Alkitab Mobile SABDA
[VER] : [TORAJA]     [PL]  [PB] 
 <<  Yeremia 14 >> 

Pa’pakilala diona pealloan karing

1Inde sia tu kada sae lako Yeremia, iamotu kadanNa PUANG diona tu pealloan pannang.

2Iatu to Yehuda masussa nasang sia tae’mo namatoto’ tu mintu’ babanganna; iatu tau iato mai ma’pote dibolong mamma’ diong lu padang; sia iatu sarrona Yerusalem kendekmo langngan langi’.

3Iatu mintu’ to kapuana ussua pa’kurinanna undaka’ uai; iatonna rampomo lako to’ bubun batu, tae’mo uai naapparan, anna sule lo’bang tu tau iato mai umbaa bussona; kasirisan tu tau iato mai sia maila’ anna umbungku’ ulunna.

4Iatu tau iato mai rosso penaanna diona pa’lakna, belanna tae’ nasae tu uran lan kuli’na padang; iamoto anna masiri’ to tu ma’pa’lak sia umbungku’ ulunna.

5Belanna moi donga birang tu kianak dio lu padang untampe duka anakna, belanna tae’ bangmo riu.

6Iatu keledai pangala’ bendan dao tanete rangke sia seka-seka susi serigala; maru’gun tu matanna, belanna tae’mo ria tuo.

7Moi anna iatu kakadakeangki bendan titanan sa’bi unneakan, o PUANG, pogau’i tu iannato diona sangamMi. Belanna tarru’ memboko’mokan, sia lako Kalemi kinii kasalan.

8O Pa’rannuananna to Israel! o Patunduanna, ke attu kapussakan, ma’apai amMi la butung to sae lan tondok iate, sia butung to lendu’ lalan, tu lendu’ bangri ma’bongi?

9Ma’apai amMi susito misa’ to maling sia butung to misa’ pa’barani tu tang nakulle patunduan? LanKomi lu tangngaki, o PUANG, sia iatu sangamMi disa’bu’ lako kaleki, iamoto da Mitampekan.

10Inde sia tu kadanNa PUANG tu diona bangsa iate, Nakua: lendu’ ia naporainna tu tau iato mai salamba salao sia tae’ napatadangi tu lette’na; iamoto natae’ nakalo’i penaanNa PUANG. Na totemo la Nakilalaimo tu kakadakeanna sia Naukung tu kasalanna tau iato mai.

11Sia Nakua PUANG lako kaleku: Da mupassambayanganni te bangsa iate tu napomelona.

12Moi anna ma’puasa tu tau iato mai, tae’ duka Kuperangii tu petambana, sia moi anna pemalaran pemala’ ditunu pu’pu’ sia kande dipemalaran, tae’ duka nakalo’i penaangKu, sangadinna la Kumangsanni pa’dang sia karorian sia ra’ba biang.

13Kukuami: A’a Puangta PUANG tonganna ma’kada tu mintu’ nabi lako tau iato mai, nakua: tae’ mila untiro pa’dang sia tae’ nala urrampoikomi karorian, sangadinna karapasan tontong la Kukamaseangkomi lan inan iate.

14Apa ma’kada PUANG lako kaleku Nakua: Tae’ natongan tu apa napokada mintu’ nabi iato tete dio sangangku; tae’ Kusuai tu tau iato mai, ba’tu umpasanni, ba’tu ma’kada lako kalena. Iatu pa’nubua’na lako kalemi iamo patiro mendeata tang tongan sia kapakita-kitan tae’ gai’na sia pa’pakena bu’tu lan penaanna.

15Iamoto, nakua kadanNa PUANG diona tu mai nabi ma’nubua’ tete dio sangangKu, moi natae’ Kusuai tu tau iato mai sia tu ma’kada nakua: La tae’ kandean pa’dang sia karorian lan padang iate – mintu’ nabi iato mai la sabu’ napobua’ pa’dang sia karorian.

16Na iatu bangsa tu napa’nubuaran nabi iato mai, la situlambenan dio lu mintu’ batatta Yerusalem, napobua’ karorian sia pa’dang; na moi misa’ tau tae’ ullamunni, la tau iato mai la bainena la anakna muane sia anakna baine. La Kupasusimoto umbarrakanni tu kakadakeanna dao ulunna.

17Iamoto pokadai te lako tau iato mai, kumua: Tae’ torena sitanutuan tu uai matangku ke bongi sia keallo, belanna anak dara, lai’na bangsaku bangkemo, iamotu bangke kapua, belanna nakandalan pa’dang.

18Iake tassu’na’ lako padang, dio tu mintu’ to mangka nakande pa’dang. Sia iake tamana’ kota, lan tu to la mate mannamo napobua’ karorian! Ondongpi la nabi la to minaa lu lako lu dio mai lan lu tondok sia tae’mo apa natandai.

19Mitibe tarru’raka tu Yehuda? Nakasorromoraka penaamMi tu Sion? Ma’apari Mibambakan, kiurunganni tang mondo sule? Moi kirannuan kamarampasan, apa tae’ bang tu melona, moi angki rannuan allo kamalekean, apa metakuranna manna!

20O PUANG, kitandaimo tu katangmekaalukangki sia kakadakeanna nene’ to doloki, kumua kasalammokan lako Kalemi.

21Da Mitibei sia da Mitang umbilangi tu isungan kapayungan madatumMi, belanna sangamMi. MengkilalaKomi; da Mipokai tu basse tatanan sola.

22Denraka misa’ tu rapang-rapang dipodeata tu tae’ gai’na dio lu mintu’ bangsa ma’din umpasae uran? Ma’dinraka tu langi’ umpatibarrak uran sae? Tae’raka naKamu, o PUANG, Kapenombangki? Iamoto angki rannuangKomi, belanna Kamu umpadadii tu mintu’nate.


  Share Facebook  |  Share Twitter

 <<  Yeremia 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel