Dual PanelIsrael dipasule tama dandanna sia dipemaseroi
1E ma’rupa tau, ma’nubua’ko diona mintu’ buntunna Israel, kumua: E buntunna Israel, perangii tu kadanNa PUANG.
2Inde sia tu kadanNa Puangta PUANG, Nakua: Belanna ma’kadamo tu uali diona kamu kumua: Pallakko, iatu mintu’ tanete sipamula lino, taalamo tapomana’.
3Iamoto ma’nubua’ko sia ma’kadako kumua: Inde sia tu kadanNa Puangta PUANG, Nakua: Tonganna belanna nasanggangkomi sia nalullu’komi tau dio mai mintu’ sulapa’, kumua anna alakomi napomana’ mintu’ bangsa torronapa, sia belanna naulelean kadakekomi sia napalele bekokomi tau.
4Iamoto, e buntunna Israel, perangii tu kadanNa Puangta PUANG. Inde sia tu kadanNa Puangta PUANG lako mintu’ buntu, tanete, randan salu’-salu’ sia lombok, lako inan daun-lauan talo sia lako kota lo’bangmo, tu naporampan sia napoparumbasan mintu’ bangsa torronapa tiku lao.
5Iamoto, inde sia tu kadanNa Puangta PUANG Nakua: Tonganna mangkaMo’ ma’kada situang api kapangimburuangKu la unnukungi tu bangsa torrona sia mintu’ Edom, tu umpamanassai la unnalai napomana’ tu tondokKu situang kasendean kapuana sia katangpabilangan kapuana, kumua nasarrinni.
6Iamoto, ma’nubua’ko diona padangna Israel sia ma’kadako lako mintu’ buntu sia tanete, lako randan salu’-salu’ sia lombok, kumua: Inde sia tu kadanNa Puangta PUANG, Nakua: Manassa ma’kadaNa’ tete dio kapangimburuangku sia kare’dekanna ara’Ku, Kukua: Belanna mipassanmo tu kadilo’boanna tu mintu’ bangsa,
7iamoto, inde sia tu kadanNa Puangta PUANG, Nakua: UmpalaoNa’ sumpa Kukua: Tonganna mintu’ bangsa untikuikomi la umpassan kalena kadilo’boanna.
8Apa kamu, e mintu’ buntunna Israel, la mentarukkomi sia la mipadenan buammi tu Israel, taungKu, belanna mandappi’mo tu kasaeanna.
9Belanna manassa la saeNa’ lako kalemi sia la ma’palumati’Na’, ammi diposara’ sia diambo’i.
10Sia la Kupopemba’ka’ tu tau, tu untongkonnikomi dao, iamotu mintu’ to Israel sola nasang; iatu mintu’ kota la dipa’tondokki sule sia iatu mintu’ inan daun-lauan la dibangun sule.
11La kupamakamban tu tau sola patuoan untongkonnikomi, anna memba’ka’ sia membati’, la Kupakaissikomi susito allo mangka diboko’ sia la Kukamaseikomi tu mipomelona losong na iatonna dolona, ammi tandai kumua Akumo tu PUANG.
12Sia la Kupalolangikomi tau, iamotu Israel, taungKu; tu unnalakomi napomana’ sia napotaa mana’komi, sia tae’mo mila umpasisayuranni anak.
13Inde sia tu kadanNa Puangta PUANG, Nakua: Belanna napokada tau diona kalemu kumua: Ikomo misa’ tondok pangampello’ tau, sia umpasisayuranni anak tu taunna,
14iamoto tae’mo ammu la unnampello’ tau sia tae’mo mula umpasisayuranni anak tu taummu, kadanNa Puangta PUANG.
15Sia tang la Kuparangiimoko petellena mintu’ bangsa sia tae’mo mula umpassanni tu pelo’bona mintu’ to sangpetayanan, sia tae’mo mula umpasisayuranni anak tu taummu, kadanNa Puangta PUANG.
16Rampomi tu kadanNa PUANG lako kaleku, Nakua:
17E ma’rupa tau, iatonna torropa lan tondokna tu to Israel, naruttakki napobua’ kedona sia penggauranna. Butungi to baine nalambi’ bulanna, susi dukato tu penggauranna tau iato mai dio pentiroKu.
18Iamoto Kubarrakanni tu kare’dekan ara’Ku lako tau iato mai natumang rara mangka napatibollo sia belanna naruttakki tete dio rapang-rapang dipodeatanna.
19Kupatisambo’ tu tau iato mai dio lu mintu’ bangsa, naurunganni titale’ dio lu mintu’ tondok; Kuukungmo sitinaya kedona sia penggauranna.
20Umba-umba nanii rampo dio lu mintu’ bangsa napamatuna tu sanga madatungKu, belanna napokada tau diona a’ganna nakua: Iate tau iate mai taunNa PUANG, apa moi susito inang tassu’ duka ia dio mai tondokNa.
21Kukarintinni tu sanga madatungKu, tu mangka napamatuna to Israel dio lu mintu’ bangsa, tu nanii rampo lako.
22Iamoto, pokadanni to Israel kumua: Inde sia tu kadanNa Puangta PUANG, Nakua: Tae’ kumua bannang dio kamu, angKu pogau’i, e to Israel, sangadinna bannang diori sanga madatungKu, tu mangka mipamatuna dio lu mintu’ bangsa, tu minii rampo lako.
23La Kupamadatu tu sanga pasareongangKu tu mangka dipamatuna dio lu mintu’ bangsa, sia tu mangka mipamatuna dio lu mintu’ bangsa, kumua Akumo tu PUANG, kadanNa Puangta PUANG, ke Kupamanassai dio pentirona tau iato mai, kumua Akumo tu To madatu.
24La Kualakomi dio mai mintu’ bangsa sia la Kupasipulungkomi lan mai mintu’ tondok, angKu baakomi tama tondokmi.
25La Kubura’komi uai masero, ammi masero; la Kupamaserokomi dio mai mintu’ kamaruttakammi sia dio mai mintu’ rapang-rapang dipodeatammi.
26La Kubenkomi penaa ba’ru sia la Kupatamai sumanga’ ba’ru tu ba’tengmi; na iatu penaa batu la Kualai dio mai kalemi, angKu benkomi penaa duku’.
27La Kubenkomi PenaangKu la tama ba’tengmi sia Kupadadikomi to unturu’ apa Kupondok sia makaritutu umpogau’ atorangKu.
28La torrokomi lan tondok mangka Kukamasean nene’ to dolomi, angKu potaukomi, na Aku mipo Kapenomban.
29La Kulendokangkomi dio mai mintu’ kamaruttakammi sia la Kutambai sae tu gandung, angKu popemba’ka’i sia tae’mo nala urrampoikomi karorian.
30Ondongpi la Kupatarri’ tu mai bua kayu sia la Kupopemba’ka’ tu bura padang, kumua damo naruakomi pelo’bo dio lu mintu’ bangsa napobua’ karorian.
31Attu iato la mikilalai tu kedo kadakemi sia penggauran tang melomi sia mikagi’gi’ tu kalemi natumang kakadakeammi sia penggauran megallianmi.
32Tangia bannang dio kamu, angKu pogau’i te, kadanNa Puangta PUANG; melo miisanni! Sipatukomi la masiri’ sia maila’, natumang penggaurammi, e to Israel.
33Inde sia tu kadanNa Puangta PUANG Nakua: Iake Kupamaserokomi dio mai mintu’ kakadakeammi, la Kupakeissi sule tu kota sia la Kubangun sule tu inan daun-lauan.
34Iatu mai padang sanggangmo la dipadanun sule la ussonda padang lo’bang, la natiro mintu’ to lendu’ lalan.
35Sia la ma’kada tu tau, nakua: Iate tondok iate tu talomo, susimo pa’lak Eden; iatu mintu’ kota tu disanggang sia diro’pok sia daun-lauan, dipamatoto’mo sule sia dipa’tondokki.
36La naissan mintu’ bangsa torronapa untikuikomi, kumua Akumote, tu PUANG, umbangunni sule tu apa sanggangmo sia untananni tu apa talo. Akumote, tu PUANG, mangka umpokadai tu iannato sia Aku dukamo la umpogau’i.
37Inde sia tu kadanNa Puangta PUANG, Nakua: Iate iannate la Kupalalo duka tu pengkamoyana to Israel, kumua la Kupopemba’ka’ tu tau iato mai, na iatu bilanganna la pada tuntunan domba budanna.
38Pada tu tuntunan domba dipemalaran, iamotu pada tuntunan domba dio Yerusalem, ke pa’gauran, la susi dukato tu mintu’ kota sanggang naponnoi tuntunan tau. Anna tandai tau iato mai, kumua Akumo tu PUANG.