongan, umpamarangke kayu maluna sia umpopentaruk kayu marangke. Akumo, tu PUANG, tu mangka umpokadai to, sia Akumo tu la umpogau’i.