Dual PanelUKUNGAN, LAKO BANGSA-BANGSA (PASALA’ 13–23) ;Pa’nubua’ diona Babel
1Inde sia tu kada Napa’petanggungan Puang Matua diona Babel, tu mangka dipasombo lako Yesaya, anakna Amos:
2Osokki tu bate-bate dao buntu tang karerungan, pekapuai tu gamarammi metamba lako tau iato mai; popangayoi tu limammi, anna unnola dio to’ ba’bana to la’bi’.
3Mangkamo Kukuan tu mintu’ to marimbangangKu, sia Kutambai dukamo tu mintu’ pa’baraningKu la umpalalo kasengkeangKu, tu unnarrak-arrak belanna nasau penaanna.
4Dirangimi tu ongngo’ dao buntu susito ongngo’na tau buda, gamara tipio padangna mintu’ bangsa sita’pa dio mai mintu’ parenta. PUANGna kalena mintu’ ma’dandan maritik tu umparessa sangtuntunan surodadu.
5Tau iato mai lu dio mai padang mambela, dio mai randan langi’, PUANG sola parea kasengkeanNa tu la ussanggangi tu mintu’ lino.
6Sitangirangkomi, belanna mandappi’mo tu alloNa PUANG; sae butung kasanggangan dio mai To umpoissan angge maritik.
7Iamoto anna la langga’ tu mintu’ lima sia la bonnong tu penaanna mintu’ tolino.
8Sia tiramban tu tau iato mai, ma’paganggang sia narampoi kamaparrisan, mangumbero susito baine manguria’; buyu’ sitiro len tu tau iato mai sia iatu lindona borrong susito api.
9Inang la sae tu alloNa PUANG sitonda kamaparrangan sia kamagallian anna iatu kasengkean dukku-dukku, tu la umpopempadang lo’bangi tu mintu’ lino, sia la nasabu’i tu mintu’ to umpogau’ kasalan lan te lino.
10Belanna mintu’ bintoen dao langi’ sia bintoen ma’karupu tae’mo anna la umpatiarrang arrangna; ia duka tu allo la dipamalillin, ke dellekki sia iatu bulan tae’mo anna la umpamian arrangna.
11Belanna la Kupapakkanni lako mintu’ issinna lino tu kakadakeanna sia iatu kakelokanna la Kupapakkanni lako mintu’ to tang mekaaluk, sia la Kuputtai tu kamadongngaranna to matampo sia la Kupampa lu rokko tu kamadaoan penaanna to kelok.
12La Kupamasuli’ ia tu tolino anna bulaan massang, sia keangga’ kapua iatu rupa tau anna bulaan tasak dio mai Ofir.
13Iamoto angKu la umpatigega’ i tu langi’ sia iatu lino la lino’ sia tilele dio mai inanna, napobua’ kare’dekanna ara’Na PUANGna mintu’ ma’dandan maritik tonna allo kadukkuanna kasengkeanNa.
14Tau iato mai la ten kijang diula’ sia la sangtinti domba tang dikambi’ pantan la sule umpengkara’pai bangsana sia pantan mallai umpengkaa’i tondokna.
15Minda-minda tu dikabu’tui la dirauk, sia minda-minda tu dila’ka’i la mate nakande bassi.
16Sia iatu mintu’ anakna la dipessambakan dio tingayona tau iato mai, mintu’ banuanna la dilo’do’i sia mintu’ bainena la ditoro’-buku.
17La Kupare’dek ara’na tu to Madai unnea tau iato mai, tu misa’ bangsa tang ungkabudai salaka sia tang ungkaduangi bulaan.
18Sangadinna iatu tinaranna ussanggang pia muane sia tae’ anna katirinnai tu mai lanna pa’tambukan, sia tang mamase untiro pia’-pia’.
19Na iatu Babel tu napotarompo’ mintu’ kadatuan sia kamala’biran nasattuan mintu’ to Kasdim la susi Sodom na Gomora, tonna palumbangi Puang Matua.
20Tae’mo nala umpa’tondokki tau tontong sae lakona sia tae’mo inan nanii ma’tondok landa’ lako disituran-turananni, moi to Arab tae’mo nama’tenda dio sia moi to manglaa tae’ dukamo la umpakande pangkambi’na dio.
21Sangadinna la nanii serigala buriko’ torro sia iatu mai banuanna la ponno langau, sia nanii torro anak burung unta dio sia ampu padang silo’dok-lo’dokan.
22Sia lan mintu’ tambakukunna la nanii ungnguang-nguang asu lampung sia lan tongkonan layukna nanii ma’pema’mik-ma’mik la nanii serigala; iatu attunna mandappi’mo sia iatu allona tang la dipapodo’mo.