Dual Panel1Iatonna mangkamo Yeremia umpokadai lako mintu’ to buda tu kadanNa PUANG, Kapenombanna, tu Napesuan PUANG, Kapenombanna, umparampoanni, tu mintu’ kada iato,
2nakuami tu Azarya, anakna Hosaya sia Yohanan, anakna Kareah sia mintu’ to matampo lako Yeremia: Tae’ natongan te kadammi; tae’ Nasuakomi PUANG, Kapenombanta, umpepasananni kumua: Da mimale lako Mesir la mentiruran dio.
3Apa naada’ salamokomi Barukh, anakna Neria, la undakarangkanni kadake, kumua anna sorongkan tama limanna to Kasdim, anna pateikanni ba’tu napali’ lako Babel.
4Susimoto tu Yohanan, anakna Kareah sia mintu’ pa’barani sia mintu’ to buda tang unturu’ kadanNa PUANG, tae’ namorai torro lan tondok Yehuda.
5Sangadinna naala Yohanan, anakna Kareah sia mintu’ pa’barani tu to Yehuda tu torronapa, iamotu to sulemo dio mai mintu’ bangsa, tu dinii umpasisarak-sarakki male, la torro mari’pi dio tana Yehuda,
6iamotu mai muane sia baine sia pia sia anakna baine datu sia mintu’ tau tu napatorro Nebuzaradan, pangulu to ma’kampa, lako Gedalya, anakna Ahikam, anakna Safan, la nakampai, sia ia dukapa tu nabi Yeremia sola Barukh, anakna Neria.
7Anna male tu tau iato mai lako Mesir, belanna tang unturu’ kadanNa PUANG: rampomi lako Tahpanhes.
Nubua’ diona kaditaloanna Mesir
8Attu iato saemi kadanNa PUANG lako Yeremia dio Tahpanhes, Nakua:
9Alako batu kapua ammu tangkei, bunii lan to’ losso’ pitti’ diongna lu paladan batu dio tingo tongkonan layukna Firaun dio Tahpanhes, natingayo mintu’ to Yehuda,
10sia pokadai lako kumua: Inde sia tu kadanNa PUANGna mintu’ ma’dandan maritik, Kapenombanna to Israel, Nakua: Manassa la Kupesuan tu Nebukadnezar, datu Babel, iamo taungKu, anna pabendanni tu isungan kapayunganna dao te batu mangka Kubuni, sia naampa’i paramadani kapayunganna.
11La sae anna taloi tu tondok Mesir; minda-minda tu dilampak mate, la mate, minda-minda tu dilampak dipali’, la dipali’, minda-minda tu dilampak nakande pa’dang, la nakande pa’dang.
12Sia la umpadukku api lan mintu’ banua deata to Mesir sia nasumpun sia narampa tu rapang-rapang dipodeatanna, sia napessambu’ tu tana Mesir, susito misa’ pangkambi’ ma’lullung, anna sun marampa’ inde to dio mai.
13Ia dukamo la umpoka-pokai tu mintu’ batu dipodeata dio to’ banua deata mata allo, tu bendan dio Mesir sia nasumpun tu banua deata dio lu Mesir.